2020–21 ಐಟಿಆರ್ ಇ–ವೆರಿಫಿಕೇಷನ್‌: ಫೆಬ್ರುವರಿ 28ರವರೆಗೆ ಅವಕಾಶ
ನವದೆಹಲಿ: 2020–21ನೇ ಅಂದಾಜು ವರ್ಷಕ್ಕೆ ಆದಾಯ ತೆರಿಗೆ ಲೆಕ್ಕಪತ್ರ ಸಲ್ಲಿಕೆಯ (ಐಟಿಆರ್) ಆನ್‌ಲೈನ್‌ ದೃಢೀಕರಣ (ಇ–ವೇರಿಫಿಕೇಷನ್‌) ಮಾಡದೇ ಇರುವ ತೆರಿಗೆದಾರರಿಗೆ 2022ರ ಫೆಬ್ರುವರಿ 28ರ ಒಳಗಾಗಿ ಆ ಪ್ರಕ್ರಿಯೆ ಪೂರ್ಣಗೊಳಿಸುವ ಅವಕಾಶ ನೀಡಲಾಗಿದೆ.
ಆದಾಯ ತೆರಿಗೆ ಕಾಯ್ದೆಯ ಪ್ರಕಾರ, ಡಿಜಿಟಲ್‌ ಹಸ್ತಾಕ್ಷರ ಇಲ್ಲದೇ ವಿದ್ಯುನ್ಮಾನ ಮಾರ್ಗದ ಮುಲಕ ಐಟಿಆರ್ ಸಲ್ಲಿಸಿದರೆ 120 ದಿನಗಳ ಒಳಗಾಗಿ ಆಧಾರ್ ಒಟಿಪಿ ಅಥವಾ ನೆಟ್‌ ಬ್ಯಾಂಕಿಂಗ್ ಅಥವಾ ಡಿಮ್ಯಾಟ್‌ ಖಾತೆಗೆ ಬರುವ ಕೋಡ್‌ ಬಳಸಿ ಅಥವಾ ಎಟಿಎಂ ಮೂಲಕ ಇ–ವೇರಿಫಿಕೇಷನ್‌ ಮಾಡಬೇಕು. ಇದಲ್ಲದೆ, ಐಟಿಆರ್ ಸಲ್ಲಿಸಿದ ಪ್ರತಿಯನ್ನು ಬೆಂಗಳೂರಿನಲ್ಲಿ ಇರುವ ಕೇಂದ್ರೀಯ ಪರಿಶೀಲನಾ ಕೇಂದ್ರಕ್ಕೆ (ಸಿಪಿಸಿ) ಕಳುಹಿಸುವ ಮೂಲಕವೂ ದೃಢೀಕರಿಸಬಹುದಾಗಿದೆ.
ಇ–ವೇರಿಫಿಕೇಷನ್‌ ಪ್ರಕ್ರಿಯೆ ಪೂರ್ಣಗೊಳ್ಳದೇ ಇದ್ದಲ್ಲಿ ರಿಟರ್ನ್ಸ್‌ ಸಲ್ಲಿಕೆ ಆಗಿದೆ ಎಂದು ಇಲಾಖೆಯು ಪರಿಗಣಿಸುವುದಿಲ್ಲ.
ನೇರ ತೆರಿಗೆಗಳ ಕೇಂದ್ರೀಯ ಮಂಡಳಿಯು (ಸಿಬಿಡಿಟಿ) ಮಂಗಳವಾರ ಹೊರಡಿಸಿರುವ ಅಧಿಸೂಚನೆಯ ಪ್ರಕಾರ, 2020–21ನೇ ಅಂದಾಜು ವರ್ಷಕ್ಕೆ (2019–20ನೇ ಹಣಕಾಸು ವರ್ಷ) ವಿದ್ಯುನ್ಮಾನ ರೂಪದಲ್ಲಿ ಸಲ್ಲಿಕೆ ಆಗಿರುವ ಬಹಳಷ್ಟು ಐಟಿಆರ್‌ಗಳ ಇ–ವೇರಿಫಿಕೇಷನ್‌ ಆಗಬೇಕಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.