ಬಳ್ಳಾರಿ | ಚುನಾವಣೆ, ಗ್ಯಾರಂಟಿ ಗುಂಗು: ಅಭಿವೃದ್ಧಿಗೆ ಹಿನ್ನೆಡೆ

ಬಳ್ಳಾರಿ: ಸಾಧನಾ ಸಮಾವೇಶ, ವಿವಿಧ ಕಾಮಗಾರಿಗಳ ಶಂಕುಸ್ಥಾಪನೆ ಹಾಗೂ ಯೋಜನೆಗಳ ಉದ್ಘಾಟನೆಗೆಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಸಂಡೂರು ತಾಲೂಕಿಗೆ ಇಂದು ಬರುತ್ತಿದ್ದಾರೆ. ಜಿಲ್ಲೆಯ ಕಾಂಗ್ರೆಸ್‌ ಪಾಳಯ ಹಾರ ತುರಾಯಿಗಳನ್ನು ಹಿಡಿದು ನಿಂತಿದ್ದರೆ, ಸಂಘ–ಸಂಸ್ಥೆಗಳು, ಹೋರಾಟಗಾರರು ಪ್ರಶ್ನಾವಳಿಗಳನ್ನು ಎಸೆಯುತ್ತಿದ್ದಾರೆ.

ಸಿದ್ದರಾಮಯ್ಯ ಅವರು ‘ಭಾರತ್‌ ಜೋಡೊ ಯಾತ್ರೆ’ ಮತ್ತು ವಿಧಾನಸಭಾ ಚುನಾವಣೆ ವೇಳೆ ಬಳ್ಳಾರಿಗೆ ಬಂದು ಹೋಗಿದ್ದು ಬಿಟ್ಟರೆ, ವಿಶ್ವ ಯೋಗ ದಿನದ ಅಂಗವಾಗಿ ಜೂನ್‌ 21ರಂದು ತೋರಣಗಲ್‌ನ ಜಿಂದಾಲ್‌ಗೆ ಭೇಟಿ ಕೊಟ್ಟಿದ್ದೇ ಕೊನೆ. ಅಲ್ಲಿಂದ ಇಲ್ಲಿಯ ವರೆಗೆ ಅವರು ಜಿಲ್ಲೆಗೆ ಬಂದಿಲ್ಲ. ಆದರೆ, ಈ ಜಿಲ್ಲೆಗೆ ಅವರು ನೀಡಿರುವ ವಾಗ್ದಾನ ಮಾತ್ರ ಹಾಗೇ ಉಳಿದಿದೆ.

ಮುಖ್ಯಮಂತ್ರಿಯವರ ಇಂದಿನ ಭೇಟಿ ಗ್ಯಾರೆಂಟಿ ಯೋಜನೆಗಳ ಸಾಧನಾ ಸಮಾವೇಶದಂತೆ ಕಾಣುತ್ತಿದ್ದರೂ, ಇದು ಸಂಡೂರು ಉಪಚುನಾವಣಾ ಕಸರತ್ತಿನ ಆರಂಭ ಎಂಬ ಮಾತು ರಾಜಕೀಯ ಪಡಸಾಲೆಯಲ್ಲಿ ಕೇಳಿ ಬರುತ್ತಿದೆ. ನಾರಿಹಳ್ಳಕ್ಕೆ ಬಾಗಿನ ಅರ್ಪಿಸುತ್ತಿರುವುದೂ ಕಸರತ್ತಿನ ಒಂದು ಭಾಗ ಎಂದೂ ಹೇಳಲಾಗುತ್ತಿದೆ.

