ರಬಕವಿ ಬನಹಟ್ಟಿ | ಮುಗಿಯದ ರಸ್ತೆ ಕಾಮಗಾರಿ: ದೂಳಿನಿಂದ ಹೈರಾಣದ ಸಾರ್ವಜನಿಕರು

ರಬಕವಿ ಬನಹಟ್ಟಿ: ಇಲ್ಲಿಯ ಶ್ರೀನಿವಾಸ ಚಲನಚಿತ್ರ ಮಂದಿರದಿಂದ ರಬಕವಿ ಬನಹಟ್ಟಿ ಸಮುದಾಯ ಆರೋಗ್ಯ ಕೇಂದ್ರದವರೆಗೆ ನಿರ್ಮಾಣವಾಗುತ್ತಿರುವ ರಸ್ತೆ ಕಾಮಗಾರಿ 10 ತಿಂಗಳಾದರೂ ಇನ್ನು ಮುಕ್ತಾಯಗೊಂಡಿಲ್ಲ. ರಸ್ತೆ ಕಾಮಗಾರಿ ಮುಕ್ತಾಯಗೊಳ್ಳದೆ ಇರುವುದರಿಂದ ಸುತ್ತ ಮುತ್ತಲಿನ ಮನೆಯ ಜನರು, ಅಂಗಡಿಕಾರರು ದೂಳಿನಿಂದ ಹೈರಾಣಾಗಿದ್ದಾರೆ.

ರಸ್ತೆ ಕಾಮಗಾರಿ ಲೋಕಸಭಾ ಚುನಾವಣೆಗಿಂತ 3 ತಿಂಗಳ ಮೊದಲು ಆರಂಭವಾಗಿತ್ತು. ಇದುವರೆಗೆ ಮುಗಿಯದೆ ಇರುವುದರಿಂದ ರಬಕವಿ, ರಾಮಪುರ, ಹೊಸೂರ ಮತ್ತು ಬನಹಟ್ಟಿ ಜನತೆಗೆ ಬಹಳಷ್ಟು ತೊಂದರೆಯಾಗಿದೆ.

ರಸ್ತೆಯು ಯಾವಾಗಲೂ ದೂಳಿನಿಂದ ತಿಂಬಿದೆ. ಇದರಿಂದಾಗಿ ರಸ್ತೆಯ ಬದಿಯಲ್ಲಿರುವ ಮನೆಗಳಿಗೆ, ಕಿರಾಣಿ, ಸ್ಟೇಷನರಿ, ಔಷಧ ಅಂಗಡಿಗಳು ಮತ್ತು ಆಸ್ಪತ್ರೆಗಳಿಗೆ ಬಹಳಷ್ಟು ಸಮಸ್ಯೆಯಾಗಿದೆ. ಇನ್ನೂ ಇದೇ ಮಾರ್ಗದ ಮೂಲಕ ಶಾಲಾ ಕಾಲೇಜುಗಳಿಗೆ ತೆರಳುವ ನೂರಾರು ವಿದ್ಯಾರ್ಥಿಗಳಿಗೆ ರಸ್ತೆಯ ಮೇಲಿನ ಕಲ್ಲುಗಳಿಂದ ಮತ್ತು ದೂಳಿನಿಂದ ಸಮಸ್ಯೆಯಾಗುತ್ತಿದೆ. ಇದು ರಬಕವಿ ಬನಹಟ್ಟಿ ನಗರಗಳ ಮಧ್ಯದಲ್ಲಿಯ ಪ್ರಮುಖ ರಸ್ತೆಯಾಗಿದೆ. ನಿತ್ಯ ಸಂಚರಿಸುವ ನೂರಾರು ದ್ವಿಚಕ್ರ ವಾಹನಗಳಿಗೆ, ಟಂಟಂ ಚಾಲಕರಿಗೆ ಮತ್ತು ವಾಹನ ಸವಾರರಿಗೆ ಬಹಳಷ್ಟು ತೊಂದರೆಯಾಗಿದೆ.