ಕಾರ್ಡ್‌ ವಿವರ ಸಂಗ್ರಹ: ಗಡುವು ಮತ್ತೆ ವಿಸ್ತರಣೆ

ಮುಂಬೈ (ಪಿಟಿಐ): ಡೆಬಿಟ್‌ ಮತ್ತು ಕ್ರೆಡಿಟ್ ಕಾರ್ಡ್‌ಗಳ ವಿವರಗಳನ್ನು ಪಾವತಿ ವಹಿವಾಟಿನ ಪಾಲುದಾರರು ‘ಟೋಕನ್’ ರೂಪದಲ್ಲಿ ಮಾತ್ರ ಸಂಗ್ರಹಿಸುವ ವ್ಯವಸ್ಥೆ ಜಾರಿಗೆ ತರಲು ನೀಡಿದ್ದ ಗಡುವನ್ನು ಆರ್‌ಬಿಐ ಸೆಪ್ಟೆಂಬರ್‌ 30ರವರೆಗೆ ಮುಂದೂಡಿದೆ.

ಉದ್ಯಮ ವಲಯ ಸಲ್ಲಿಸಿದ್ದ ಮನವಿಗಳನ್ನು ಆಧರಿಸಿ ಆರ್‌ಬಿಐ ಈ ತೀರ್ಮಾನ ಕೈಗೊಂಡಿದೆ. ಈ ವ್ಯವಸ್ಥೆಯ ಜಾರಿಗೆ ನೀಡಿದ್ದ ಗಡುವನ್ನು ಆರ್‌ಬಿಐ ಈ ಹಿಂದೆಯೂ ವಿಸ್ತರಿಸಿತ್ತು.

ವ್ಯವಸ್ಥೆಯ ಜಾರಿಯಲ್ಲಿ ಕೆಲವು ಸಮಸ್ಯೆಗಳು ಇವೆ ಎಂದು ಉದ್ಯಮ ವಲಯವು ಹೇಳಿತ್ತು. ‘ಕಾರ್ಡ್‌ ಹೊಂದಿರುವವರಿಗೆ ತೊಂದರೆ ಆಗದಿರಲಿ ಎಂದು ಇವುಗಳನ್ನು ಪರಿಶೀಲಿಸಲಾಗುತ್ತಿದೆ, ಸಂಬಂಧಪಟ್ಟವರ ಜೊತೆ ಸಮಾಲೋಚನೆ ನಡೆಸಲಾಗುತ್ತಿದೆ’ ಎಂದು ಆರ್‌ಬಿಐ ಹೇಳಿದೆ.