ವಿಪ್ರೊ ನಿವ್ವಳ ಲಾಭ ಶೇ 12ರಷ್ಟು ಹೆಚ್ಚಳ

ಬೆಂಗಳೂರು: ಐ.ಟಿ. ಸೇವೆಗಳ ರಫ್ತು ಕಂಪನಿ ವಿಪ್ರೊ ಲಿಮಿಟೆಡ್‌, ಪ್ರಸಕ್ತ ಹಣಕಾಸು ವರ್ಷದ ಜೂನ್ ತ್ರೈಮಾಸಿಕದಲ್ಲಿ ₹2,870 ಕೋಟಿ ನಿವ್ವಳ ಲಾಭ ಗಳಿಸಿದೆ.

ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ₹2,563 ಕೋಟಿ ನಿವ್ವಳ ಲಾಭ ಗಳಿಸಿತ್ತು. ಇದಕ್ಕೆ ಹೋಲಿಸಿದರೆ ಈ ಬಾರಿ ಲಾಭದಲ್ಲಿ ಶೇ 12ರಷ್ಟು ಹೆಚ್ಚಳ ಕಂಡುಬಂದಿದೆ.

ಕಂಪನಿಯ ಕಾರ್ಯಾಚರಣಾ ವರಮಾನ ಶೇ 6ರಷ್ಟು ಏರಿಕೆ ಕಂಡು ₹22,831 ಕೋಟಿಗೆ ತಲುಪಿದೆ.

ದೊಡ್ಡ ಮೊತ್ತದ ಒಪ್ಪಂದಗಳು, ಹೊಸ ಕಂಪನಿಗಳಿಂದ ಸೇವೆಗಳಿಗೆ ಬೇಡಿಕೆ ಹಾಗೂ ಉತ್ತಮ ಗಳಿಕೆಯ ಕಾರಣಗಳಿಂದಾಗಿ ಮೊದಲ ತ್ರೈಮಾಸಿಕದಲ್ಲಿ ಬಲಿಷ್ಠ ಫಲಿತಾಂಶ ಸಾಧ್ಯವಾಗಿದೆ ಎಂದು ಕಂಪನಿಯ ಸಿಇಒ ಥಿಯರಿ ಡೆಲಾಪೋರ್ಟ್ ತಿಳಿಸಿದ್ದಾರೆ.