ಟಾಟಾ ಎಲೆಕ್ಟ್ರಾನಿಕ್ಸ್‌ನಲ್ಲಿ ಉತ್ಪಾದನೆ ಭಾಗಶಃ ಆರಂಭ

ನವದೆಹಲಿ: ಅಗ್ನಿ ಅವಘಡ ಸಂಭವಿಸಿದ್ದ ತಮಿಳುನಾಡಿನ ಹೊಸೂರು ಬಳಿಯ ಟಾಟಾ ಎಲೆಕ್ಟ್ರಾನಿಕ್ಸ್‌ ಘಟಕದಲ್ಲಿ ಗುರುವಾರ ಉತ್ಪಾದನಾ ಕಾರ್ಯಾಚರಣೆಯು ಭಾಗಶಃ ಆರಂಭಗೊಂಡಿದೆ.

‘ಸೆಪ್ಟೆಂಬರ್‌ 28ರಂದು ಈ ಘಟಕದಲ್ಲಿ ಅಗ್ನಿ ಅವಘಡ ಸಂಭವಿಸಿತ್ತು. ಇದರಿಂದ ಉತ್ಪಾದನಾ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಲಾಗಿತ್ತು. ಪೂರ್ಣ ಕಾರ್ಯಾಚರಣೆ ಆರಂಭಿಸಲು ಶ್ರಮಿಸುತ್ತಿದ್ದೇವೆ’ ಎಂದು ಟಾಟಾ ಎಲೆಕ್ಟ್ರಾನಿಕ್ಸ್‌ ಕಂಪನಿ ತಿಳಿಸಿದೆ.

ಸಿಬ್ಬಂದಿಗೆ ಪೂರ್ಣ ವೇತನ ನೀಡಲಾಗುವುದು. ಅವರ ಸುರಕ್ಷತೆಗೆ ಒತ್ತು ನೀಡಲಾಗಿದೆ. ಅವಘಡಕ್ಕೆ ಕಾರಣ ಪತ್ತೆ ಹಚ್ಚಲಾಗುತ್ತಿದೆ.  ಅವಘಡದಿಂದ ಐಫೋನ್‌ ಪೂರೈಕೆ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ಮುಂದಿನ ಮೂರು ತಿಂಗಳಿಗೆ ಸಾಕಾಗುವಷ್ಟು ದಾಸ್ತಾನು ಇದೆ ಎಂದು ತಿಳಿಸಿದೆ.

ಹೊಸೂರು ಘಟಕದಲ್ಲಿ ಆ್ಯಪಲ್‌ನ ಐಫೋನ್‌ 15 ಮತ್ತು ಐಫೋನ್‌ 16 ಅನ್ನು ತಯಾರಿಸಲಾಗುತ್ತದೆ.