ಚನ್ನಪ್ಪ ಅಂಗಡಿ ಅವರ ಕವನ: ದ್ವಿಜ...

ಅವ್ವನ ಇನ್ನೊಂದು ಹೆಸರೇ ಬೂಬು
ಆಗ.
ಈಗ,
ಬೆಳೆದು ನಿಂತವನು
ಕಳೆದುಕೊಂಡವನು
ತಿಳಿದುಕೊಂಡವನು
ಹೊಸ್ತಿಲ ಒಳಗಿನದನ್ನು
ತಿಳಿಯದ ಕತ್ತಲನ್ನು
ಗೋಡೆಯ ಆಚೆಯನ್ನು
ಆಚೆಯ ಈಚೆಯನ್ನು

ಒಂದೊಂದು ಬಣ್ಣಕೆ
ಒಂದೊಂದು ಅರ್ಥ
ಒಂದೊಂದು ಬದಿಗೆ
ಒಂದೊಂದು ಪಂಥ
ಒಂದೊಂದು ದಿಕ್ಕಿಗೆ
ಒಂದೊಂದು ಗುಮಾನಿ
ಹಿಂದೆಂದೂ ಹೊಳೆಯದ
ಆ ಈ ಅಕ್ಷರಗಳು

ಮುಂದೆಂದೋ ಧುತ್ತೆಂದು
ನಾಮರೂಪ ಪಡೆದು
ನಾನು ಬೇರೆ ನೀನು ಬೇರೆ
ಬೂಬು ಬೇರೆ ಅವ್ವ ಬೇರೆ
ಜಾತಿಯಿಂದ ಜಾತಕದಿಂದ
ನೀತಿಯಿಂದ ಸೂತಕದಿಂದ

ಬಿಸಿ ರಕ್ತ ಹಸಿ ರಕ್ತ
ಬಿಳಿ ರಕ್ತ ಇಳಿ ರಕ್ತ
ಕಣ್ಣು ಮಂಜು ಕೈಯ ಪಂಜು
ಕಣ್ಣುಗಳೆರಡು
ಬಿಂಬ
ಒಂದು
ಅವ್ವನಾಗಲು ಸಾಧ್ಯವಿಲ್ಲ ಸಾಬರ ಬೂಬು
ಎಂಬುದಕೆ ಹುಡುಕಬೇಕಾಗಿದೆ ಸಬೂಬು

ಯುಗಧರ್ಮ...

ಚೈತ್ರ ಚಿಗುರು ಸೊಬಗಿನ ಮುನ್ನುಡಿಯು ಯುಗಾದಿ ಹಬ್ಬ
ಮಾವುಬೇವು ತಳಿರುತೋರಣ ಕುಣಿಸುತಿವೆ ಖುಷೀಲಿ ಹುಬ್ಬ
ದೇವ-ದಿಂಡಿರು ಪೂಜೆ-ಪುನಸ್ಕಾರ ನಾಡತುಂಬ ಸಾಲುಹಬ್ಬ
ಪ್ರಕೃತಿಯನು ಪೂಜಿಸುವುದು ಯುಗಾದಿಯೆಂಬ ಹಾಡುಗಬ್ಬ |

ಸುಡುವ ಸೂರ್ಯನ ಕಂಡು ಕಡುನೋವನುಂಡ ಭೂಮಿ
ಅಗ್ನಿಜ್ವಾಲೆಯ ನುಂಗಿ ವಿರಮಿಸುತಲಿರುವ ಪರಮ ಸಂಯಮಿ
ನೆನೆದಂತೆ ಬರುತಿಹವು ತಿಥಿಗಳು ಅಷ್ಟಮಿ ನವಮಿ ದಶಮಿ
ಕೋಗಿಲೆಯ ಕೊರಳಲಿ ಬಂಧಿಯಾದಳು ಅಮರಪ್ರೇಮಿ |

ಪ್ರಭವ ವಿಭವ ಕ್ಷಯ ಅಕ್ಷಯ ಸರದಿಯಲಿ ಸಂವತ್ಸರ
ಹುಟ್ಟು ಸಾವು ಪ್ರಕೃತಿಯೊಲುಮೆ ಕಾಲವೆಂದು ನಿರಂತರ
ಪ್ರಮೋದ ವಿನೋದ ವಿಳಂಬಿ ವಿರೋಧ ತರತರ
ಬೇವುಬೆಲ್ಲ ನೋವುನಲಿವು ಏಳುಬೀಳು ಭವಾಂತರ |

ಗಿಡಗಿಡದಲು ಮುಗುಳು ಹೂಹೀಚುಕಾಯಿಯ ಒಗರು
ಅಡ್ಡಮಳೆಗೆ ಬಾಯ್ದೆರೆದ ಚರಾಚರಗಳಿಗೆಂತ ಪೊಗರು
ಬಿಸಿಲ ಬಿಸಿಯು ಮಳೆಯ ಹಸಿಯು ಜೀವಸ್ಫೂರ್ತಿ ಮರ್ಮ
ಬಾಳ ಹರಿವು ಬದುಕ ತಿರುವು ನಮ್ಮನಿಮ್ಮ ಯುಗಧರ್ಮ |