ಓಡಿಸು ಪ್ಲಾಸ್ಟಿಕ್ ಭೂತ (ಮಕ್ಕಳ ಕವಿತೆ)

ಬಣ್ಣ ಬಣ್ಣದ ಭಿನ್ನ ಮಾಟದ
ಪ್ಲಾಸ್ಟಿಕ್ ಭೂತ ಬಂತಮ್ಮ

ಚಿನ್ನರ ಆಟಿಗೆ ಮನೆ ಸಾಮಾನಿಗೆ
ಕಾರಿಗೆ ಪ್ಲಾಸ್ಟಿಕ್ ಬೇಕಮ್ಮ

ಮೆಲ್ಲ ಮೆಲ್ಲಗೆ ಎಲ್ಲರ ಮನೆಗೆ
ನುಗ್ಗಿ ಬಿಟ್ಟಿದೆ ನೋಡಮ್ಮಾ

ಬಾಳಿನ ಹೆಜ್ಜೆ ಹೆಜ್ಜೆಗೂ ಹಕ್ಕು
ಸ್ಥಾಪಿಸಿ ಬಿಟ್ಟಿದೆ ಕಾಣಮ್ಮ

ಎಲ್ಲಡೆ ತನಗೆ ಮಾನ್ಯತೆ ಕೊಡುಗೆ
ಎನ್ನುವ ಸಂಭ್ರಮ ಅದಕಮ್ಮ

ಇದರೊಡನಾಟ ಹೆಚ್ಚಲು ಕಾಟ
ಕಾದಿದೆ ಜನಕೆ ಕೇಳಮ್ಮ

ಪಟ್ಟಿನಿಂದ ದೂರ ಅಟ್ಟಲು
ದಿಟ್ಟ ಮನಸು ಬೇಕಮ್ಮ

ಪ್ಲಾಸ್ಟಿಕ್ ಭೂತ ಜಗದಿಂದೋಡಲು
ಬಾಳು ಬಂಗಾರ ತಿಳಿಯಮ್ಮ