10 ಕೋಟಿ ಜನಧನ ಖಾತೆ ನಿಷ್ಕ್ರಿಯ: ಸಚಿವ ಭಾಗವತ್‌ ಕರಾಡ್‌

ನವದೆಹಲಿ: ದೇಶದಲ್ಲಿ ಪ್ರಧಾನ ಮಂತ್ರಿ ಜನಧನ ಯೋಜನೆಯಡಿ (ಪಿಎಂಜೆಡಿವೈ) ತೆರೆದಿರುವ ಶೇ 20ರಷ್ಟು ಖಾತೆಗಳು ನಿಷ್ಕ್ರಿಯವಾಗಿವೆ ಎಂದು ಕೇಂದ್ರ ಹಣಕಾಸು ಖಾತೆಯ ರಾಜ್ಯ ಸಚಿವ ಭಾಗವತ್‌ ಕರಾಡ್‌ ರಾಜ್ಯಸಭೆಗೆ ಮಂಗಳವಾರ ತಿಳಿಸಿದ್ದಾರೆ.

ದೇಶದಲ್ಲಿ ಅಂದಾಜು 51.11 ಕೋಟಿ ಜನಧನ ಖಾತೆಗಳಿದ್ದು, ಈ ಪೈಕಿ ಡಿಸೆಂಬರ್‌ 6ರ ವೇಳೆಗೆ 10.34 ಕೋಟಿ ಖಾತೆಗಳು ನಿಷ್ಕ್ರಿಯವಾಗಿವೆ. ಇದರಲ್ಲಿ ಮಹಿಳೆಯರು ತೆರೆದಿರುವ 4.93 ಕೋಟಿ ಖಾತೆಗಳಿವೆ ಎಂದು ಹೇಳಿದ್ದಾರೆ.

ನಿಷ್ಕ್ರಿಯ ಖಾತೆಗಳಲ್ಲಿ ಸುಮಾರು ₹12,779 ಕೋಟಿ ಠೇವಣಿ ಇದೆ. ಈ ಮೊತ್ತ ಜನಧನ ಖಾತೆಗಳಲ್ಲಿ ಸಂಗ್ರಹವಾಗಿರುವ ಠೇವಣಿಯ ಒಟ್ಟು ಮೊತ್ತದ ಶೇ 6.12ರಷ್ಟಿದೆ ಎಂದು ಸಚಿವರು ಹೇಳಿದ್ದಾರೆ.