ನವದೆಹಲಿ (ಪಿಟಿಐ): ದೇಶಿ ವಿಮಾನ ಪ್ರಯಾಣ ದರವು ಮುಂದಿನ ಮೂರು ದಿನಗಳ ಕಾಲ (ಸೆ. 18ರವರೆಗೆ) ಶೇ 50ರಷ್ಟು ಅಗ್ಗವಾಗಿರಲಿದೆ.

ಈ ಪ್ರಯಾಣ ದರ ಸಮರದಲ್ಲಿ ಖಾಸಗಿ ವಿಮಾನ ಯಾನ ಸಂಸ್ಥೆಗಳು ಮತ್ತು ಸರ್ಕಾರಿ ಒಡೆತನದ ಏರ್ ಇಂಡಿಯಾ ಭಾಗಿಯಾಗಿವೆ. ಕಳೆದ ವಾರ ಪೈಲಟ್‌ಗಳ ಮುಷ್ಕರ ಕಂಡ ಜೆಟ್ ಏರ್‌ವೇಸ್, ಪ್ರಯಾಣಿಕರ ಮನವೊಲಿಸಲು ಈ ತಿಂಗಳ 18ರವರೆಗೆ ಪ್ರಯಾಣ ದರದಲ್ಲಿ ಶೇ 50ರಷ್ಟು ರಿಯಾಯ್ತಿ ಘೋಷಿಸಿದೆ.

ಏಐ: ಈ ಪ್ರಯಾಣ ದರ ಸಮರದಲ್ಲಿ, ರಾಷ್ಟ್ರೀಯ ವಿಮಾನಯಾನ ಸಂಸ್ಥೆ ಏರ್ ಇಂಡಿಯಾ ಕೂಡ ಭಾಗಿಯಾಗಿದೆ. ಆಯ್ದ ಮಾರ್ಗಗಳ ನಿರ್ದಿಷ್ಟ ವಿಮಾನಗಳಲ್ಲಿ ‘ಏಐ’ ಪ್ರಯಾಣ ದರಗಳನ್ನು  ಶೇ20ರಿಂದ 46ರಷ್ಟು ಕಡಿತಗೊಳಿಸಿದೆ.

ದೆಹಲಿ - ಬೆಂಗಳೂರು ಮಾರ್ಗದಲ್ಲಿ ಎರಡು ವಿಮಾನಗಳ ದರ ರೂ 3,229 ಇರಲಿದೆ. ಈ ಕೊಡುಗೆಯ ಬುಕಿಂಗ್ ಸೆ. 17ರವರೆಗೆ ನಡೆಯಲಿದೆ.