PHOTOS: ಬಿಸಿಲ ಸಂಗಡ ಬದುಕು..

ಕಲ್ಯಾಣ ಮತ್ತು ಕಿತ್ತೂರು ಕರ್ನಾಟಕದಲ್ಲಿ ಸುಡುವ ಬಿಸಿಲು, ಬೆವರು, ಬಾಯಾರಿಕೆ, ಗರಂ ಚಹಾ ಮತ್ತು ಮಿರ್ಚಿ ಬಜ್ಜಿ ಎಲ್ಲವೂ ಸಹಜ ಜೀವನದ ಭಾಗವೇ. ಗರಿಷ್ಟ ಉಷ್ಣಾಂಶ 45 ಡಿಗ್ರಿ ಸೆಲ್ಸಿಯಸ್‌ ಗಡಿ ದಾಟಿದರೂ ಬಿಸಿಗಾಳಿ ಸೂಸುವ ಬಿಸಿಲಿನ ಬಗ್ಗೆ ಚಿಂತಿಸುವುದಿಲ್ಲ, ಗೊಣಗುವುದಿಲ್ಲ, ಶಾಪ ಹಾಕುವುದಿಲ್ಲ. ನಡು ಮಧ್ಯಾಹ್ನದಲ್ಲೂ ‘ಬರ್ರೀ, ಚಹಾ ಕುಡಿಯೋಣ’ ಎನ್ನುವ ಆಹ್ವಾನ ಕೂಡ ಇಲ್ಲಿ ಸಹಜವೇ!

ಇಡೀ ವಾತಾವರಣ ಕಾದ ಕಾವಲಿಯಂತಾದರೂ ಬಜಾರ್‌ನಲ್ಲಿ ಖರೀದಿ ಭರಾಟೆ ಎಂದಿನಂತೆಯೇ ಇರುತ್ತದೆ. ಬಾಲಕರು, ಯುವಕರು ಗಲ್ಲಿ ಕ್ರಿಕೆಟ್‌ ಆಡುತ್ತಾ ಸಂಭ್ರಮಿಸುತ್ತಾರೆ. ಇಲ್ಲಿ ಸುಡು ಬಿಸಿಲಿನಲ್ಲೂ ಅವರ ದಿನಚರಿ ಎಂದಿನಂತೆ ಜರುಗುತ್ತದೆ. ಬಿಸಿಲಿನ ಝಳವನ್ನು ನಿರ್ಲಕ್ಷಿಸುವುದೊಂದೇ ಇವರಿಗೆ ಉಳಿದ ದಾರಿ. ಬಿಸಿಲನಾಡಿನಲ್ಲಿ ಬಿಸಿಲಿನೊಂದಿಗೆ ಸೆಣಸುವುದೇ ಕಲೆ.

ಸೂರ್ಯ ಕೆಂಡದುಂಡೆಯಾಗಿ ಬೆಂಕಿ ಉಗುಳುತ್ತಿದ್ದರೂ ಚಹಾದಂಗಡಿ ಮುಂದೆ ಗಿರಾಕಿಗಳಿಗೇನು ಬರವಿಲ್ಲ. ಚಹಾದ ಜೋಡಿ ಮಿರ್ಚಿ ಬಜ್ಜಿಯನ್ನು ಸವಿಯುವ ಸೊಗಸೇ ಬೇರೆ. ಬಿಸಿಲ ಬೇಗೆಯಲ್ಲೂ ಬಿಸಿಬಿಸಿ ಚಹಾ ಮತ್ತು ಮಿರ್ಚಿ ತಿನ್ನುವುದರ ಹಿಂದೆ ವೈಜ್ಞಾನಿಕ ವಿಶ್ಲೇಷಣೆ ಇದೆ. ಕಾರ ತಿಂದ ದೇಹ ಬೆವರು ಹರಿಸಿದಾಗ ಅದು ವಾಹನಗಳಲ್ಲಿ ರೇಡಿಯೇಟರ್‌ನಂತೆ ಕೆಲಸ ಮಾಡುತ್ತಾ ದೇಹವನ್ನು ತಂಪಾಗಿಸುವ ವ್ಯವಸ್ಥೆಗೆ ನೆರವಾಗುತ್ತದೆ ಎನ್ನುವುದು ವಿಜ್ಞಾನಿಗಳ ಅಭಿಮತ.

ಮೇ ತಿಂಗಳಲ್ಲಿ ಸುಡುವ ಬಿಸಿಲೇ ಬೇರೆ. ಮುಂಜಾನೆಯಿಂದ ರಾತ್ರಿಯವರೆಗೆ ಬೆಂದ ಭೂಮಿಯಿಂದ ಭುಗಿಲೇಳುವ ಹಬೆ. ಈ ಭಾಗದಲ್ಲಿ ಬಿಸಿಲಿನದೇ ಮೇಲುಗೈ. ಅದರೊಂದಿಗೆ ಹೊಂದುಕೊಂಡು ಬದುಕುವುದು ಜಾಣತನ. ಏನಾದರೇನಂತೆ, ಬಿಸಿಲುನಾಡಿನಲ್ಲಿ ಬಿಸಿಲು ಗೆಲ್ಲಲೇಬೇಕಲ್ಲ...

ಕಲಬುರಗಿ ‘ಪ್ರಜಾವಾಣಿ’ಯ ಹಿರಿಯ ಪತ್ರಿಕಾ ಛಾಯಾಗ್ರಾಹಕ ತಾಜುದ್ದೀನ್‌ ಆಜಾದ್‌ ಕಟ್ಟಿಕೊಟ್ಟ ಚಿತ್ರ–ಕಥೆ ಇಲ್ಲಿದೆ ನೋಡಿ...