ಅಂಕಾರಾ (ಎಎಫ್‌ಪಿ): ಟರ್ಕಿ ರಾಜಧಾನಿ ಅಂಕಾರಾ ನಗರದ ಜನನಿಬಿಡ ಪ್ರದೇಶದಲ್ಲಿ ಸಂಭವಿಸಿದ ಆತ್ಮಾಹುತಿ ಕಾರ್ ಬಾಂಬ್‌ ದಾಳಿಯಲ್ಲಿ ಕನಿಷ್ಠ 37 ಜನರು ಮೃತಪಟ್ಟಿದ್ದು, 125 ಮಂದಿ ಗಾಯಗೊಂಡಿದ್ದಾರೆ.
‘ಕಿಜಿಲೆ ಚೌಕಕ್ಕೆ ಸಮೀಪದ ಬಸ್‌ ನಿಲ್ದಾಣದ ಸಮೀಪ ಭಾನುವಾರ ಬೆಳಿಗ್ಗೆ 6.45ರ ಸುಮಾರಿಗೆ ಸ್ಫೋಟ ನಡೆಸಲಾಗಿದೆ. ದಾಳಿಯ ತೀವ್ರತೆಗೆ ಹಲವು ಬಸ್‌ಗಳು ಭಸ್ಮಗೊಂಡಿವೆ. ಅಂಗಡಿಗಳು ಸಹ ಹಾನಿಗೊಂಡಿವೆ’ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.
‘ಕಳೆದ ಐದು ತಿಂಗಳಲ್ಲಿ ಅಂಕಾರಾದಲ್ಲಿ ನಡೆದ ಐದನೇ ದಾಳಿ ಇದಾಗಿದೆ. ಈ ಪ್ರದೇಶದ ಸಮೀಪದಲ್ಲೇ ಪ್ರಧಾನಿ ಅವರ ಕಚೇರಿ, ಸಂಸತ್ತು ಮತ್ತು ವಿವಿಧ ದೇಶಗಳ ರಾಯಭಾರ ಕಚೇರಿಗಳಿವೆ’ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಇದುವರೆಗೆ ಯಾವುದೇ ಗುಂಪು ದಾಳಿಯ ಹೊಣೆ ವಹಿಸಿಕೊಂಡಿಲ್ಲ. ಆದರೆ ಪ್ರಧಾನಿ ಅಹ್ಮತ್ ದವುತೊಗ್ಲು, ‘ದಾಳಿಗೆ ಯಾವ ಗುಂಪು ಕಾರಣ ಎಂಬ ಮಾಹಿತಿ ಇದ್ದು, ತನಿಖೆ ಪ್ರಗತಿಯಲ್ಲಿದೆ. ಶೀಘ್ರವೇ ಯಾರೆಂಬುದನ್ನು ಬಹಿರಂಗಪಡಿಸಲಾಗುವುದು’ ಎಂದು ಹೇಳಿದ್ದಾರೆ.
