ಬೀಳಗಿ: ಅನಗವಾಡಿ ಹಳ್ಳಿಯಲ್ಲಿದೆ ‘ಸೂಪರ್‌ ಮಾರ್ಕೆಟ್‌’

ಬೀಳಗಿ: ಬಾಗಲಕೋಟೆ ಜಿಲ್ಲೆಯ ಬೀಳಗಿ ತಾಲ್ಲೂಕಿನ ಅನಗವಾಡಿ ಗ್ರಾಮದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದಿಂದ ‘ಸೂಪರ್ ಮಾರ್ಕೆಟ್’ ಆರಂಭಿಸಿ, ಗ್ರಾಮಸ್ಥರಿಗೆ ಅಗತ್ಯ ವಸ್ತುಗಳು ದೊರೆಯುವಂತೆ ಮಾಡಲಾಗಿದೆ. ಸಂಘಕ್ಕೆ ಸ್ವಂತ ಕಟ್ಟಡ ನಿರ್ಮಿಸಲಾಗಿದ್ದು, ಅದರಲ್ಲಿ ಸಹಕಾರ ಬ್ಯಾಂಕ್‌, ಗೊಬ್ಬರದ ಗೋದಾಮು, ಸಿಮೆಂಟ್ ಹಾಗೂ ಕಬ್ಬಿಣದ ವಸ್ತುಗಳ ಮಾರಾಟ ಕೇಂದ್ರ ಆರಂಭಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಲಾಗಿದೆ.

‘ಸೂಪರ್‌ ಮಾರ್ಕೆಟ್‌’ ಗೆಂದು ಪ್ರತ್ಯೇಕವಾಗಿ ಕಟ್ಟಡ ನಿರ್ಮಿಸಿ ಮಳಿಗೆ ಮಾಡಲಾಗಿದೆ. ಪಿಕೆಪಿಎಸ್ ಅಡಿಯಲ್ಲಿ ಸಭಾಂಗಣವನ್ನು ನಿರ್ಮಿಸಲಾಗಿದ್ದು, ಸಂಘದ ಚಟುವಟಿಕೆಗಳಿಗೆ ಬಳಸಲಾಗುತ್ತಿದೆ. ವಿವಿಧ ತರಬೇತಿಗೆ ಸಭಾಂಗಣವನ್ನು ಉಚಿತವಾಗಿ ಕೊಡಲಾಗುತ್ತಿದೆ. ರೈತರಿಗೆ ಅಗತ್ಯವಾದ ರಸಗೊಬ್ಬರ ವಿತರಿಸುವುದಕ್ಕಾಗಿ, ಪಡಿತರ ವಿತರಣೆ ಮಾಡುವುದಕ್ಕಾಗಿ ಗೋದಾಮನ್ನು ನಿರ್ಮಿಸಲಾಗಿದೆ.

ಈ ಹಳ್ಳಿಯ ಜನರು ಹಲವು ಕೆಲಸಗಳಿಗಾಗಿ ಬೀಳಗಿ ಪಟ್ಟಣಕ್ಕೋ ಅಥವಾ ಜಿಲ್ಲಾ ಕೇಂದ್ರವಾದ ಬಾಗಲಕೋಟೆ ನಗರಕ್ಕೋ ಹೋಗಬೇಕಾದ ಅನಿವಾರ್ಯತೆಯನ್ನು ತಪ್ಪಿಸುವ ಕೆಲಸವನ್ನು ಸಂಘದಿಂದ ಮಾಡಲಾಗಿದೆ. ಬಹಳಷ್ಟು ಅಗತ್ಯ ವಸ್ತುಗಳು ಹಾಗೂ ಸೇವೆ ಊರಲ್ಲೇ ದೊರೆಯುವಂತೆ ಮಾಡಲಾಗಿದೆ. ಸಂಸ್ಥಾಪಕ ಅಧ್ಯಕ್ಷ ಎಂ.ಬಿ.ಕಂಬಿ ನೇತೃತ್ವದಲ್ಲಿ ಈ ಸಂಘದಿಂದ ₹ 6 ಕೋಟಿವರೆಗೂ ಸಾಲ ಕೊಡಲಾಗಿದೆ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ನ ಎಟಿಎಂ ಕೂಡ ಈ ಸಂಘದ ಪಕ್ಕದಲ್ಲಿಯೇ ನಿರ್ಮಾಣವಾಗಿದೆ. ಈ ಸಂಘದಲ್ಲಿ 1,405 ಮಂದಿ ಸದಸ್ಯರಿದ್ದಾರೆ.

‘ಸಾಮಾನ್ಯವಾಗಿ ಸೂಪರ್‌ ಮಾರ್ಕೆಟ್‌ಗಳು ನಗರದಲ್ಲಿ ಇರುತ್ತವೆ. ಆದರೆ, ಈ ಸಹಕಾರಿ ಸಂಘದ ಅಧ್ಯಕ್ಷರು ಹಾಗೂ ನಿರ್ದೇಶಕ ಮಂಡಳಿಯ ಸಾಮಾಜಿಕ ಕಳಕಳಿಯಿಂದಾಗಿ ಅನಗವಾಡಿಯಲ್ಲಿ ನಿರ್ಮಾಣವಾಗಿದೆ. ಇಲ್ಲಿ ಎಲ್ಲ ರೀತಿಯ ಆಹಾರ ಪದಾರ್ಥಗಳು, ದಿನಬಳಕೆ ವಸ್ತುಗಳು, ಪ್ಲಾಸ್ಟಿಕ್ ಸಾಮಾನುಗಳು, ವಿದ್ಯಾರ್ಥಿಗಳ ಲೇಖನ ಸಾಮಗ್ರಿಗಳು, ಮದುವೆ ಮತ್ತು ಸಮಾರಂಭಗಳಿಗೆ ಬೇಕಾಗುವ ನೆನಪಿನ ಕಾಣಿಕೆಗಳು, ಐಸ್ ಕ್ರೀಂ ನಂತಹ ವಸ್ತುಗಳು ಸಿಗುತ್ತವೆ. ಶೇರುದಾರರಲ್ಲದೆ ಎಲ್ಲ ಗ್ರಾಹಕರಿಗೂ ಎಂ.ಆರ್.ಪಿ ದರದ ಮೇಲೆ ರಿಯಾಯಿತಿ ನೀಡುವುದರಿಂದ ಹೆಚ್ಚಿನ ಅನುಕೂಲವಾಗಿದೆ.

2021ರಲ್ಲಿ ಪ್ರಾರಂಭವಾದ ಈ ಸಂಸ್ಥೆಯು ಲಾಭದಾಯಕವಾಗಿದ್ದು, ನಾಲ್ವರು ಸಿಬ್ಬಂದಿ ಈ ಮಾರ್ಕೆಟ್ ನಲ್ಲಿ ಕಾರ್ಯನಿರ್ವಹಿಸುತ್ತಾರೆ ಎಂದು ಮುಖ್ಯ ಕಾರ್ಯನಿರ್ವಾಹಕ ಎಂ.ಎಸ್. ಮಠಪತಿ ಪ್ರಜಾವಾಣಿಗೆ ತಿಳಿಸಿದರು .

ಬೆಳಗ್ಗೆ 9 ರಿಂದ ರಾತ್ರಿ 8 ಗಂಟೆಯವರೆಗೆ ಸೂಪರ್ ಮಾರ್ಕೆಟ್ ಕಾರ್ಯನಿರ್ವಹಿಸುತ್ತದೆ. ಭಾನುವಾರ ರಜೆಯ ದಿನ.