ನವದೆಹಲಿ (ಪಿಟಿಐ): ಅಮೆರಿಕದ ಕೇಂದ್ರೀಯ ತನಿಖಾ ಸಂಸ್ಥೆ (ಸಿಐಎ)ಯ ಮುಖ್ಯಸ್ಥ ಲಿಯಾನ್ ಇ.ಪ್ಯಾನೆಟ್ಟ ಅವರು ಶನಿವಾರ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಎಂ.ಕೆ.ನಾರಾಯಣನ್ ಅವರನ್ನು ಭೇಟಿಯಾಗಿ, ಪಾಕಿಸ್ತಾನ ಮತ್ತು ಆಘ್ಘಾನಿಸ್ತಾನಗಳ ಭಯೋತ್ಪಾದಕ ಸಂಘಟನೆಗಳಿಂದ ಎದುರಾಗಿರುವ ಸವಾಲುಗಳ ಬಗ್ಗೆ ಚರ್ಚಿಸಿದರು.
ಪಾಕಿಸ್ತಾನ ಭೇಟಿ ಮುಗಿಸಿ ಶುಕ್ರವಾರ ರಾತ್ರಿ ಇಲ್ಲಿಗೆ ಬಂದ ಪ್ಯಾನೆಟ್ಟಾ ಅವರು, ನಾರಾಯಣನ್ ಜತೆ 30 ನಿಮಿಷ ಕಾಲ ಮಾತುಕತೆ ಆಡಿದರು.
ಪಾಕಿಸ್ತಾನ ಮತ್ತು ಆಘ್ಘಾನಿಸ್ತಾನಗಳು ಉಗ್ರರ ‘ಅಡ್ಡೆ’ಗಳಾಗಿರುವ ಬಗ್ಗೆ ಚರ್ಚಿಸಿದ ಅವರು, ಬೇಹುಗಾರಿಕಾ ಮಾಹಿತಿಯನ್ನು ತ್ವರಿತವಾಗಿ ವಿನಿಮಯ ಮಾಡಿಕೊಳ್ಳುವಲ್ಲಿ ಅಮೆರಿಕ- ಭಾರತ ನಡುವಿನ ಸಹಕಾರವನ್ನು ಇನ್ನಷ್ಟು ಗಟ್ಟಿ ಮಾಡಿಕೊಳ್ಳುವ ಕುರಿತೂ ಪ್ರಸ್ತಾಪಿಸಿದರು.
ಮೂರು ದಿನಗಳ ಭೇಟಿ ನೀಡಿರುವ ಪ್ಯಾನೆಟ್ಟ, ಭಾರತದ ‘ರಾ’ ಮುಖ್ಯಸ್ಥ ಕೆ.ಸಿ.ವರ್ಮ, ಗುಪ್ತದಳದ ಮುಖ್ಯಸ್ಥ ರಾಜೀವ್ ಮಾಥುರ್ ಅವರಷ್ಟೇ ಅಲ್ಲದೆ, ಗೃಹ ಸಚಿವ ಪಿ.ಚಿದಂಬರಂ ಮತ್ತು ಗೃಹ ಇಲಾಖೆ ಕಾರ್ಯದರ್ಶಿ ಜಿ.ಕೆ.ಪಿಳ್ಳೈ ಅವರನ್ನೂ ಭೇಟಿಯಾಗುವ ನಿರೀಕ್ಷೆ ಇದೆ.
ಭಾರತ ಹಾಗೂ ವಿದೇಶಗಳಲ್ಲಿ ದಾಳಿ ನಡೆಸುವ ಸಂಚು ಹೂಡಿದ್ದ ಡೇವಿಡ್ ಹೆಡ್ಲಿ ಕುರಿತ ತನಿಖೆಯಲ್ಲಿ ಪರಸ್ಪರ ಸಹಕರಿಸುವ ಬಗ್ಗೆಯೂ ಮಾತುಕತೆ ವೇಳೆ ಪ್ರಸ್ತಾಪಿಸಲಾಯಿತು ಎನ್ನಲಾಗಿದೆ.
