ಮಲಪ್ರಭಾ ನದಿಯಲ್ಲಿ ಪ್ರವಾಹ: ರಸ್ತೆ ಸಂಪರ್ಕ ಕಡಿತ

ಬಾಗಲಕೋಟೆ: ಮಲಪ್ರಭಾ ನದಿ ಉಕ್ಕಿ ಹರಿಯುತ್ತಿರುವುದರಿಂದ ಬಾದಾಮಿ ತಾಲ್ಲೂಕಿನ ಹೆಬ್ಬಳ್ಳಿ ಗ್ರಾಮಕ್ಕೆ ನೀರು ನುಗ್ಗಿದೆ. ನದಿ ದಡದಲ್ಲಿರುವ ಮನೆಗಳಿಗೆ ನೀರು ಬಂದಿದೆ.

ಕಿತ್ತಲಿ-ಶಿರೋಳ ಗ್ರಾಮದ ಸೇತುವೆ ಜಲಾವೃತವಾಗಿದೆ. ಹಾಗೆಯೇ ಗೋವನಕೊಪ್ಪದ ಹಳೆ ಸೇತುವೆ ಮುಳುಗಿದೆ. ನದಿ ದಂಡೆಯ ಮೆಕ್ಕೆಜೋಳ, ಹತ್ತಿ,‌ ಈರುಳ್ಳಿ, ಕಬ್ಬು ಹೊಲಗಳಿಗೆ ನೀರು ನುಗ್ಗಿದೆ.

ಹುಬ್ಬಳ್ಳಿ- ಧಾರವಾಡ ಸುತ್ತ- ಮುತ್ತಲಿನ ಪ್ರದೇಶದಲ್ಲಿ ಮಳೆ ಜಾಸ್ತಿಯಾಗಿ, ಬೆಣ್ಣೆಹಳ್ಳ ಉಕ್ಕಿ ಹರಿಯುತ್ತಿದೆ. ಆ ನೀರೇ ಮಲಪ್ರಭಾ ನದಿಗೆ ಸೇರಿಕೊಂಡಿದೆ.