7,300 ದೇಶೀಯ ವಿಮಾನ ಯಾನ ರದ್ದು

ನವದೆಹಲಿ: ದೇಶೀಯ ವಿಮಾನಯಾನ ಸಂಸ್ಥೆಗಳು ಈ ವರ್ಷದ ಮೇ 31ರ ವರೆಗೆ 7,030 ನಿಗದಿತ ವಿಮಾನ ಹಾರಾಟಗಳನ್ನು ರದ್ದುಗೊಳಿಸಿವೆ ಎಂದು ನಾಗರಿಕ ವಿಮಾನಯಾನ ಸಚಿವಾಲಯವು ಸೋಮವಾರ ರಾಜ್ಯಸಭೆಗೆ ತಿಳಿಸಿದೆ.

ಈ ಅವಧಿಯಲ್ಲಿ 4.56 ಲಕ್ಷ ವಿಮಾನ ಯಾನಗಳು ನಡೆದಿವೆ. 2022ರಲ್ಲಿ 6,413 ಮತ್ತು 2023ರಲ್ಲಿ 7,427 ವಿಮಾನ ಹಾರಾಟಗಳು ರದ್ದಾಗಿವೆ ಎಂದು ನಾಗರಿಕ ವಿಮಾನಯಾನ  ರಾಜ್ಯ ಸಚಿವ ಮುರಳೀಧರ್‌ ಮೊಹೋಲ್ ತಿಳಿಸಿದ್ದಾರೆ.

ಪ್ರಯಾಣಿಕರ ಮುಖ ಗುರುತಿಸುವಿಕೆಯ ತಂತ್ರಜ್ಞಾನ ವ್ಯವಸ್ಥೆ ಡಿಜಿ ಯಾತ್ರಾವನ್ನು ದೇಶದ ಎಲ್ಲ ವಿಮಾನ ನಿಲ್ದಾಣಗಳಲ್ಲಿ ಹಂತ ಹಂತವಾಗಿ ಪರಿಚಯಿಸಲು ಯೋಜಿಸಲಾಗಿದೆ. ಡಿಜಿ ಯಾತ್ರೆ ಪ್ರಾರಂಭವಾದಾಗಿನಿಂದ, 2.5 ಕೋಟಿಗೂ ಅಧಿಕ ವಿಮಾನ ಪ್ರಯಾಣಿಕರು ಡಿಜಿ ಯಾತ್ರಾವನ್ನು ಬಳಸಿದ್ದಾರೆ ಎಂದು ಹೇಳಿದ್ದಾರೆ.