ಅಂದಹಾಗೆ, ನಾರಿಹಳ್ಳ ಜಲಾಶಯವೇನೋ ತುಂಬಿದೆ. ಅದರ ಒಡಲಿಗೆ ಸಂಡೂರಿನ ಗಣಿಗಾರಿಕೆಯ ಮಣ್ಣು ಬಂದು ಸೇರುತ್ತಿರುವ ಬಗ್ಗೆ, ನೀರು ಕೆಂಪಾಗಿ ಹರಿಯುತ್ತಿರುವ ಬಗ್ಗೆ ಮುಖ್ಯಮಂತ್ರಿ ಗಂಭೀರಾಗಿ ಯೋಚನೆ ಮಾಡಲಿ ಎನ್ನುತ್ತಾರೆ ಸಂಡೂರಿನ ಹೋರಾಟಗಾರರು. ಇತ್ತೀಚೆಗೆ ಸುರಿದ ಭಾರಿ ಮಳೆ ಸಂಡೂರಿನಲ್ಲಿ ಅವಾಂತರವನ್ನೇ ಸೃಷ್ಟಿ ಮಾಡಿತ್ತು. ಕೆಂಪನೆ ನೀರಿನಲ್ಲಿ ವಾಹನಗಳು ಮುಳುಗಿದ್ದ ದೃಶ್ಯಗಳು ಎಲ್ಲೆಡೆ ಹರಿದಾಡಿದ್ದವು. ಈಗ ಗಣಿಗಾರಿಕೆ ಕಾನೂನು ಬದ್ಧವಾಗಿ ನಡೆಯುತ್ತಿದೆಯಾದರೂ, ಈ ಅನಾಹುತಗಳಿಗೆ ಕಾರಣರಾರರು ಎಂಬ ಪ್ರಶ್ನೆಗಳನ್ನು ಅಲ್ಲಿನ ಜನ ಕೇಳುತ್ತಿದ್ದಾರೆ. ‌

ಜೀನ್ಸ್‌ ಪಾರ್ಕ್‌ ಎಲ್ಲಿ?: ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್‌ ದಿಗ್ಗಜ ನಾಯಕರೆಲ್ಲರೂ ಸೇರಿ ಬಳ್ಳಾರಿ ಜಿಲ್ಲೆಗೆ ನೀಡಿದ್ದ ‘ಜೀನ್ಸ್‌ ಪಾರ್ಕ್‌’ ಭರವಸೆ ಇನ್ನೂ ಈಡೇರಿಲ್ಲ. ಈ ಮಹತ್ವಾಕಾಂಕ್ಷಿ ಯೋಜನೆ ಜಾರಿ ವಿಚಾರದಲ್ಲಿ ಏನಾದರೂ ಬೆಳವಣಿಗೆಗಳಾಗಿವೆ ಎಂಬುದಕ್ಕೆ ಯಾರಿಂದಲೂ ಉತ್ತರವಿಲ್ಲ.

ಕೈಗಾರಿಕೆ, ಪರಿಹಾರ ಎಲ್ಲಿ?: ಕುಡುತಿನಿ ಭಾಗದಲ್ಲಿ ಕೈಗಾರಿಕೆ ಉದ್ದೇಶಕ್ಕಾಗಿ ರೈತರಿಂದ ವಶಕ್ಕೆ ಪಡೆಯಲಾದ ಭೂಮಿಗೆ ಪ್ರತಿಯಾಗಿ ನ್ಯಾಯಯುತ ಪರಿಹಾರ ನೀಡಬೇಕು ಎಂದು ಆಗ್ರಹಿಸಿ ಕುಡುತಿನಿ ಭೂಸಂತ್ರಸ್ತ ಹೋರಾಟಗಾರರು ಸರಿಸುಮಾರು ಎರಡು ವರ್ಷಗಳಿಂದ ನಿರಂತರವಾಗಿ ಹೋರಾಟ ಮಾಡುತ್ತಲೇ ಬರುತ್ತಿದ್ದಾರೆ. ಬಂದ್‌ ಮಾಡಿ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಆದರೆ, ಅವರಿಗೆ ಪರಿಹಾರ ಮಾತ್ರ ಸಿಕ್ಕಿಲ್ಲ.

