₹773 ಕೋಟಿ ತೆರಿಗೆ ಬಾಕಿ: ಔಷಧಗಳ ತಯಾರಿಕಾ ಕಂಪನಿ ಸಿಪ್ಲಾಗೆ ನೋಟಿಸ್‌

ನವದೆಹಲಿ: 2015–16ರಿಂದ 2022–23ನೇ ಮೌಲ್ಯಮಾಪನ ವರ್ಷಗಳಿಗೆ ಸಂಬಂಧಿಸಿದಂತೆ ಒಟ್ಟು ₹773 ಕೋಟಿ ತೆರಿಗೆ ಪಾವತಿಸುವಂತೆ ಔಷಧಗಳ ತಯಾರಿಕಾ ಕಂಪನಿ ಸಿಪ್ಲಾಗೆ, ಆದಾಯ ತೆರಿಗೆ ಇಲಾಖೆಯು ನೋಟಿಸ್‌ ನೀಡಿದೆ.

‘ಈ ವರ್ಷಗಳಿಗೆ ಸಂಬಂಧಿಸಿ ಕಂಪನಿಯು ಕೆಲವು ವೆಚ್ಚಗಳ ಬಗ್ಗೆ ದಾಖಲೆ ಸಲ್ಲಿಸಿತ್ತು. ಇದಕ್ಕೆ ತೆರಿಗೆ ಇಲಾಖೆಯು ಅನುಮತಿ ನೀಡಿಲ್ಲ. ಮೌಲ್ಯಮಾಪನ ಮತ್ತು ಮರುಮೌಲ್ಯಮಾಪನ ನಡೆಸಿದ ಬಳಿಕ ತೆರಿಗೆ ಪಾವತಿಸುವಂತೆ ಆದೇಶ ನೀಡಿದೆ. ಇದು ಮರುಪಾವತಿ (ರೀಫಂಡ್‌) ಮೊತ್ತವನ್ನು ಒಳಗೊಂಡಿಲ್ಲ’ ಎಂದು ಕಂಪನಿಯು, ಷೇರುಪೇಟೆಗೆ ಮಾಹಿತಿ ನೀಡಿದೆ.

ಇಲಾಖೆಯ ತೆರಿಗೆ ಬೇಡಿಕೆಯು ಕಾನೂನಿನಡಿ ಸಮರ್ಥನೀಯವಾಗಿಲ್ಲ ಎಂಬುದು ನಮ್ಮ ನಂಬಿಕೆಯಾಗಿದೆ. ಈ ನೋಟಿಸ್‌ ಕಂಪನಿಯ ಹಣಕಾಸು ಅಥವಾ ಕಾರ್ಯಾಚರಣೆ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ಈ ಕುರಿತು ಕಾನೂನು ಚೌಕಟ್ಟಿನಡಿ ಪ್ರಶ್ನಿಸಲಾಗುವುದು ಎಂದು ತಿಳಿಸಿದೆ. 

ಮಂಗಳವಾರ ಬಿಎಸ್‌ಇಯಲ್ಲಿ ಕಂಪನಿಯ ಷೇರಿನ ಮೌಲ್ಯ ಶೇ 0.56ರಷ್ಟು ಇಳಿಕೆಯಾಗಿದ್ದು, ಪ್ರತಿ ಷೇರಿನ ಬೆಲೆ ₹1,507 ಆಗಿದೆ.