ದೀಪಾವಳಿ ಕವನ ಸ್ಪರ್ಧೆ–2024: ನದಿ ಹಾದಿ ತಪ್ಪಿದ್ದರೆ….!?

ನದಿ ಹಾದಿ ತಪ್ಪಿದ್ದರೆ

ಅನಾದಿಯ ದಾರಿ ಕರಗಿ

ಕಾಡು ಮಲಗಿ

ಪ್ರಾಣಿಗಳೆಲ್ಲ ಸೆರೆಯಾಗಿ

ಕೊನೆಗೊಮ್ಮೆ ಸಮಾಧಿಯಾಗಿ

ಋತುಗಳು ಎಗರಾಡಿ

ಬೈದು ಹೊಡೆದಾಡಿ

ಸಾಯುತ್ತಿದ್ದವು

ಹಕ್ಕಿಗಳು ಬಿಡಾರ

ಬದಲಿಸಿ ಪದೆ ಪದೆ

ಎಲ್ಲಿ ಬೇಕಂದಲ್ಲಿ ಬಿಳಿಲು

ಬಿಟ್ಟು ನಿಂತ ಮರ

ತೇಲಿ

ಯಾವ ಹರಕತ್ತು ಇಲ್ಲದೆ

ಶಕ್ತಿ ತೋರಿಸುವ ಆಟ

ಆಡುತ್ತಿತ್ತು ನೀರು

ಹಾದಿ ತಪ್ಪಿದ್ದರೆ ನದಿ

ಊರ ಹಿರಿಕಿರಿಯರೆಲ್ಲ

ಮಲಗಿಬಿಡುತ್ತಿದ್ದರು

ಬಾಗಿಲು ಬಡಿಯುತ್ತಿರುವವನ

ಗುರ್ತಿಸಲು ಸೋಲುತ್ತಿದ್ದವು

ಮುಚ್ಚಿದ ಮನೆಯ

ಚಿಲಕಗಳು

ತೀರದ ಹೆಜ್ಜೆ ಗುರುತುಗಳು

ತೀರಿ

ತೋಂಡಿ ಮಾತುಗಳೆಲ್ಲ

ಒದ್ದೆಯಾಗಿ

ಇದ್ದ ಬಿದ್ದ ಅಣೆಕಟ್ಟುಗಳೆಲ್ಲ

ರಸ್ತೆಯಾಗಿ

ಜನ ಸಂಚಾರ

ಮುಕ್ತ ಮುಕ್ತ

ನದಿ ಹಾದಿ ತಪ್ಪಿದರೆ

ಸಮುದ್ರ ಕಣ್ಣೀರಿಟ್ಟು

ಮತ್ತೂ ಉಪ್ಪು

ಆಸರಿಕೆ ನೀಗಲು

ಒದ್ದಾಡಿ

ಹಾದಿ ಕಾದು ಕಾದು

ಸಂಗಮ ಬರಿದಾಗಿ

ಸಮುದ್ರವೂ ಒಂಟಿ.

ಇಷ್ಟಾಗಿಯೂ ಒತ್ತಾಯವಾಗಿ

ನದಿ

ಹಾದಿ ತಪ್ಪಿಸಿದರೆ

ಹೊಸನೆಲದೊಡನೆ

ಹೊಂದಿಕೊಳ್ಳಲಾಗದ

ತಹತಹಿಕೆ

ಎದ್ದು

ರವಿಗೆ

ಸರ್ವಸ್ವ ಒಡ್ಡಿ

ಕೊನೆಗೊಂದು ದಿನ

ಸರಸ್ವತಿಯ ತಂಗಿಯಾಗಿ

ಬರಿಯ ಗೆರೆಗಳಾಗುತ್ತಿದ್ದವು

ನಕಾಶೆಯಲ್ಲಿ.

ಅಂತಿಮವಾಗಿ

ನದಿ ನೀರಿನಿಂದ ಮುಚ್ಚಿಹೋದ

ನೆಲದ ತುಂಡೊಂದು

ನನ್ನೊಳಗೂ ಇದೆ

ಅಂದುಕೊಂಡಾಗಲೇ

ಹಾದಿ ತಪ್ಪಿದ ನದಿಯೊಂದು

ಎಲ್ಲರೆದೆಯೊಳಗೂ

ಎಗ್ಗಿಲ್ಲದೆ

ಹರಿದಾಡಿದ್ದು.