ವಾಷಿಂಗ್ಟನ್: ಇಸ್ಲಾಮಿಕ್ ಉಗ್ರರು ಅಣ್ವಸ್ತ್ರ ಹೊಂದಿರುವ ಪಾಕಿಸ್ತಾನದ ಮೇಲೆ ನಿಯಂತ್ರಣ ಹೊಂದುವ ಗುರಿಯಿಟ್ಟುಕೊಂಡಿದ್ದಾರೆಂದು ಒಬಾಮಾ ಆಡಳಿತಕ್ಕೆ ಕಿವಿ ಮಾತು ಹೇಳಿರುವ ಅಮೆರಿಕದ ಮಾಧ್ಯಮಗಳು ತಾಲಿಬಾನ್ಗಳನ್ನು ಮಟ್ಟ ಹಾಕುವ ಉದ್ದೇಶದಿಂದ ಅಮೆರಿಕ ಹಿಂದೆ ಸರಿದರೆ ಅದು ಅಮೆರಿಕ ಮತ್ತು ಅದರ ಮಿತ್ರ ರಾಷ್ಟ್ರಗಳಿಗೆ ದೊಡ್ಡ ತಿರುಗೇಟಾಗಬಹುದೆಂದು ಅಭಿಪ್ರಾಯಪಟ್ಟಿವೆ.
ಒಂದು ಕಾಲದಲ್ಲಿ ತಾಲಿಬಾನ್ಗಳ ವಿರುದ್ಧ ದಾಳಿ ನಡೆಸಲು ಹಿಂಜರಿಯುತ್ತಿದ್ದ ಪಾಕಿಸ್ತಾನ ಸೇನೆ ಈಗ ವಾಝಿರಿಸ್ತಾನದಲ್ಲಿ ದಾಳಿ ನಡೆಸಲು ಸಿದ್ಧತೆ ನಡೆಸಿದೆ. ಇದನ್ನು ಸ್ವಾಗತಿಸುತ್ತಿರುವ ಒಬಾಮ ಆಡಳಿತ ಮಾತ್ರ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ಗಳನ್ನು ಸೋಲಿಸುವ ತನ್ನ ತಂತ್ರದಿಂದ ಹಿಂದೆ ಸರಿಯು ತಂತ್ರವೊಂದರ ಬಗ್ಗೆ ಚಿಂತಿಸುತ್ತಿದೆ ಎಂದು ವಾಷಿಂಗ್ಟನ್ ಪೋಸ್ಟ್ ವರದಿ ಮಾಡಿದೆ.
ಈ ಬಗೆಯ ತಂತ್ರವೊಂದರನ್ನು ಬಳಸುವುದರಿಂದ ತಾಲಿಬಾನ್ಗಳ ವಿರುದ್ಧ ಸಾವನ್ನೂ ಲೆಕ್ಕಿಸದೇ ಹೋರಾಡುತ್ತಿರುವ ಅಮೆರಿಕನ್ ಸೈನಿಕರಿಗೆ ಗೆಲ್ಲುವ ಅವಕಾಶವೇ ಕೊಡದೆ ಹೀಗಳೆದಂತಾಗುತ್ತದೆ. ಮಾತ್ರವಲ್ಲ ಜಿಹಾದಿಗಳ ವಿರುದ್ಧ ಪಾಕಿಸ್ತಾನ ನಡೆಸುತ್ತಿರುವ ಹೋರಾಟಕ್ಕೂ ಅಡ್ಡಿಯಾಗುತ್ತದೆ ಎಂದು ವಾಷಿಂಗ್ಟನ್ ಪೋಸ್ಟ್ ಅಭಿಪ್ರಾಯಪಟ್ಟಿದೆ.
ಕಳೆದ ಕೆಲವು ದಿನಗಳಿಂದ ತಾಲಿಬಾನ್ ಮತ್ತು ಪಾಕಿಸ್ತಾನಿ ಸೇನೆಯ ನಡುವೆ ನಡೆಯುತ್ತಿರುವ ಘರ್ಷಣೆ ಒಂದು ಪೂರ್ಣ ಪ್ರಮಾಣದ ಯುದ್ಧದ ಮಟ್ಟಕ್ಕೆ ತಲುಪಿದೆ ಎಂದಿರುವ ವಾಷಿಂಗ್ಟನ್ ಪೋಸ್ಟ್ ಕಳೆದ ಒಂದು ವಾರದಲ್ಲಿ ನಡೆದಿರುವ ನಾಲ್ಕು ದೊಡ್ಡ ಪ್ರಮಾಣದ ದಾಳಿಗಳು ತಾಲಿಬಾನ್ಗಳು ತಮ್ಮ ಶಕ್ತಿಯನ್ನು ಹೆಚ್ಚಿಸಿಕೊಂಡಿರುವ ಸೂಚನೆ. ಅಷ್ಟೇ ಅಲ್ಲ ತಾಲಿಬಾನ್ ಕೇವಲ ಬುಡಕಟ್ಟು ಸಮುದಾಯಗಳಿರುವ ಪಷ್ತೂನ್ ಪ್ರದೇಶಗಳನ್ನು ನಿಯಂತ್ರಿಸುವುದರಲ್ಲಿ ತೃಪ್ತಿ ಕಾಣುತ್ತಿಲ್ಲ. ಅದು ಅಣ್ವಸ್ತ್ರ ಹೊಂದಿರುವ ಪಾಕಿಸ್ತಾನದ ಮೇಲೆ ನಿಯಂತ್ರಣ ಹೊಂದುವ ಅಭಿಲಾಷೆಯನ್ನು ಹೊಂದಿರುವಂತಿತೆದೆ ಎಂದಿದೆ.
