ಸ್ವಿಗ್ಗಿ ನಷ್ಟ ₹3,628.9 ಕೋಟಿಗೆ ಏರಿಕೆ

ಹೊಸದಿಲ್ಲಿ: ಆಹಾರ ಮತ್ತು ದಿನಸಿ ವಿತರಣಾ ಆ್ಯಪ್‌ ಸ್ವಿಗ್ಗಿ, 2022ನೇ ಆರ್ಥಿಕ ವರ್ಷದಲ್ಲಿ ₹3,628.9 ಕೋಟಿ ನಷ್ಟ ಅನುಭವಿಸಿರುವುದಾಗಿ ಹೇಳಿದೆ.

ಹಿಂದಿನ ಹಣಕಾಸು ವರ್ಷದಲ್ಲಿ ಕಂಪನಿಯು 1,616.9 ಕೋಟಿ ರೂ ನಿವ್ವಳ ನಷ್ಟ ದಾಖಲಿಸಿತ್ತು.

2022 ನೇ ಹಣಕಾಸು ವರ್ಷದಲ್ಲಿ ಕಂಪನಿಯು ₹5,704.9 ಕೋಟಿ ವಹಿವಾಟು ದಾಖಲಿಸಿದ್ದು, ಹಿಂದಿನ ವರ್ಷ ಈ ಅವಧಿಯಲ್ಲಿ ₹ 2,546.9 ಕೋಟಿ ಆಗಿತ್ತು. ಆದಾಯದಲ್ಲಿ ಏರಿಕೆ ಕಂಡಿದ್ದರೂ ಕೂಡ ನಷ್ಟ ಹೆಚ್ಚಾಗಿದೆ.

ಕಂಪನಿಯ ಹಣಕಾಸು ವರದಿ ಪ್ರಕಾರ ಒಟ್ಟು ಆದಾಯವು ₹2,675.9 ಕೋಟಿಯಿಂದ ಈ ಹಣಕಾಸು ವರ್ಷದಲ್ಲಿ ₹6,119.8 ಕೋಟಿಗೆ ಹೆಚ್ಚಾಗಿದೆ.

‘ನಾವು ಕೋವಿಡ್‌ ನಂತರದ ಚೇತರಿಕೆ ಬಳಿಕ ವಹಿವಾಟು ಬೆಳವಣಿಗೆಯತ್ತ ಗಮನಹರಿಸಿದ್ದೇವೆ, ವಿಶೇಷವಾಗಿ ನಮ್ಮ ತ್ವರಿತ ವಾಣಿಜ್ಯ ಸೇವೆ ವಿಸ್ತರಣೆಯತ್ತ ದೃಷ್ಟಿ ಹಾಯಿಸಿದ್ದೇವೆ. ಆದಾಯವು 2 ಪಟ್ಟು ಹೆಚ್ಚಾಗಿದೆ’ ಎಂದು ಕಂಪನಿ ಹೇಳಿದೆ.