ಸರಕು ಸಾಗಣೆಗೆ ಡ್ರೋನ್‌ ಬಳಕೆ: ಒಪ್ಪಂದಕ್ಕೆ ಸಹಿ

ಬೆಂಗಳೂರು: ಸರಕು ಸಾಗಣೆಯಲ್ಲಿ ಬಳಸುವ ಡ್ರೋನ್‌ಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿ ಇರುವ ಸ್ಕಾಂಡ್ರನ್‌ ಪ್ರೈ.ಲಿ ಹಾಗೂ ಸರಕು ಸಾಗಣೆ ಕಂಪನಿ ಕ್ರಿಟಿಕಲ್‌ಲಾಗ್‌ ಇಂಡಿಯಾ ಪ್ರೈ.ಲಿ. ಕಂಪನಿಗಳು ಡ್ರೋನ್‌ ಬಳಸಿ ಸರಕು ಸಾಗಣೆ ಸೇವೆ ಒದಗಿಸಲು ಒಪ್ಪಂದ ಮಾಡಿಕೊಂಡಿವೆ.

‍ಪಾಲುದಾರಿಕೆಯ ಮೌಲ್ಯವು ₹ 600 ಕೋಟಿ. ದೇಶದ 160 ನಗರಗಳನ್ನು ಇದು ಒಳಗೊಳ್ಳಲಿದೆ ಎಂದು ಪ್ರಕಟಣೆ ತಿಳಿಸಿದೆ. ದೇಶದಲ್ಲಿ ಈ ಮಾದರಿಯ ಒಪ್ಪಂದ ಆಗುತ್ತಿರುವುದು ಇದೇ ಮೊದಲು, ಈ ಒಪ್ಪಂದವು ಬಿ2ಬಿ ವಿಭಾಗದಲ್ಲಿ ಡ್ರೋನ್‌ ತಂತ್ರಜ್ಞಾನವನ್ನು ಬಳಸಿಕೊಂಡು ಸರಕು ಸಾಗಣೆ ಸೇವೆ ಒದಗಿಸುವುದರ ಅಗತ್ಯವನ್ನು ಹೇಳುತ್ತಿದೆ ಎಂದು ಕೂಡ ಪ್ರಕಟಣೆ ತಿಳಿಸಿದೆ.

‘ನಮ್ಮ ಒಪ್ಪಂದವು ಗ್ರಾಹಕರಿಗೆ ಹೊಸ ಬಗೆಯ ಸೇವೆಗಳನ್ನು ಒದಗಿಸಲಿದೆ’ ಎಂದು ಸ್ಕಾಂಡ್ರನ್‌ ಕಂಪನಿಯ ಸಿಇಒ ಅರ್ಜುನ್ ನಾಯ್ಕ್‌ ಹೇಳಿದ್ದಾರೆ.