Budget 2024-25 | ಆದಾಯ ತೆರಿಗೆ: ಹಳೆಯ – ಹೊಸ ಪದ್ಧತಿಯ ವ್ಯತ್ಯಾಸ ಇಲ್ಲಿದೆ

ನವದೆಹಲಿ: ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಪ್ರಧಾನಿ ನರೇಂದ್ರ ಮೋದಿ ಅವರ 3.0 ಅವಧಿಯ ಚೊಚ್ಚಲ ಬಜೆಟ್ ಅನ್ನು ಮಂಗಳವಾರ ಮಂಡಿಸಿದ್ದು, ಹೊಸ ತೆರಿಗೆ ಪದ್ಧತಿಯಿಂದ ₹17,500 ಉಳಿತಾಯವಾಗಲಿದೆ ಎಂದಿದ್ದಾರೆ.

ಆದಾಯ ತೆರಿಗೆಯ ಹಳೆಯ ಪದ್ಧತಿಯನ್ನು ಹಾಗೇ ಉಳಿಸಿರುವ ಅವರು, ವೇತನದಾರರು ಹೊಸ ತೆರಿಗೆ ಪದ್ಧತಿಯಿಂದ ಹೆಚ್ಚಿನ ಉಳಿತಾಯವಾಗಲಿದೆ. ಇದರಲ್ಲಿ ಸ್ಟ್ಯಾಂಡರ್ಡ್ ಡಿಡಕ್ಷನ್‌ ₹75 ಸಾವಿರಕ್ಕೆ ಶೇ 50ರಷ್ಟು ಹೆಚ್ಚಳವಾಗಿದೆ ಎಂದಿದ್ದಾರೆ.

ಹೊಸ ತೆರಿಗೆ ಪದ್ಧತಿಯು 2024ರ ಏ. 1ರಿಂದ ಜಾರಿಗೆ ಬರಲಿದ್ದು, ಇದು 2025–26ನೇ ಅಸೆಸ್ಮೆಂಟ್ ಸಾಲಿಗೆ ಅನ್ವಯಿಸಲಿದೆ.

ಹೊಸ ತೆರಿಗೆ ಪದ್ಧತಿಯಲ್ಲಿ ಹಿಂದಿನಂತೆಯೇ ಆದಾಯ ತೆರಿಗೆ ಮಿತಿ ₹3ಲಕ್ಷದಿಂದ ಆರಂಭವಾಗಲಿದೆ. ₹3ಲಕ್ಷದಿಂದ ₹7ಲಕ್ಷವರೆಗೆ ಶೇ 5ರಷ್ಟು ತೆರಿಗೆ, ₹7ಲಕ್ಷದಿಂದ ₹10ಲಕ್ಷವರೆಗೆ ಶೇ 10ರಷ್ಟು, ₹10ಲಕ್ಷದಿಂದ ₹12ಲಕ್ಷವರೆಗೆ ಶೇ 15ರಷ್ಟು, ₹12ಲಕ್ಷದಿಂದ ₹15ಲಕ್ಷವರೆಗೆ ಶೇ 20ರಷ್ಟು ಹಾಗೂ ₹15ಲಕ್ಷಕ್ಕೂ ಹೆಚ್ಚಿನ ಆದಾಯಕ್ಕೆ ಶೇ 30ರಷ್ಟು ತೆರಿಗೆ ವಿಧಿಸಲಾಗಿದೆ.

ಸದ್ಯ ಜಾರಿಯಲ್ಲಿರುವ ಹೊಸ ತೆರಿಗೆ ಪದ್ಧತಿಯಲ್ಲೂ ತೆರಿಗೆ ಮಿತಿ ₹3ಲಕ್ಷದಷ್ಟೇ ಇದೆ. ಆದರೆ ಶೇ 5ರಷ್ಟು ತೆರಿಗೆಯ ಮಿತಿಯು ₹3ಲಕ್ಷದಿಂದ ₹6ಲಕ್ಷವರೆಗೆ ಇದೆ. ಅದರಂತೆಯೇ ಶೇ 10ರಷ್ಟು ತೆರಿಗೆ ಮಿತಿಯು ₹6ಲಕ್ಷದಿಂದ ₹9ಲಕ್ಷವರೆಗೆ ಇದೆ. ₹9ಲಕ್ಷದಿಂದ ₹12ಲಕ್ಷವರೆಗೆ ಶೇ 15ರಷ್ಟು, ₹12ರಿಂದ ₹15ಲಕ್ಷವರೆಗಿನ ಆದಾಯಕ್ಕೆ ಶೇ 20ರಷ್ಟು ಹಾಗು ₹15ಲಕ್ಷ ಮೇಲಿನ ಆದಾಯಕ್ಕೆ ಶೇ 30ರಷ್ಟು ಆದಾಯ ತೆರಿಗೆ ನಿಗದಿಪಡಿಸಲಾಗಿದೆ.

ಹಳೆಯ ತೆರಿಗೆ ಪದ್ಧತಿಯಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. ಅಲ್ಲಿ ಈಗಲೂ ಆದಾಯ ತೆರಿಗೆ ಮಿತಿ ₹2.5 ಲಕ್ಷದಷ್ಟೇ ಇದೆ. ಶೇ 5ರ ತೆರಿಗೆ ಮಿತಿಯು ₹2.5 ಲಕ್ಷದಿಂದ ₹5 ಲಕ್ಷವರೆಗೆ ಇದೆ. ₹5ಲಕ್ಷದಿಂದ ₹10ಲಕ್ಷವರೆಗಿನ ಆದಾಯಕ್ಕೆ ಶೇ 20ರಷ್ಟಿದೆ. ₹10 ಲಕ್ಷ ಮೇಲಿನ ಆದಾಯಕ್ಕೆ ಶೇ 30ರಷ್ಟು ತೆರಿಗೆ ವಿಧಿಸಲಾಗಿದೆ. ಹಳೇ ಆದಾಯ ತೆರಿಗೆ ಪದ್ಧತಿಯಲ್ಲಿ ಹಿರಿಯ ನಾಗರಿಕೆರಿಗೆ ಹೆಚ್ಚಿನ ಒತ್ತು ನೀಡಲಾಗಿತ್ತು.