ಹವಾಮಾನ ಬದಲಾವಣೆ: ಜಿಡಿಪಿಗೆ ಶೇ 24ರಷ್ಟು ನಷ್ಟ; ಎಡಿಬಿ

ನವದೆಹಲಿ: ಹವಾಮಾನ ಬದಲಾವಣೆಯಿಂದಾಗಿ 2070ರ ವೇಳೆಗೆ ಏಷ್ಯಾ ಮತ್ತು ಪೆಸಿಫಿಕ್‌ ಪ್ರದೇಶವು ತನ್ನ ಒಟ್ಟು ಆಂತರಿಕ ಉತ್ಪನ್ನದ (ಜಿಡಿಪಿ) ಶೇ 16.9ರಷ್ಟು ನಷ್ಟ ಕಾಣಲಿದೆ ಎಂದು ಏಷ್ಯಾ ಅಭಿವೃದ್ಧಿ ಬ್ಯಾಂಕ್‌ (ಎಡಿಬಿ) ತಿಳಿಸಿದೆ.

ಇದೇ ವೇಳೆಗೆ ಭಾರತ ಕೂಡ ತನ್ನ ಜಿಡಿಪಿಯ ಶೇ 24.8ರಷ್ಟು ನಷ್ಟ ಅನುಭವಿಸಲಿದೆ ಎಂದು ಗುರುವಾರ ಬಿಡುಗಡೆಯಾಗಿರುವ ವರದಿ ತಿಳಿಸಿದೆ.

ಸಮುದ್ರ ಮಟ್ಟದಲ್ಲಿನ ಏರಿಕೆ ಮತ್ತು ಕಾರ್ಮಿಕರಲ್ಲಿ ಉತ್ಪಾದನಾ ಸಾಮರ್ಥ್ಯ ಕಡಿಮೆಯಾಗುತ್ತಿದೆ. ಇದೇ ನಷ್ಟ ಹೆಚ್ಚಳಕ್ಕೆ ಕಾರಣ. ಕಡಿಮೆ ಆದಾಯ ಮತ್ತು ದುರ್ಬಲ ಆರ್ಥಿಕ ಸ್ಥಿತಿ ಹೊಂದಿರುವ ರಾಷ್ಟ್ರಗಳು ಮತ್ತಷ್ಟು ಕಠಿಣ ಪರಿಸ್ಥಿತಿ ಎದುರಿಸಲಿವೆ ಎಂದು ಹೇಳಿದೆ.

ಈ ಹವಾಮಾನ ಬಿಕ್ಕಟ್ಟು ಮುಂದುವರಿದರೆ ಏಷ್ಯಾ–ಪೆಸಿಫಿಕ್‌ ಪ್ರದೇಶ ವ್ಯಾಪ್ತಿಯ ಕರಾವಳಿ ಪ್ರದೇಶದಲ್ಲಿನ ಸುಮಾರು 30 ಕೋಟಿ ಜನರು ಪ್ರವಾಹದಿಂದ ಅಪಾಯಕ್ಕೆ ಸಿಲುಕಲಿದ್ದಾರೆ. ಇದರಿಂದ ಕರಾವಳಿ ಸಂಪತ್ತಿನ ಹಾನಿ ಹೆಚ್ಚಲಿದೆ ಎಂದು ಹೇಳಿದೆ.