ಭಾರತದ ಕಂಪನಿಗಳ ವಿದೇಶಿ ಸಾಲ ಹೆಚ್ಚಳ

ಮುಂಬೈ: ಭಾರತದ ಕಂಪನಿಗಳು ಆಗಸ್ಟ್‌ನಲ್ಲಿ ವಿದೇಶದಿಂದ ಪಡೆದಿರುವ ವಾಣಿಜ್ಯ ಸಾಲದ (ಇಸಿಬಿ) ಮೊತ್ತವು ಹಿಂದಿನ ವರ್ಷದ ಆಗಸ್ಟ್‌ಗೆ ಹೋಲಿಸಿದರೆ ಶೇ 4.6ರಷ್ಟು ಹೆಚ್ಚಾಗಿದೆ.

ಭಾರತೀಯ ರಿಸರ್ವ್‌ ಬ್ಯಾಂಕ್‌ನ (ಆರ್‌ಬಿಐ) ಮಾಹಿತಿಯ ಪ್ರಕಾರ, 2021ರ ಆಗಸ್ಟ್‌ನಲ್ಲಿ ಕಂಪನಿಗಳು ₹23,227 ಕೋಟಿ ಮೊತ್ತದ ಸಾಲ ಪಡೆದಿದ್ದವು. 2022ರ ಆಗಸ್ಟ್‌ನಲ್ಲಿ ₹24,287 ಕೋಟಿಗೆ ಏರಿಕೆ ಆಗಿದೆ.

ಒಟ್ಟು ಮೊತ್ತದಲ್ಲಿ ₹20,137 ಕೋಟಿ ಸಾಲವನ್ನು ಆಟೊಮೆಟಿಕ್‌ ರೂಟ್‌ ಮೂಲಕ ಪಡೆಯಲಾಗಿದೆ. ಉಳಿದ ಮೊತ್ತವನ್ನು ಮಸಾಲಾ ಬಾಂಡ್‌ಗಳನ್ನು ನೀಡುವ ಮೂಲಕ ಸಂಗ್ರಹಿಸಲಾಗಿದೆ ಎಂದು ಅದು ಮಾಹಿತಿ ನೀಡಿದೆ.

ಎಚ್‌ಡಿಎಫ್‌ಸಿ ಬ್ಯಾಂಕ್‌, ಫುಲ್ಲರ್‌ಟನ್‌ ಇಂಡಿಯಾ ಕ್ರೆಡಿಟ್‌ ಕೊ ಲಿಮಿಟೆಡ್‌, ಟೊಯೋಟ ಫೈನಾನ್ಶಿಯಲ್‌ ಸರ್ವೀಸ್‌, ಐಐಎಫ್ಎಲ್‌ ಫೈನಾನ್ಸ್‌, ಟಾಟಾ ಸಿಯಾ ಏರ್‌ಲೈನಸ್‌, ಹುಂಡೈ ಟ್ರಾನ್ಸಿಸ್‌ ಇಂಡಿಯಾ ಕಂಪನಿಗಳು ಬಾಹ್ಯ ವಾಣಿಜ್ಯ ಸಾಲದ ಮೂಲಕ ಬಂಡವಾಳ ಸಂಗ್ರಹಿಸಿಕೊಂಡಿವೆ ಎಂದು ಆರ್‌ಬಿಐ ತಿಳಿಸಿದೆ.