ಕಾಂಗ್ರೆಸ್‌ ಔಟ್‌ ಗೋಯಿಂಗ್‌, ಬಿಜೆಪಿ ಇನ್‌ ಕಮಿಂಗ್‌: ರೇಣುಕಾಚಾರ್ಯ

ಬಳ್ಳಾರಿ: ‘ಕಾಂಗ್ರೆಸ್ ಔಟ್ ಗೋಯಿಂಗ್, ಬಿಜೆಪಿ ಇನ್ ಕಮಿಂಗ್ ಆಗುತ್ತಿದೆ. ಮುಂದಿನ ಬಾರಿ ರಾಜ್ಯದಲ್ಲಿ ಬಿಜೆಪಿ ಸರ್ಕಾರ ರಚನೆಯಾಗುವುದು ಶತಸಿದ್ದ’ ಎಂದು ಮಾಜಿ ಸಚಿವ ಎಂ.ಪಿ ರೇಣುಕಾಚಾರ್ಯ ವ್ಯಂಗ್ಯವಾಡಿದ್ದಾರೆ. 

ಸಂಡೂರಿನಲ್ಲಿ ಗುರುವಾರ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ರಾಜ್ಯ ಸರ್ಕಾರ ಭ್ರಷ್ಟಾಚಾರದಲ್ಲಿ ತೊಡಗಿದೆ. ವಾಲ್ಮೀಕಿ ನಿಗಮ ಹಗರಣದ ಹಣ ಚುನಾವಣೆಗೆ ಬಳಕೆಯಾಗಿದೆ. ಹೀಗಾಗಿ ಕಾಂಗ್ರೆಸ್‌ ಸರ್ಕಾರ ಹೋಗಿ ನಮ್ಮ ಸರ್ಕಾರ ಬರಲಿದೆ’ ಎಂದರು. 

‘ರಾಜ್ಯದಲ್ಲಿ ಗಣಿಗಾರಿಕೆ ರಫ್ತು ತಡೆಹಿಡಿದಿದ್ದೇ ಬಿ.ಎಸ್‌ ಯಡಿಯೂರಪ್ಪ ಎನ್ನುವುದನ್ನು ಸಂಡೂರಿನ ಜನ ಮರೆಯಬಾರದು. ಯಡಿಯೂರಪ್ಪ ರಾಜ್ಯದ ಸರ್ವಾಂಗೀಣ ಅಭಿವೃದ್ಧಿಗೆ ಯೋಜನೆ ರೂಪಿಸಿದ್ದರು’ ಎಂದು ತಿಳಿಸಿದರು. 

‘ತುಕಾರಾಂ ನಾಲ್ಕು ಬಾರಿ ಶಾಸಕರಾದರೂ ಸಂಡೂರಿನ ಅಭಿವೃದ್ಧಿ ಮರಿಚಿಕೆಯಾಗಿದೆ. ಪ್ರಚಾರಕ್ಕೆ ಹೋದಾಗ ಇದೆಲ್ಲವೂ ಬಹಿರಂಗವಾಗಿದೆ. ನಂಜುಂಡಪ್ಪ ವರದಿ ಪ್ರಕಾರ ರಾಜ್ಯದಲ್ಲಿ ಅತಿ ಹಿಂದುಳಿದ ತಾಲ್ಲೂಕು ಎಂಬ ಹಣೆಪಟ್ಟಿಯನ್ನು ಸಂಡೂರು ಹೊತ್ತಿದೆ’ ಎಂದರು. 

‘ಬದಲಾವಣೆ ಪರ್ವ ಸಂಡೂರಿನಿಂದ ಆರಂಭವಾಗಲಿದೆ. ಮೂರು ಕ್ಷೇತ್ರಗಳ ಉಪ ಚುನಾವಣೆಯಲ್ಲಿ ಗೆದ್ದೆ ಗೆಲ್ಲುತ್ತೇವೆ. ಚನ್ನಪಟ್ಟಣದಲ್ಲಿ ಯಡಿಯೂರಪ್ಪ ಪ್ರಚಾರದಿಂದ ಪರಿಸ್ಥಿತಿಯೇ ಬದಲಾಗಿದೆ. ಕಾಂಗ್ರೆಸಿಗೆ ತಕ್ಕ ಪಾಠ ಕಲಿಸುತ್ತೇವೆ’ ಎಂದು ಹೇಳಿದರು.