ಮುಂಬೈ (ಪಿಟಿಐ): ಅಂತರರಾಷ್ಟ್ರೀಯ ಅಣುಶಕ್ತಿ ಸಂಸ್ಥೆಯ (ಐಎಇಎ) ಸುರಕ್ಷತಾ ಸುಪರ್ದಿಗೆ ಒಳಪಡಿಸಲಾಗುವ ಅಣು ವಿದ್ಯುತ್ ಸ್ಥಾವರಗಳನ್ನು ಗುರುತಿಸುವ ಯೋಜನೆಗೆ ಭಾರತ ಸಮ್ಮತಿ ಸೂಚಿಸಿದೆ.

ಗುರುವಾರ ರಾತ್ರಿ ಈ ಮಹತ್ವದ ನಿರ್ಧಾರಕ್ಕೆ ಬರುವ ಮೂಲಕ ಪ್ರಧಾನಿ ಮನಮೋಹನ್ ಸಿಂಗ್ ಅವರು ಅಮೆರಿಕಕ್ಕೆ ಭೇಟಿ ನೀಡುವ ತಿಂಗಳ ಮೊದಲೇ ಅಗತ್ಯದ ವಿಧಿವಿಧಾನವನ್ನು ಭಾರತ ಪೂರೈಸಿದಂತಾಗಿದೆ.

ಈ ಯೋಜನೆಯಂತೆ 2014ರೊಳಗೆ ದೇಶದಲ್ಲಿನ 22 ಅಣು ಸ್ಥಾವರಗಳ ಪೈಕಿ 14 ಸ್ಥಾವರಗಳನ್ನು ಐಎಇಎ ಸುರಕ್ಷತಾ ಸುಪರ್ದಿಗೆ ಒಪ್ಪಿಸಬೇಕಾಗುತ್ತದೆ.   ಭಾರತ ತನ್ನ ಅಣು ಸ್ಥಾವರಗಳನ್ನು ಗುರುತಿಸುವ ಮೂಲಕ ಅಂತರರಾಷ್ಟ್ರೀಯ ನಾಗರಿಕ ಪರಮಾಣು ಸಹಕಾರ ಒಪ್ಪಂದ ಜಾರಿಗೆ ಬರುವುದಕ್ಕೆ ಅನುವು ಮಾಡಿದಂತಾಗಿದೆ ಎಂದು ಅಣು ಶಕ್ತಿ ಇಲಾಖೆ ಮೂಲಗಳು ತಿಳಿಸಿವೆ.

ಭಾರತಕ್ಕೆ ನಿರ್ದಿಷ್ಟವಾದ ಪರಮಾಣು ಸುರಕ್ಷತಾ ಒಪ್ಪಂದಕ್ಕೆ (ಐಎಸ್‌ಎಸ್‌ಎ) 35 ಸದಸ್ಯರ ಗವರ್ನರ್‌ಗಳ ಮಂಡಳಿ ಒಪ್ಪಿಗೆ ಸೂಚಿಸಿದ 14 ತಿಂಗಳ ಬಳಿಕ ಈ ಬೆಳವಣಿಗೆ ನಡೆದಿದೆ.

ಒಬಾಮಾ ಆಡಳಿತದ ಅವಧಿಯಲ್ಲಿನ ಪ್ರಧಾನಿ ಸಿಂಗ್ ಅವರ ಪ್ರಥಮ ಅಮೆರಿಕ ಭೇಟಿ ನವೆಂಬರ್ 23ರಂದು ಆರಂಭವಾಗಲಿದ್ದು, ಭಾರತ-ಅಮೆರಿಕ ನಾಗರಿಕ ಪರಮಾಣು ಒಪ್ಪಂದವನ್ನು ಜಾರಿಗೆ ತರುವುದು ಅವರ ಪ್ರಥಮ ಆದ್ಯತೆಯಾಗಿದೆ.