ಬಳ್ಳಾರಿ ತಾಲೂಕಿನ ಕುಡುತಿನಿ, ಹರಗಿನಡೋಣಿ, ಜಾನೇಕುಂಟೆ, ವೇಣಿವೀರಪುರ, ಕೊಳಗಲ್ಲು, ಯಾರಂಗಳಿಗಿ, ಸಿದ್ದಮ್ಮನಹಳ್ಳಿ ಗ್ರಾಮಗಳಲ್ಲಿ ಕಳೆದ 14 ವರ್ಷಗಳಲ್ಲಿ ವಿವಿಧ ಕಂಪನಿಗಳಿಗಾಗಿ ಸುಮಾರು 12,500 ಎಕರೆ ಕೃಷಿ ಭೂಮಿಯನ್ನು ರೈತರಿಂದ ಕೆಐಡಿಬಿ ವಶಕ್ಕೆ ಪಡೆದಿದೆ. ಆದರೆ, ಯಾವೊಂದು ಕಂಪನಿಗಳೂ ಕಾರ್ಖಾನೆ ಆರಂಭಿಸಿಲ್ಲ.

ಭಾರತದ ನವರತ್ನ ಕಂಪನಿಗಳಲ್ಲಿ ಒಂದೆನಿಸಿಕೊಂಡಿರುವ ‘ರಾಷ್ಟ್ರೀಯ ಖನಿಜ ಅಭಿವೃದ್ಧಿ ನಿಗಮ (ಎನ್‌ಎಂಡಿಸಿ)’ ಉಕ್ಕಿನ ಕಾರ್ಖಾನೆ ಆರಂಭಿಸುವ ಹೆಸರಲ್ಲಿ ಒಟ್ಟು 2856 ಎಕರೆ ಭೂಮಿಯನ್ನು ಪಡೆದು ದಶಕವೇ ಕಳೆದ ಹೋಗಿದೆ. ತನ್ನದೇ ಸ್ವಂತದ ಗಣಿಯನ್ನೂ ಹೊಂದಿದೆ. ಆದರೂ ಈ ವರೆಗೆ ಈ ಕಂಪನಿ ಕಾರ್ಖಾನೆ ಆರಂಭಿಸಿಲ್ಲ. ₹50 ಸಾವಿರ ಕೋಟಿ ಹೂಡಿಕೆ ಸಾಧ್ಯತೆ ಇರುವ ಈ ಯೋಜನೆ ಏನಾಗಿದೆ ಎಂಬುದರ ಬಗ್ಗೆ ಸರ್ಕಾರ ಈ ವರೆಗೆ ಏನನ್ನೂ ಹೇಳಿಲ್ಲ. ಇದರಿಂದ ಸಾವಿರಾರರು ಜನರಿಗೆ ಉದ್ಯೋಗ ಸಿಗುವ ಸಾಧ್ಯತೆಗಳಿದ್ದರೂ ಸರ್ಕಾರ ಕೇಂದ್ರದೊಂದಿಗೆ ಈ ವಿಚಾರವನ್ನು ಚರ್ಚಿಸುವ ಗೋಜಿಗೇ ಹೋಗಿಲ್ಲ ಎಂದು ಹೇಳಲಾಗಿದೆ.

