ಯುಕ್ಸಾಮ್
ರಾಜ್ಯ: ಸಿಕ್ಕಿಂ

ಸಿಕ್ಕಿಂನಲ್ಲಿ ಬೌದ್ಧರ ಪವಿತ್ರ ತಾಣಗಳಲ್ಲಿ ಒಂದು ಯುಕ್ಸಾಮ್. ಇದು ರಾಜ್ಯದ ಮೊದಲ ರಾಜಧಾನಿಯೂ ಹೌದು. ಸಮುದ್ರ ಮಟ್ಟದಿಂದ 1780 ಮೀಟರ್ ಎತ್ತರದಲ್ಲಿರುವ ಈ ಪ್ರದೇಶಕ್ಕೆ ಈ ಹೆಸರು ಬರಲು ಐತಿಹಾಸಿಕ ಕಾರಣ ಇದೆ. ‘ಯುಕ್ಸಾಮ್’ ಎಂದರೆ ಮೂವರು ಲಾಮಾಗಳ ಭೇಟಿಯ ಸ್ಥಳ ಎಂದರ್ಥ. ಕ್ರಿ.ಶ. 1641ರಲ್ಲಿ ಸಿಕ್ಕಿಂನ ಚಗ್ಯಾಲ್ ದೊರೆ ಸಿಂಹಾಸನಾರೂಢನಾದ ಸ್ಥಳ ಇದು. ಮೂವರು ಪ್ರಮುಖ ಲಾಮಾಗಳು ಇಲ್ಲಿ ಸೇರಿ ರಾಜನಿಗೆ ಪಟ್ಟಾಭಿಷೇಕ ಮಾಡಿದ್ದರು. ಅದಕ್ಕೆ ಕುರುಹು ಎಂಬಂತೆ ಇಲ್ಲಿ ಈಗಲೂ ಕಲ್ಲಿನ ಆಸನಗಳು ಮತ್ತು ಮುಖ್ಯ ಲಾಮಾ ಅವರ ಹೆಜ್ಜೆ ಗುರುತನ್ನು ನೋಡಬಹುದು. ಈ ಎಲ್ಲ ಕಾರಣಕ್ಕೆ ಸಿಕ್ಕಿಂನ ಬೌದ್ಧರ ನಾಗರಿಕತೆಯ ತೊಟ್ಟಿಲು ಎಂಬ ಖ್ಯಾತಿಯೂ ಈ ಸ್ಥಳಕ್ಕೆ ಇದೆ.

ಈ ರಾಜಮನೆತನವನ್ನು ಸ್ಥಾಪಿಸಿದಾತ ಫುಂಟ್‌ಸಾಕ್ ನಂಗ್ಯಾಲ್. ಆತನ ರಾಜ್ಯ ಈಗಿನ ಸಿಕ್ಕಿಂನಷ್ಟೇ ದೊಡ್ಡದಿತ್ತು. 1670ರಲ್ಲಿ ಆತನ ಪುತ್ರ ತೆನ್‌ಸಂಗ್ ನಂಗ್ಯಾಲ್ ರಾಜಧಾನಿಯನ್ನು ಯುಕ್ಸಾಮ್‌ನಿಂದ ರಬ್‌ಡೆಟ್ಸೆಗೆ ಸ್ಥಳಾಂತರಿಸಿದ.
ಯುಕ್ಸಾಮ್‌ನಿಂದ ಒಂದು ಗಂಟೆ ಚಾರಣ ನಡೆಸಿದರೆ ದುಬ್ಡಿ ಬೌದ್ಧವಿಹಾರ ಸಿಗುತ್ತದೆ. ಇದಕ್ಕೆ 300 ವರ್ಷಗಳ ಇತಿಹಾಸ ಇದೆ. ಇಲ್ಲಿಂದ 9 ಕಿ.ಮೀ. ದೂರದಲ್ಲಿ ಫಮ್‌ರಾಂಗ್ ಜಲಪಾತ ಇದ್ದು, ಹತ್ತಿರದ ಸೇತುವೆಯಿಂದ ಈ ಜಲಪಾತದ ನಯನ ಮನೋಹರ ದೃಶ್ಯವನ್ನು ಸವಿಯಬಹುದು. ಇಲ್ಲಿಗೆ ಸಮೀಪದ ಕಾರ್ಟೊಕ್ ಸರೋವರವೂ ಮನಮೋಹಕ.  ಹಿಮಾಲಯದಲ್ಲಿ ಚಾರಣ ಕೈಗೊಳ್ಳುವ ಆಸಕ್ತರಿಗೆ ಯುಕ್ಸಾಮ್ ಒಂದು ಮೂಲ ಶಿಬಿರವೂ ಹೌದು.

ಪ್ರಕೃತಿ ಪ್ರಿಯರು, ನಗರದ ಜಂಜಡಗಳಿಂದ ಒಂದಿಷ್ಟು ದಿನ ದೂರ ಇದ್ದು ಮನಸ್ಸಿಗೆ ನೆಮ್ಮದಿ ತಂದುಕೊಳ್ಳಲು ಬಯಸುವವರಿಗೆ ಇದೊಂದು ಸೂಕ್ತ ಸ್ಥಳ. ತಾಶಿಡಿಂಗ್ ಅಥವಾ ಪೆಲ್ಲಿಂಗ್‌ನಿಂದ ಯುಕ್ಸಾಮ್‌ಗೆ ತೆರಳಬಹುದು. ತಾಶಿಡಾಂಗ್‌ನಿಂದ ದಟ್ಟ ಅರಣ್ಯದ ಮೂಲಕ ಇಲ್ಲಿಗೆ ತೆರಳಬೇಕಿದ್ದು, ಇದೊಂದು ವಿಶಿಷ್ಟ ಅನುಭವ ನೀಡುವ ಪ್ರಯಾಣ. ಗೇಜಿಂಗ್‌ನಿಂದ ಇಲ್ಲಿಗೆ 43 ಕಿ.ಮೀ.