ವೈ.ಕೆ.ಸಂಧ್ಯಾ ಶರ್ಮ ಅವರ ಕವನ: ಗಡಿಯಾರ ಕಳೆದುಹೋಗಿದೆ

ಗಡಿಯಾರ ಕಳೆದುಹೋಗಿದೆ

ನಮ್ಮ ಮನೆಯ ಅತ್ಯಮೂಲ್ಯ

ಜೀವದುಸುರಿನ

ಗಡಿಯಾರ ಕಳೆದುಹೋಗಿದೆ

ಅಸೀಮ-ಅಪೂರ್ವ

ಪರ್ಯಾಯವಿರದ ಅಸ್ಮಿತೆಯ

ಗಡಿಯಾರ ಕಳೆದುಹೋಗಿದೆ

ಪಾದರಸದ ಚುರುಕು

ಶಿಸ್ತಿಗನ್ವರ್ಥ ಬದುಕು

ಜಡ್ಡು - ಜಡತೆಗೆ ಜಾಗಟೆ

ಲಯದ ಬದುಕಿನ ಹಳಿಗೆ

ಸಾಮರಸ್ಯದ ತೂಕ

ಸುಸ್ಥಿತಿಯಲ್ಲಿದ್ದೂ ನಮ್ಮ

ಗಡಿಯಾರ ಕಳೆದುಹೋಗಿದೆ

ಕಾಲ ಚೌಕ್ಕಟಿನ ನಿಯತಿ

ಮೀರದ ಮಹತಿ

ನಿತ್ಯನೂತನ ಗಂಗೆ

ಕಸವಾಗಿ ಕೊಳೆಯದಂತೆ

ರಸವಾಗಿ ಹೊಮ್ಮಿಸುವ

ಚಿಗುರ ಜೀವಧಾತು

ಚೈತನ್ಯ ಪ್ರತಿಫಲನದ

ಗಡಿಯಾರ ಕಳೆದುಹೋಗಿದೆ

ಜೀವದ್ರವ್ಯದ ಸೊಗಡು

ಪರೋಪಕಾರಿಯ ಹೊಳಪು

ಗಡಿ ಹಾರದ ಸಂಯಮದ ಒನಪು

ಅತಿರೇಕವಿರದ ನಡೆ ನುಡಿಯ

ಟಿಕ್ ಟಿಕ್ ಎಂಬೋ

ಗಡಿಯಾರ ಕಳೆದುಹೋಗಿದೆ

ಕಳ್ಳತನದ ವಂಚನೆಗೆ

ದೂರು ನೀಡುವುದೆಲ್ಲಿ?

ಯಮನೂರ ವಿಳಾಸಕೆ

ಗಿರಕಿ ಹುಡುಕಾಟ

ವ್ಯರ್ಥ ಮೊರೆದಾಟ

ಸರ್ಪಗಾವಲ ಸುಪರ್ದಿನಲಿದ್ದೂ

ಗಡಿಯಾರ ಕಳೆದುಹೋಗಿದೆ

ಇಡಿಯಾಗಿ ಕಳೆದ ಗಡಿಯಾರ

ಬಿಡಿಯಾಗಿ ಚೆದುರಿಹೋಗಿದೆ

ಭಿನ್ನ ತುಣುಕುಗಳ ಬಣವೆ

ಅಸ್ತಿತ್ವ ಕರಗಿದ ನಮ್ಮ

ಗಡಿಯಾರ ಕಳೆದೇಹೋಗಿದೆ

ಅಗಮ್ಯ -ಅಗೋಚರ

ಮರಳು ಯತ್ನ

ಕರುಳ ಕುರುಹಿಲ್ಲ

ಎದೆಬಡಿತ ಸ್ತಬ್ಧ-ನಿಶ್ಶಬ್ದ

ನಿರ್ಜೀವ ಝರಿ – ನಿಷ್ಪಂದ

ಅಕ್ಕನೆಂಬೋ ಚಿನ್ನಲೇಪಿತ

ವಜ್ರ ಹರಳಿನ

ಗಡಿಯಾರ ಕಳೆದುಹೋಗಿದೆ.