ಇನ್ನು ಜಿಂದಾಲ್‌ಗೆ ನೀಡಲಾದ ಭೂಮಿಗೆ ನಿಗದಿ ಮಾಡಿರುವ ಬೆಲೆಯ ಬಗ್ಗೆ ಮತ್ತು ಭೂಮಿಯನ್ನು ಮಾರಾಟ ಮಾಡುವುದಕ್ಕೇ ಸಂಘಟನೆಗಳಿಂದ ವಿರೋಧವಿದೆ. ಪಾದಯಾತ್ರೆಗಳು ನಡೆದಿವೆ. ಈ ಪ್ರತಿಭಟನೆಗಳ ಬಗ್ಗೆಯಾಗಲಿ, ಭೂಮಿ ನೀಡುವ ನಿರ್ಧಾರದಲ್ಲಿ ಯಾವುದಾದರೂ ಬದಲಾವಣೆಯಾಗಿದೆಯೇ ಎಂಬುದರ ಬಗ್ಗೆಯಾಗಲಿ ಸರ್ಕಾರ ನಿಲುವು ಸ್ಪಷ್ಟ ಪಡಿಸಿಲ್ಲ. ಸರ್ಕಾರ ತನ್ನ ನಿಲುವು ಸ್ಪಷ್ಟ ಪಡಿಸಬೇಕು ಎಂಬ ಒತ್ತಾಯ ಇವೆ.

ಇತ್ತೀಚೆಗೆ ನಡೆದ ಕಲಬುರಗಿ ಸಚಿವ ಸಂಪುಟದಲ್ಲಿ ಬಳ್ಳಾರಿ ಜಿಲ್ಲೆ ಭಾರಿ ನಿರೀಕ್ಷೆಗಳನ್ನು ಇಟ್ಟುಕೊಂಡಿತ್ತು. ಆದರೆ, ಸಂಪುಟದ ನಿರ್ಧಾರಗಳು ಜಿಲ್ಲೆಯನ್ನು ನಿರಾಶೆಗೆ ದೂಡಿದವು. ಸಚಿವ ಸಂಪುಟ ಸಭೆಗೆ ಬಳ್ಳಾರಿ ಜಿಲ್ಲೆಯಿಂದ ಹಲವು ಮಹತ್ವದ ಪ್ರಸ್ತಾವನೆಗಳು ಸಲ್ಲಿಕೆಯಾಗಿದ್ದವು. ಇದೇ ಕಾಂಗ್ರೆಸ್‌ ಪಕ್ಷದ ವರಿಷ್ಠ ನಾಯಕ ಭರವಸೆ ನೀಡಿದ್ದ ಜೀನ್ಸ್‌ ಪಾರ್ಕ್‌ ನಿರ್ಮಾಣ, ಬಳ್ಳಾರಿಗೆ ಸ್ವಂತದ ವಿಮಾನ ನಿಲ್ದಾಣ, ಒಣ ಮೆಣಸಿನಕಾಯಿ ಮಾರುಕಟ್ಟೆ, ಕಂಪ್ಲಿ–ಕುರುಗೋಡು ತಾಲೂಕುಗಳಲ್ಲಿ ರಸ್ತೆ ನಿರ್ಮಾಣ ಸೇರಿದಂತೆ ಹಲವು ಯೋಜನೆಗಳ ಬಗ್ಗೆ ಸರ್ಕಾರಕ್ಕೆ ಜಿಲ್ಲಾಡಳಿತ ಮನದಟ್ಟು ಮಾಡಿಕೊಟ್ಟಿತ್ತು. ಇದರ ಜತೆಗೆ ಇಲಾಖೆಗಳೂ ಸರ್ಕಾರಕ್ಕೆ ಪ್ರತ್ಯೇಕವಾಗಿ ಪ್ರಸ್ತಾವನೆ ಸಲ್ಲಿಸಿದ್ದವು.

