ಬಾಗಲಕೋಟೆ: ಬೆಲೆ ಹೆಚ್ಚಳದಿಂದ ಹುಳಿಯಾದ ಟೊಮೆಟೊ

ಬಾಗಲಕೋಟೆ: ಮುಂಗಾರು ಮಳೆ ಸಂಭ್ರಮ ಮರೆಯಾಗುವಂತೆ ದಿನದಿಂದ ದಿನಕ್ಕೆ ತರಕಾರಿ ಬೆಲೆಗಳು ಹೆಚ್ಚುತ್ತಿವೆ. ಟೊಮೆಟೊ ಬೆಲೆ ಪ್ರತಿ ಕೆಜಿಗೆ ₹ 100ರ ಗಡಿ ಮುಟ್ಟಿದೆ.

ತರಕಾರಿ ಬೆಲೆ ಏರಿಕೆಗೆ ವರ್ತಕರು, ಮುನ್ನ ಮಳೆಯೇ ಆಗಿಲ್ಲ ಎನ್ನುತ್ತಿದ್ದರು. ಈಗ ಮಳೆಯಾಗಿದೆ, ಈಗಲೂ ತರಕಾರಿ ಬೆಲೆ ಬೇಸಿಗೆಗಿಂತ ಹೆಚ್ಚಾಗಿದೆ. 

ಎರಡು ವಾರಗಳಿಂದ ಪ್ರತಿ ಕೆಜಿಗೆ ₹40 ರಿಂದ ₹50ಕ್ಕೆ ಮಾರಾಟವಾಗುತ್ತಿದ್ದ ಟೊಮೆಟೊ ಈ ವಾರಕ್ಕೆ ಪ್ರತಿ ಕೆಜಿಗೆ ₹100 ಆಗಿದೆ. ಸಂತೆಯಲ್ಲಿ ಸಾಕಷ್ಟು ಟೊಮೆಟೊ ಇದ್ದರೂ ಜನರು ಖರೀದಿಗೆ ಹಿಂದೇಟು ಹಾಕುತ್ತಿದ್ದರು.

‘ಕೋಲಾರ ಕಡೆಯಿಂದ ಹೆಚ್ಚಿನ ಪ್ರಮಾಣದಲ್ಲಿ ಟೊಮೆಟೊ ಬರುತ್ತಿತ್ತು. ಮಳೆ ಹೆಚ್ಚಾಗಿ ಹಾಳಾಗಿರುವುದು, ರೋಗ ಬಾಧೆಯಿಂದ ಬರುತ್ತಿಲ್ಲ. ಹಾಗಾಗಿ, ಟೊಮೆಟೊ ಬೆಲೆಯಲ್ಲಿ ದಿಢೀರ್‌ ಹೆಚ್ಚಳವಾಗಿದೆ. ನಮಗೆ ಪ್ರತಿ ಕೆಜಿಗೆ ₹80 ರಿಂದ 90 ಬಿದ್ದಿದೆ’ ಎಂದು ವ್ಯಾಪಾರಿ ಶೇಖರ್ ಹೇಳಿದರು.

‘ಟೊಮೆಟೊ ಬೆಲೆ ಕೇಳಿ ಈ ವಾರ ಖರೀದಿ ಮಾಡಲಿಲ್ಲ. ಹುಣಸೆಹಣ್ಣು, ನಿಂಬೆ ಹಣ್ಣು ಬಳಸಿ ಅಡುಗೆ ಮಾಡಲಾಗುವುದು. ಉಳಿದ ತರಕಾರಿ, ಸೊಪ್ಪಿನ ಬೆಲೆಯೂ ಬಹಳ ಹೆಚ್ಚಳವಾಗಿದೆ’ ಎಂದು ಸುರೇಖಾ ನಾಯ್ಕ ಅಸಮಾಧಾನ ವ್ಯಕ್ತಪಡಿಸಿದರು.

ಪ್ರತಿ ಕೆಜಿಗೆ ₹80 ಇರುತ್ತಿದ್ದ ಹಿರೇಕಾಯಿಯ ಬೆಲೆ ಎರಡು ವಾರಗಳಿಂದ ₹120 ರಿಂದ 160ರವರೆಗೆ ಹೆಚ್ಚಾಗಿದೆ. ಸೌತೆಕಾಯಿ ₹120, ಗಜ್ಜರಿ ಬೆಲೆ ₹120ಕ್ಕೆ ಹೆಚ್ಚಾಗಿದೆ. ಪ್ರತಿ ಕೆಜಿಗೆ ₹25 ಇದ್ದ ಉಳ್ಳಾಗಡ್ಡಿಯ ಬೆಲೆ ಈಗ ₹40ಕ್ಕೆ ಮುಟ್ಟಿದೆ. ಬಹುತೇಕ ತರಕಾರಿಗಳ ಬೆಲೆಯೂ ಶತಕದ ಗಡಿ ದಾಟಿದ್ದು, ಗ್ರಾಹಕರ ಜೇಬಿಗೆ ಬಿಸಿ ಮುಟ್ಟಿಸುತ್ತಿವೆ.

ಕೊತ್ತಂಬರಿ ದೊಡ್ಡ ಕಟ್ಟಿಗೆ ₹40 ರಿಂದ ₹50 ಇದ್ದರೆ, ಸಣ್ಣದು ₹20 ಇತ್ತು. ಸಬ್ಬಸಿಗೆ ₹20 ರಿಂದ ₹30, ಕರಿಬೇವು ₹10 ರಿಂದ 15ಕ್ಕೆ ಹೆಚ್ಚಿದೆ. 

ಮಾರುಕಟ್ಟೆಯಲ್ಲಿ ತರಕಾರಿ ಬೆಲೆ ಹೆಚ್ಚಳವಾಗಿರುವುದರಿಂದ ಕೆಜಿ ಕೊಳ್ಳುತ್ತಿದ್ದ ಗ್ರಾಹಕರು, ಅರ್ಧ ಕೆಜಿಗೆ, ಅರ್ಧ ಕೆಜಿ ಕೊಳ್ಳುತ್ತಿದ್ದ ಗ್ರಾಹಕರು ಕಾಲು ಕೆಜಿ ಖರೀದಿ ಮಾಡುತ್ತಿದ್ದರು. ಮಾರುಕಟ್ಟೆಯಲ್ಲಿ ತರಕಾರಿಯ ಪ್ರಮಾಣವೇ ಕಡಿಮೆಯಾಗಿದೆ.