ಇಳಕಲ್‌ | ಬಡವರಿಗಾಗಿ 5 ಸಾವಿರ ಮನೆ ನಿರ್ಮಾಣ: ಶಾಸಕ ವಿಜಯಾನಂದ ಕಾಶಪ್ಪನವರ

ಇಳಕಲ್‌: ʼಈಗಾಗಲೇ 42 ಎಕರೆ ಜಮೀನಿನಲ್ಲಿ 1400 ಹಕ್ಕುಪತ್ರ ಕೊಟ್ಟಿದ್ದೇನೆ. ಸಾವಿರ ಮನೆ ಕಟ್ಟಡ ಆರಂಭವಾಗಲಿದೆ. ಇನ್ನೂ 72 ಎಕರೆ ಜಮೀನು ಖರೀದಿಸಿ ಬಡವರಿಗಾಗಿ 5 ಸಾವಿರ ಮನೆ ಕಟ್ಟಿಸಿಕೊಡುತ್ತೇನೆʼ ಎಂದು ಶಾಸಕ ವಿಜಯಾನಂದ ಕಾಶಪ್ಪನವರ ಹೇಳಿದರು.

ವಿಜಯ ಮಹಾಂತೇಶ್ವರ ಕರ್ತೃ ಗದ್ದುಗೆ ಹತ್ತಿರ ಸಣ್ಣ ನೀರಾವರಿ ಇಲಾಖೆಯಿಂದ ₹5ಕೋಟಿ ವೆಚ್ಚದಲ್ಲಿ ಹಿರೇಹಳ್ಳಕ್ಕೆ ಚೆಕ್‌ಡ್ಯಾಂ ಹಾಗೂ ರಕ್ಷಣಾ ಗೋಡೆ ನಿರ್ಮಾಣ ಕಾಮಗಾರಿಗೆ ಶನಿವಾರ ಭೂಮಿ ಪೂಜೆ ನೆರವೇರಿಸಿ ಮಾತನಾಡಿದರು.

ʼಮೊದಲ ಬಾರಿಗೆ ಶಾಸಕನಾಗಿದ್ದಾಗ ಕೆರೆ ನಿರ್ಮಾಣಕ್ಕೆ ₹4 ಕೋಟಿ  ಮಂಜೂರು ಮಾಡಿಸಿದ್ದೆ. ಹಿಂದಿನ ಶಾಸಕರು ಕೆರೆ ನಿರ್ಮಿಸಲು ಆಸಕ್ತಿ ತೋರಲಿಲ್ಲ. ಅನುದಾನ ಸರ್ಕಾರ ಹಿಂಪಡೆಯಿತು. ಈಗ ಮತ್ತೆ ಶಾಸಕನಾಗಿದ್ದು, ಆ ಕನಸು ಈಗ ನನಸಾಗುತ್ತಿದೆ. ಇದೇ ಅವಧಿಯಲ್ಲಿ ಕೆರೆ ಕಾಮಗಾರಿ ಮುಗಿಸಿ ಜನರ ಬಳಕೆಗೆ ಒದಗಿಸುತ್ತೇನೆʼ ಎಂದರು.

ʼ5ಕೋಟಿ ವೆಚ್ಚದಲ್ಲಿ ಅಲಂಪೂಪೇಟೆಗೆ ಸಂಪರ್ಕಿಸುವ ಸೇತುವೆ, ₹4 ಕೋಟಿ ವೆಚ್ಚದ ಸ್ವಿಮಿಂಗ್‌ ಪೂಲ್‌, ₹60 ಲಕ್ಷ ವೆಚ್ಚದಲ್ಲಿ ಹಾದಿ ಬಸವಣ್ಣ ಬಡಾವಣೆಗೆ ಹೆದ್ದಾರಿ ಪಕ್ಕ ಸರ್ವಿಸ್‌ ರಸ್ತೆ, ಕ್ರೀಡಾಂಗಣಕ್ಕಾಗಿ ಮಂಜೂರಾಗಿದ್ದ ₹2 ಕೋಟಿ ಬದಲಾಗಿ ಈಗ ಮುಖ್ಯಮಂತ್ರಿಗಳನ್ನು ವಿನಂತಿಸಿ ₹10 ಕೋಟಿ ಮಂಜೂರು ಮಾಡಿಸಿದ್ದೇನೆ’ ಎಂದು ತಿಳಿಸಿದರು.

ಕಾಂಗ್ರೆಸ್‌ ಮುಖಂಡ ವೆಂಕಟೇಶ ಸಾಕಾ ಮಾತನಾಡಿದರು.

 ನಗರಸಭೆ ಅಧ್ಯಕ್ಷೆ ಸುಧಾರಾಣಿ ಸಂಗಮ, ಉಪಾಧ್ಯಕ್ಷೆ ಕಾಳಮ್ಮ ಜಕ್ಕಾ, ಕಾಂಗ್ರೆಸ್‌ ಮುಖಂಡರಾದ ಶರಣಪ್ಪ ಆಮದಿಹಾಳ, ಶಾಂತಕುಮಾರ ಸುರಪುರ, ಮೌಲಪ್ಪ ಬಂಡಿವಡ್ಡರ್‌, ಶಬ್ಬೀರ್‌ ಬಾಗವಾನ ಇತರರು  ಇದ್ದರು.