ಪ್ರಸ್ತಾವನೆಗಳನ್ನೆಲ್ಲ ಪಡೆದ ಸರ್ಕಾರ ಬಳ್ಳಾರಿ ಕೋಟೆಗೆ ರೋಪ್‌-ವೇ, ಮಹಿಳಾ ಪದವಿ ಪೂರ್ವ ಕಾಲೇಜಿಗೆ ಕಟ್ಟಡ ನಿರ್ಮಾಣ, ಬಳ್ಳಾರಿಯ ವೈದ್ಯಕೀಯ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆಗೆ ಒಂದು ಎಂಆರ್‌ಐ ಯಂತ್ರ ಬಿಟ್ಟರೆ ಬೇರೇನನ್ನೂ ಪ್ರತ್ಯೇಕವಾಗಿ ಕೊಡಲೇ ಇಲ್ಲ. ಕಲ್ಯಾಣ ಕರ್ನಾಟಕ ಪ್ರಾಂತ್ಯದಲ್ಲಿ ಬಳ್ಳಾರಿಯನ್ನು ಮರ್ಜಿಗೆಂಬಂತೆ ಕಾಣುತ್ತಿರುವುದರ ಬಗ್ಗೆ ಜನರಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಇವುಗಳ ಬಗ್ಗೆ ಸಿಎಂ ಉತ್ತರಿಸುವರೇ ಎಂಬ ಪ್ರಶ್ನೆಗಳು ಸದ್ಯ ಮುನ್ನೆಲೆಗೆ ಬಂದಿವೆ.

ಇಡೀ ಕರ್ನಾಟಕದಲ್ಲೇ ಬೈಪಾಸ್‌ ಇಲ್ಲದ ಮಹಾನಗರ ಪಾಲಿಕೆ ಎಂಬ ಕುಖ್ಯಾತಿ ಬಳ್ಳಾರಿ ನಗರದ್ದಾಗಿದೆ. ಇದರ ಜತೆಗೆ, ತುಂಗಭದ್ರಾ ಜಲರಾಶಿಯ ಮಗ್ಗುಲಲ್ಲೇ ಇದ್ದರೂ ಬಳ್ಳಾರಿ ನಗರಕ್ಕೆ ನಿರಂತರ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲದ್ದರ ಬಗ್ಗೆ ಜನರಲ್ಲಿ ಮರುಕವಿದೆ. ಕರ್ನಾಟಕ ಗಣಿ ಪರಿಸರ ಪುನಶ್ಚೇತನ ನಿಗಮ (ಕೆಎಂಇಆರ್‌ಸಿ)ಯ ಅನುದಾನದಲ್ಲಿ ತುಂಗಭದ್ರಾ ಜಲಾಶಯದಿಂದ ನೇರ ಪೈಪ್‌ಲೈನ್‌ ಮಾಡಿ ಬಳ್ಳಾರಿ ನಗರಕ್ಕೆ ನೀರು ಪೂರೈಸುವುದಾಗಿ ಬಳ್ಳಾರಿ ನಗರ ಶಾಸಕರು ಹೇಳಿದ್ದಾರೆ. ಆದರೆ, ಯೋಜನೆಗೆ ಕೆಎಂಇಆರ್‌ಸಿ ಅನುಮತಿ ನೀಡಿದ ಬಗ್ಗೆ ಒಂದು ಸಣ್ಣ ದಾಖಲೆಯೂ ಲಭ್ಯವಿಲ್ಲ. ಒಟ್ಟಿನಲ್ಲಿ ನಗರಕ್ಕೆ ಶಾಶ್ವತ ಕುಡಿಯುವ ನೀರಿನ ವ್ಯವಸ್ಥೆಯಾಗಬೇಕು ಎಂಬುದು ಇಲ್ಲಿನವರ ಒತ್ತಾಯವಾಗಿದೆ.

ಪ್ರಾಧಿಕಾರಗಳು, ಪ್ರಶಸ್ತಿಗಳು,ವಿವಿ ನಾಮನಿರ್ದೇಶಿತ ಸ್ಥಾನಗಳಿಗೆ ಬಳ್ಳಾರಿಯವರಲ್ಲದವರನ್ನು, ಆಯ್ಕೆ ಮಾಡುತ್ತಿರುವ ಬಗ್ಗೆಯೂ ಆಕ್ಷೇಪಗಳಿವೆ.