ದೇಶೀಯವಾಗಿ ಅಭಿವೃದ್ಧಿಪಡಿಸಲಾದ ರಾಜಸ್ತಾನ ಅಣು ವಿದ್ಯುತ್ ಸ್ಥಾವರದ (ಆರ್‌ಎಪಿಎಸ್) ತಲಾ 220 ಮೆಗಾವಾಟ್ ಸಾಮರ್ಥ್ಯದ 5 ಮತ್ತು 6ನೇ ಘಟಕಗಳು ಗುರುವಾರ ಔಪಚಾರಿಕವಾಗಿ ಐಎಸ್‌ಎಸ್‌ಎನ ಸುಪರ್ದಿಗೆ ಒಪ್ಪಿಸಲಾಯಿತು. 

ಹೈದರಾಬಾದ್‌ನ ಪರಮಾಣು ಇಂಧನ ಸಂಕೀರ್ಣದಿಂದ ಈ ಘಟಕಗಳಿಗೆ ಯುರೇನಿಯಂ ಸಾಗಿಸುವ ಪ್ರಕ್ರಿಯೆಯನ್ನು ಐಎಇಎ ಸೂಕ್ಷ್ಮವಾಗಿ ಗಮನಿಸಲಿದೆ. ಈ ಸ್ಥಾವರಗಳು ಡಿಸೆಂಬರ್‌ನಲ್ಲಿ ಕಾರ್ಯಾರಂಭ ಮಾಡಲಿದ್ದು, ಐಎಇಎ ವೀಕ್ಷಕರು ಅಲ್ಲಿ ಈಗಾಗಲೇ ಕ್ಯಾಮರಾಗಳನ್ನು ಅಳವಡಿಸಿದ್ದಾರೆ.

ಐಐಇಎ ಈಗಾಗಲೇ ತಾರಾಪುರದ 1-2 ಘಟಕಗಳು, ಆರ್‌ಎಪಿಎಸ್‌ನ 1-2 ಘಟಕಗಳು, ಕಂದನ್‌ಕೊಳಂನ 1-2 ಘಟಕಗಳನ್ನು ಐಎಸ್‌ಎಸ್‌ಎ ಸುಪರ್ದಿಗೆ ಒಳಪಡಿಸುವ ಪ್ರಕ್ರಿಯೆಯಲ್ಲಿ ತೊಡಗಿದೆ.

ಆರ್‌ಎಪಿಎಸ್‌ನ 3-4ನೇ ಸ್ಥಾವರಗಳನ್ನು 2010ರಲ್ಲಿ, ಕಾಕ್ರಪಾರ ಅಣುವಿದ್ಯುತ್ ಸ್ಥಾವರದ 2 ಘಟಕಗಳನ್ನು 2012ರಲ್ಲಿ ಹಾಗೂ ನರೋರಾ ಅಣು ವಿದ್ಯುತ್ ಸ್ಥಾವರದ 2 ಘಟಕಗಳನ್ನು 2014ರಲ್ಲಿ  ಐಎಇಎ ಸುಪರ್ದಿಗೆ ಒಳಪಡಿಸಲು ಭಾರತ ನಿರ್ಧರಿಸಿದೆ.

ಅಣು ಸ್ಥಾವರಗಳನ್ನು ಪ್ರತ್ಯೇಕಿಸುವ ಯೋಜನೆಯಂತೆ ಭಾರತವು ತನ್ನ ಪ್ರಮುಖ ವ್ಯೆಹರಚನಾ ಪ್ರಯೋಗಾಲಯ ಭಾಭಾ ಪರಮಾಣು ಸಂಶೋಧನಾ ಕೇಂದ್ರದೊಳಗೆ ಇರುವ ಸಿಐಆರ್‌ಯುಎಸ್ ಸಂಶೋಧನಾ ಘಟಕವನ್ನು 2010ರಲ್ಲಿ ಮುಚ್ಚಲಿದೆ.