ಪಿಕ್ಚರ್ ಪ್ಯಾಲೆಸ್: ವಿಧಾನಸೌಧವೆಂಬ ಬೆರಗು!

ಶಕ್ತಿಕೇಂದ್ರ ವಿಧಾನಸೌಧವನ್ನು ಜೀವನದಲ್ಲಿ ಒಮ್ಮೆಯಾದರೂ ನೋಡಿ ಕಣ್ತುಂಬಿಕೊಳ್ಳಬೇಕು ಎಂಬ ಮಹದಾಸೆ ಬೆಂಗಳೂರಿಗೆ ಬರುವ ಕೆಲವರಲ್ಲಿಯಾದರೂ ಇದ್ದೇ ಇರುತ್ತದೆ. ವಿಶಾಲವಾಗಿ ತಲೆಎತ್ತಿ ನಿಂತ ಈ ಸೌಧದ ಹಲವು ಅಂತಸ್ತುಗಳಲ್ಲಿ ನಾಡಿನ ಆಡಳಿತದ ನಾಡಿಗಳು ಹರಡಿಕೊಂಡಿವೆ. ದ್ರಾವಿಡ ವಾಸ್ತುಶೈಲಿಯಲ್ಲಿರುವ ಇದರ ವಿನ್ಯಾಸ, ಆಕಾರ, ವಿಶಿಷ್ಟತೆಯಿಂದ ಈ ಸೌಧ ಸೂಜಿಗಲ್ಲಿನಂತೆ ಜನರನ್ನು ಸೆಳೆಯುತ್ತಲೇ ಇದೆ. 

ಬೆಂಗಳೂರಿಗೆ ಬಂದು ವಿಧಾನಸೌಧದ ಮುಂದೆ ನಿಂತು ಹಲ್ಲುಕಿರಿದು, ಫೋಟೋ ತೆಗೆಸಿಕೊಂಡರಷ್ಟೆ ಬೆಂಗಳೂರಿನ ಭೇಟಿ ಪೂರ್ಣಗೊಳ್ಳುವುದು. ಅಲ್ಲಿಯೇ ತುಸು ಅಡ್ಡಾಡ್ಡಿ, ನಮ್ಮೂರಿನಿಂದ ಆಯ್ಕೆಯಾದ ಜನಪ್ರತಿನಿಧಿಗಳು ಈ ಸೌಧದ ಯಾವ ಅಂತಸ್ತಿನಲ್ಲಿರಬಹುದು?, ನಮ್ಮೂರಿನ  ‘ಆ ದೊಡ್ಡ ಜನ’ದ ಕಚೇರಿ ಎಲ್ಲಿರಬಹುದು? ಎಂದೆಲ್ಲ ಲೆಕ್ಕಾಚಾರ ಹಾಕುವಾಗ, ಮೂಗಿಗೆ ಘಮ್ಮೆಂದು ಅಡರುವ ಪಾನಿಪೂರಿ, ಮಸಾಲಪೂರಿ, ಉಪ್ಪುಖಾರ ಸವರಿದ ಮಾವಿನಕಾಯಿ, ಬಗೆಯ ಬಗೆಯ ಐಸ್‌ಕ್ಯಾಂಡಿಗಳ ಸ್ವಾದವನ್ನು ನೋಡಲು ನಾಲಿಗೆ ಇನ್ನಿಲ್ಲದಂತೆ ಚಡಪಡಿಸುತ್ತದೆ. 

ಈ ಕಡೆ ಶಾಸಕಾಂಗವನ್ನು ಪ್ರತಿನಿಧಿಸುವ ವಿಧಾನಸೌಧ, ಆ ಕಡೆ ನ್ಯಾಯಾಂಗ ವ್ಯವಸ್ಥೆಯನ್ನು ಬಿಂಬಿಸುವ ಹೈಕೋರ್ಟ್‌. ಇಲ್ಲೆಲ್ಲ ಸುತ್ತಾಡಿ ತುಸು ವಿರಮಿಸಲು ಕಬ್ಬನ್‌ ಉದ್ಯಾನ. ಒಟ್ಟಾರೆ ವಾರಾಂತ್ಯದ ಪಿಕ್ನಿಕ್‌ಗೆ ಪರಿಪೂರ್ಣ ತಾಣವಾಗಿಯೂ ಜನರಲ್ಲಿ ಅಚ್ಚೊತ್ತಿರುವ ಈ ‘ಪ್ರಭಾವಿ’  ಪ್ರದೇಶದ ಆಯಾಕಟ್ಟಿನ ಸ್ಥಳಗಳೆಲ್ಲವೂ ಶ್ರೀಸಾಮಾನ್ಯರ ‘ಪಿಕ್ಚರ್‌ ಪರ್ಫೆಕ್ಟ್‌’ ತಾಣಗಳಾಗಿಯೂ ಪ್ರಸಿದ್ಧಿ ಪಡೆದುಕೊಂಡಿವೆ. ವಿಧಾನಸೌಧದ ಮುಂದೆ ನಿಂತು ಊದುಕೊಳವೆಯಿಂದ ನೀರಿನ ಗುಳ್ಳೆಯನ್ನು ಹರಿಬಿಡುವ ಪೋರಿ, ಅಧಿಕಾರವೆಂಬುದು ನೀರ ಮೇಲಿನ ಗುಳ್ಳೆಯಂತೆ! ಎಂದೂ ಪರೋಕ್ಷವಾಗಿ ಹೇಳುತ್ತಿರುವಂತೆ ಭಾಸವಾಗುತ್ತದೆ. ಕರ್ಚೀಫು, ಬನಿಯನ್‌ಗಳ ಮಾರಾಟಕ್ಕೂ ಇಲ್ಲಿದೆ ಜಾಗ.