‘ಕೆಆರ್‌ಐಬಿಸಿಒ ರೈಜೋಸೂಪರ್’ ಜೈವಿಕ ಗೊಬ್ಬರ ಬಿಡುಗಡೆ

ನವದೆಹಲಿ: ಸಹಕಾರಿ ಗೊಬ್ಬರ ತಯಾರಿಕಾ ಸಂಸ್ಥೆ ಕೃಷಿಕ್‌ ಭಾರತಿ ಕೋ–ಆಪರೇಟಿವ್‌ ಲಿಮಿಟೆಡ್‌ (ಕ್ರಿಭ್ಕೋ), ಜಾಗತಿಕ ಸಂಸ್ಥೆ ನೊವೊನೆಸಿಸ್ ಸಹಭಾಗಿತ್ವದಲ್ಲಿ ‘ಕೆಆರ್‌ಐಬಿಸಿಒ ರೈಜೋಸೂಪರ್‘ ಎಂಬ ಹೊಸ ಜೈವಿಕ ಗೊಬ್ಬರವನ್ನು ಸೋಮವಾರ ಬಿಡುಗಡೆ ಮಾಡಿದೆ.

ಈ ಉತ್ಪನ್ನವನ್ನು ಮುಂಬರಲಿರುವ ಚಳಿಗಾಲದ ಬೆಳೆಗೆ ರೈತರಿಗೆ ಲಭ್ಯವಾಗುವಂತೆ ಮಾಡುವ ಉದ್ದೇಶವನ್ನು ಕಂಪನಿ ಹೊಂದಿದೆ. ಪ್ರತಿ ಎಕರೆಗೆ ₹500ರಿಂದ ₹550 ಬೆಲೆಯ ಗೊಬ್ಬರ ಬೇಕಾಗುತ್ತದೆ. 

ಭತ್ತ, ಗೋಧಿ, ಬೇಳೆಕಾಳು ಸೇರಿ ವಿವಿಧ ಬೆಳೆಗಳಿಗೆ ಬಳಸಬಹುದಾಗಿದೆ. ಸಸ್ಯಗಳ ಆರಂಭಿಕ ಹಂತದಲ್ಲಿ ಇದನ್ನು ಬಳಸಬಹುದಾಗಿದೆ. ಈ ಉತ್ಪನ್ನವನ್ನು ಗೋಧಿ, ಟೊಮೆಟೊ ಮತ್ತು ಮೆಣಸಿನಕಾಯಿ ಬೆಳೆ ಮೇಲೆ ಪರೀಕ್ಷೆ ನಡೆಸಲಾಗಿದೆ. ಕ್ರಿಭ್ಕೋ ಇದನ್ನು ತಯಾರಿಸಲಿದೆ. ವಾರ್ಷಿಕ 20 ಸಾವಿರ ಟನ್‌ನಷ್ಟು ತಯಾರಿಕೆಯ ಗುರಿ ಹೊಂದಿದೆ ಎಂದು ನೊವೊನೆಸಿಸ್ ತಿಳಿಸಿದೆ.