ಬುಡಾಕ್ಕೆ ಬೇಕು ಕಾಯಕಲ್ಪ

ಪ್ರತಿಷ್ಠೆ, ಪಾಲು, ಸ್ವಹಿತಾಸಕ್ತಿ ಸಂಘರ್ಷದಿಂದ ಬಳ್ಳಾರಿ ನಗರಾಭಿವೃದ್ಧಿ ಪ್ರಾಧಿಕಾರ ಬಿಡಾ ಬಡವಾಗಿದೆ. ಬಳ್ಳಾರಿಯ ಅಭಿವೃದ್ಧಿಗೆ ಜಿಲ್ಲಾಡಳಿತ, ಮಹಾನಗರ ಪಾಲಿಕೆಯೊಂದಿಗೆ ಹೆಗಲು ಕೊಟ್ಟು ನಿಲ್ಲಬೇಕಿದ್ದ ಪ್ರಾಧಿಕಾರ ಇಂದು ಕೇವಲ ಅನುಮತಿ ಮಂಜೂರಾತಿ ಪ್ರಾಧಿಕಾರವಾಗಿ ಉಳಿದಿದೆ. ಬಡಾವಣೆಗಳ ಮಂಜೂರಾತಿಗಷ್ಟೇ ಸೀಮಿತವಾಗಿರುವ ಪ್ರಾಧಿಕಾರಕ್ಕೆ ಕಾಯಕಲ್ಪ ಬೇಕು. ನಗರದ ವ್ಯವಸ್ಥಿತ ಅಭಿವೃದ್ಧಿಗೆ ಯೋಜನೆಗಳನ್ನು ರೂಪಿಸಬೇಕು. ಎಲ್ಲಕ್ಕೂ ಮುಖ್ಯವಾಗಿ ಪ್ರಾಧಿಕಾರದೊಳಗಿನ ಮುಸುಕಿನ ಗುದ್ದಾಟಗಳು ಕೊನೆಯಾಗಬೇಕು ಎಂಬ ಒತ್ತಾಯ ಕೇಳಿ ಬಂದಿದೆ.

ಸ್ವತಂತ್ರ ಉಸ್ತುವಾರಿ ಬೇಕು

ಬಳ್ಳಾರಿ ಜಿಲ್ಲೆಯ ಉಸ್ತುವಾರಿಯನ್ನು ವಿಜಯನಗರ ಜಿಲ್ಲಾ ಉಸ್ತುವಾರಿ ಸಚಿವ ಬಿ.ಝಡ್‌ ಜಮೀರ್‌ ಅಹಮದ್‌ ಅವರಿಗೆ ವಹಿಸಲಾಗಿದೆ. ಬೆಂಗಳೂರಿನವರಾದ ಅವರಿಗೆ ವಿಜಯನಗರ ಉಸ್ತುವಾರಿಯೇ ಹೊರೆಯಾಗಿತ್ತು. ಅದರ ನಡುವೆ ಬಳ್ಳಾರಿ ಉಸ್ತುವಾರಿ ವಹಿಸಿರುವುದು ಅವರಿಗೆ ಹೊರಲಾಗದಂತಾಗಿದೆ ಎಂಬ ಆರೋಪಗಳು ಜನರಿಂದ ಕೇಳಿ ಬಂದಿದೆ. ಇತ್ತೀಚೆಗೆ ನಡೆದ ಕೆಡಿಪಿ ಸಭೆ ಕೆಲವೇ ಗಂಟೆಗಳಲ್ಲಿ ಪೂರ್ಣವಾಗಿದ್ದು, ಜತೆಗೆ ಸಚಿವರು ಜಿಲ್ಲೆಯಲ್ಲಿ ಕಚೇರಿಯನ್ನೂ ಆರಂಭಿಸಿಲ್ಲದಿರುವುದು ಈ ಮಾತಿಗೆ ಪುಷ್ಟಿ ನೀಡುವಂತಿದೆ.