ಬಿಪಿಸಿಎಲ್‌ ಲಾಭ ಶೇ 73ರಷ್ಟು ಕುಸಿತ

ನವದೆಹಲಿ: 2024–25ನೇ ಆರ್ಥಿಕ ವರ್ಷದ ಜೂನ್‌ ತ್ರೈಮಾಸಿಕದಲ್ಲಿ ಸರ್ಕಾರಿ ಸ್ವಾಮ್ಯದ ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿಮಿಟೆಡ್‌ನ (ಬಿಪಿಸಿಎಲ್‌) ನಿವ್ವಳ ಲಾಭದಲ್ಲಿ ಶೇ 73ರಷ್ಟು ಕುಸಿತವಾಗಿದೆ.

ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ₹10,644 ಕೋಟಿ ಲಾಭ ಗಳಿಸಲಾಗಿತ್ತು. ಈ ಬಾರಿ ₹2,841 ಕೋಟಿ ಗಳಿಸಲಾಗಿದೆ ಎಂದು ಕಂಪನಿಯು ಶುಕ್ರವಾರ ತಿಳಿಸಿದೆ.

ಚುನಾವಣಾ ಪೂರ್ವದಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ಬೆಲೆಯಲ್ಲಿ ₹2 ಕಡಿಮೆ ಮಾಡಲಾಯಿತು. ಇದರಿಂದ ಲಾಭದ ಪ್ರಮಾಣ ಇಳಿಕೆಯಾಗಿದೆ ಎಂದು ಹೇಳಿದೆ.

ಮಾರಾಟದ ಬೆಳವಣಿಗೆಯು ಶೇ 8.42ರಿಂದ ಶೇ 3.22ಕ್ಕೆ ಇಳಿದಿದೆ. ವರಮಾನ ಗಳಿಕೆ ಯಥಾಸ್ಥಿತಿಯಲ್ಲಿದ್ದು, ₹1.28 ಲಕ್ಷ ಕೋಟಿ ಆಗಿದೆ.