ಎಸ್‌ಐಪಿ: ಹೆಚ್ಚಿದ ಹೂಡಿಕೆ

ನವದೆಹಲಿ: ಸೆಪ್ಟೆಂಬರ್‌ನಲ್ಲಿ ಈಕ್ವಿಟಿ ಮ್ಯೂಚುವಲ್‌ ಫಂಡ್‌ (ಎಂ.ಎಫ್‌) ಮಾರುಕಟ್ಟೆಯಲ್ಲಿ ₹34,419 ಕೋಟಿ ಬಂಡವಾಳ ಹೂಡಿಕೆಯಾಗಿದೆ. 

ಆಗಸ್ಟ್‌ನಲ್ಲಿ ₹38,239 ಕೋಟಿ ಹೂಡಿಕೆಯಾಗಿತ್ತು. ಇದಕ್ಕೆ ಹೋಲಿಸಿದರೆ ಶೇ 10ರಷ್ಟು ಇಳಿಕೆಯಾಗಿದೆ. ಲಾರ್ಜ್‌ಕ್ಯಾಪ್‌ ಫಂಡ್‌ಗಳಲ್ಲಿ ಹೂಡಿಕೆ ಪ್ರಮಾಣ ಕಡಿಮೆಯಾಗಿದ್ದರಿಂದ ಒಳಹರಿವಿನಲ್ಲಿ ಕುಸಿತವಾಗಿದೆ ಎಂದು ಭಾರತೀಯ ಮ್ಯೂಚುವಲ್ ಫಂಡ್ ಕಂಪನಿಗಳ ಒಕ್ಕೂಟ (ಎಎಂಎಫ್‌ಐ) ಗುರುವಾರ ತಿಳಿಸಿದೆ.

ಎಸ್‌ಐಪಿ ಹೂಡಿಕೆ ಏರಿಕೆ:

ಸೆಪ್ಟೆಂಬರ್‌ನಲ್ಲಿ ವ್ಯವಸ್ಥಿತ ಹೂಡಿಕೆ ಯೋಜನೆಯಡಿ (ಎಸ್‌ಐಪಿ) ₹24,509 ಕೋಟಿ ಹೂಡಿಕೆಯಾಗಿದೆ. ಆಗಸ್ಟ್‌ನಲ್ಲಿ ₹23,547 ಕೋಟಿ ಹೂಡಿಕೆಯಾಗಿತ್ತು. ಹೂಡಿಕೆದಾರರಲ್ಲಿ ಎಸ್‌ಐಪಿಯತ್ತ ಒಲವು ಹೆಚ್ಚಿದೆ ಎಂದು ತಿಳಿಸಿದೆ.

‘ಇದು ಶಿಸ್ತುಬದ್ಧ ಮತ್ತು ದೀರ್ಘಾವಧಿಯ ಸಂಪತ್ತು ಕ್ರೋಡೀಕರಣದತ್ತ ಹೂಡಿಕೆದಾರರ ಮನೋಭಾವ ಬದಲಾಗುತ್ತಿರುವುದನ್ನು ತೋರಿಸುತ್ತದೆ’ ಎಂದು ಎಎಂಎಫ್‌ಐನ ಮುಖ್ಯ ಕಾರ್ಯ ನಿರ್ವಾಹಕ ವೆಂಕಟ್ ಚಲಸಾನಿ ಹೇಳಿದ್ದಾರೆ.

ಹೊರಹರಿವು ಹೆಚ್ಚಳ:

ಆಗಸ್ಟ್‌ ಮತ್ತು ಸೆಪ್ಟೆಂಬರ್‌ನಲ್ಲಿ ಮ್ಯೂಚುವಲ್‌ ಫಂಡ್‌ ವಲಯದಿಂದ ಬಂಡವಾಳದ ಹೊರಹರಿವು ಪ್ರಮಾಣ ಹೆಚ್ಚಿದೆ. ಈ ಎರಡು ತಿಂಗಳಿನಲ್ಲಿ ಕ್ರಮವಾಗಿ ₹1.08 ಲಕ್ಷ ಕೋಟಿ ಹಾಗೂ ₹71,114 ಕೋಟಿ ಬಂಡವಾಳ ಹೊರಹೋಗಿದೆ. 

ಆದರೆ, ಇದೇ ಅವಧಿಯಲ್ಲಿ ಸಾಲಪತ್ರ ಮಾರುಕಟ್ಟೆಯಲ್ಲಿ ಒಟ್ಟಾರೆ ₹1.14 ಲಕ್ಷ ಕೋಟಿ ಬಂಡವಾಳ ಹೂಡಿಕೆಯಾಗಿದೆ. 

ಬಂಡವಾಳದ ಹೊರಹರಿವಿನ ಪ್ರಮಾಣ ಹೆಚ್ಚಳದ ಹೊರತಾಗಿಯೂ ಸೆಪ್ಟೆಂಬರ್‌ನಲ್ಲಿ ಈ ಉದ್ಯಮದ ಸಂಪತ್ತಿನ ನಿರ್ವಹಣಾ ಮೌಲ್ಯವು (ಎಯುಎಂ) ₹67 ಲಕ್ಷ ಕೋಟಿಯಷ್ಟಿದೆ. ಆಗಸ್ಟ್‌ನಲ್ಲಿ ₹66.7 ಲಕ್ಷ ಕೋಟಿ ಇತ್ತು.

‘ಮ್ಯೂಚುವಲ್‌ ಫಂಡ್‌ ಉದ್ಯಮದಲ್ಲಿ ಹೂಡಿಕೆದಾರರ ಸಂಖ್ಯೆ 5 ಕೋಟಿ ದಾಟಿದೆ’ ಎಂದು ಚಲಸಾನಿ ಹೇಳಿದ್ದಾರೆ.