ಪರಿಸರವೆಂದರೆ....

ಪರಿಸರವೆಂದರೆ ಏನೋ ನರಹರಿ
ಹೇಳೋ ಸರಸರನೆ
ಈಗಲೆ ಹೇಳುವೆ ಕೇಳೇ ಶುಭಕರಿ
ತಿಳಿಯೇ ಬಿರಬಿರನೆ

ನಾನು ನೀನು ಅಪ್ಪ ಅಮ್ಮ
ಇಡೀ ನಮ್ಮ ಮನೆ
ಪ್ರಾಣಿ ಪಕ್ಷಿ ಗಿಡವು ಮರವು
ಏಡಿ ಕಪ್ಪೆ ಹಾವೂನೇ

ನೆಲವು ಗಾಳಿಯು ನೀರೂ
ಬೆಂಕಿ ಆಕಾಶ
ಸಾಲು ಸಾಲು ಜಗತ್ತಿಗೆಲ್ಲ
ಪರಿಸರವೇ ಅವಕಾಶ

ನಮಗೂ ಪ್ರಾಣಿಗು ನೆಲಕೂ ಜೀವಕು
ಎಲ್ಲಕು ಇದೆ ಸಂಬಂಧ
ಆಕಾಶಕ್ಕು ವಾಯುದೇವನಿಗೂ
ಬಿಡಿಸಲಾಗದ ಅನುಬಂಧ

ಸಹಕರಿಸುತ್ತ ಒಬ್ಬರಿಗೊಬ್ಬರು
ಉಳಿಸಲೆಬೇಕು ಸಮತೋಲ
ಪರಿಸರವನ್ನು ಮಲಿನಗೊಳಸದೆ
ಇದ್ದರೆ ಉಳಿವುದು ಜೀವಜಾಲ