2031ಕ್ಕೆ ಭಾರತದ ಜಿಡಿಪಿ ದುಪ್ಪಟ್ಟು

ನವದೆಹಲಿ (ಪಿಟಿಐ): ಭಾರತದ ಅರ್ಥವ್ಯವಸ್ಥೆಯ ವಾರ್ಷಿಕ ಬೆಳವಣಿಗೆ ಪ್ರಮಾಣವು ಶೇಕಡ 6.7ರಷ್ಟು ಇದ್ದರೆ, ಜಿಡಿಪಿ ಗಾತ್ರವು 2031ರ ವೇಳೆಗೆ ಈಗಿನ ಮಟ್ಟಕ್ಕಿಂತ ಎರಡು ಪಟ್ಟು ಹೆಚ್ಚಾಗಬಲ್ಲದು ಎಂದು ಎಸ್‌ಆ್ಯಂಡ್‌ಪಿ ಗ್ಲೋಬಲ್ ಸಂಸ್ಥೆಯ ವರದಿಯೊಂದು ಹೇಳಿದೆ.

ದೇಶದ ಜಿಡಿಪಿ ಈಗ 3.4 ಟ್ರಿಲಿಯನ್ ಡಾಲರ್‌ (ಅಂದಾಜು ₹281 ಲಕ್ಷ ಕೋಟಿ). ವಾರ್ಷಿಕ ಆರ್ಥಿಕ ಬೆಳವಣಿಗೆ ದರವು ಶೇ 6.7ರಷ್ಟು ಇದ್ದಲ್ಲಿ, 2031ರ ವೇಳೆಗೆ ದೇಶದ ಜಿಡಿಪಿ ಗಾತ್ರವು 6.7 ಟ್ರಿಲಿಯನ್ ಡಾಲರ್ (554 ಲಕ್ಷ ಕೋಟಿ) ಆಗಲಿದೆ ಎಂದು ವರದಿಯು ಅಂದಾಜು ಮಾಡಿದೆ.

2022–23ನೆಯ ಸಾಲಿನಲ್ಲಿ ದೇಶದ ಜಿಡಿ‍ಪಿ ಬೆಳವಣಿಗೆ ದರವು ಶೇ 7.2ರಷ್ಟು ಆಗಿದೆ. ಜಾಗತಿಕ ಆರ್ಥಿಕ ಬೆಳವಣಿಗೆ ಕುಸಿಯವುದು ಹಾಗೂ ರೆಪೊ ದರ ಹೆಚ್ಚಳದ ಪರಿಣಾಮದಿಂದಾಗಿ ದೇಶದ ಜಿಡಿಪಿ ಬೆಳವಣಿಗೆಯು ಈ ವರ್ಷ ಶೇ 6ಕ್ಕೆ ಇಳಿಕೆ ಕಾಣುವ ಸಾಧ್ಯತೆ ಇದೆ ಎಂದು ವರದಿಯಲ್ಲಿ ಹೇಳಲಾಗಿದೆ.