ಬೆಂಗಳೂರಿನಲ್ಲಿ ಇ–ಏರ್‌ ಟ್ಯಾಕ್ಸಿ ಸೇವೆಗೆ ಒಪ್ಪಂದ

ನವದೆಹಲಿ: ಬೆಂಗಳೂರಿನಲ್ಲಿ ವಿದ್ಯುತ್‌ಚಾಲಿತ ಏರ್‌ ಟ್ಯಾಕ್ಸಿ ಸೇವೆ (ಫ್ಲೈಯಿಂಗ್‌ ಟ್ಯಾಕ್ಸಿ) ಆರಂಭಿಸಲು ಸರಳಾ ಏವಿಯೇಷನ್‌ ಕಂಪನಿ ಮತ್ತು ಬೆಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತವು (ಬಿಐಎಎಲ್‌) ತಿಳಿವಳಿಕೆ ಪತ್ರಕ್ಕೆ ಸಹಿ ಹಾಕಿವೆ. 

ಈ ಏರ್‌ ಟ್ಯಾಕ್ಸಿಯು ಏಳು ಆಸನಗಳ ಸಾಮರ್ಥ್ಯ ಹೊಂದಿದೆ. ಸದ್ಯ ಬೆಂಗಳೂರಿನ ಎಲೆಕ್ಟ್ರಾನಿಕ್‌ ಸಿಟಿಯಿಂದ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ರಸ್ತೆ ಮಾರ್ಗದಲ್ಲಿ ತಲುಪಲು 152 ನಿಮಿಷ ಬೇಕಿದೆ. ಏರ್‌ ಟ್ಯಾಕ್ಸಿ ಸೇವೆ ಆರಂಭಗೊಂಡರೆ ಈ ಮಾರ್ಗವನ್ನು 19 ನಿಮಿಷದಲ್ಲಿ ತಲುಪಬಹುದಾಗಿದೆ ಎಂದು ಕಂಪನಿ ತಿಳಿಸಿದೆ.

ಒಬ್ಬರಿಗೆ ಪ್ರಯಾಣ ದರ ₹1,700 ಇರಲಿದೆ. ಮುಂಬೈ, ದೆಹಲಿ ಮತ್ತು ಪುಣೆಯಲ್ಲೂ ಈ ಸೇವೆ ಆರಂಭಿಸುವ ಯೋಜನೆ ಹೊಂದಲಾಗಿದೆ ಎಂದು ತಿಳಿಸಿದೆ.

‘ಮುಂದಿನ 2–3 ವರ್ಷದಲ್ಲಿ ಇದರ ಕಾರ್ಯಾಚರಣೆಯನ್ನು ಆರಂಭಿಸಲಾಗುವುದು. ಇದ ಪರಿಸರ ಸ್ನೇಹಿಯಾಗಿದೆ. ಸಾಂಪ್ರದಾಯಿಕ ಹೆಲಿಕಾಪ್ಟರ್‌ ಸೇವೆಗೆ ಹೋಲಿಸಿದರೆ ಇದರ ವೆಚ್ಚ ಕಡಿಮೆಯಾಗಿದೆ. ಸಾರ್ವಜನಿಕರಿಗೆ ಕೈಗಟಕುವ ದರದಲ್ಲಿ ಸೇವೆ ದೊರೆಯಲಿದೆ’ ಎಂದು ವಿವರಿಸಿದೆ.