ನಾನು ಏನೆಂದು ಮತ್ತೆ ತೋರಿಸುವೆ: ಪೊಲೀಸ್‌ ಅಧಿಕಾರಿಗೆ ಜನಾರ್ದನ ರೆಡ್ಡಿ ಎಚ್ಚರಿಕೆ

ಸಂಡೂರು: ‘ಪೊಲೀಸರು ಅಧಿಕಾರವನ್ನು ದುರುಪಯೋಗ ಮಾಡಿಕೊಂಡಿದ್ದೇ ಆದಲ್ಲಿ ನಾನು ಏನು ಎಂದು ಇನ್ನೊಮ್ಮೆ ತೋರಿಸಬೇಕಾಗುತ್ತದೆ’ ಎಂದು ಶಾಸಕ ಜನಾರ್ದನ ರೆಡ್ಡಿ ಎಚ್ಚರಿಕೆ ನೀಡಿದರು. 

ಕಾರ್ಯಕ್ರಮವೊಂದರಲ್ಲಿ ಭಾನುವಾರ ಮಾತನಾಡಿದ ಅವರು, ‘ಮಹೇಶ್ ಗೌಡ ಎಂಬ ಸರ್ಕಲ್‌ ಇನ್‌ಸ್ಪೆಕ್ಟರ್‌ ಕಾಂಗ್ರೆಸ್ ಪರವಾಗಿ ಪ್ರಚಾರ ಮಾಡುತ್ತಿರುವ ಆಡಿಯೊ ನನಗೆ ಸಿಕ್ಕಿತು.  ನನ್ನ ಮೂವತ್ತು ವರ್ಷಗಳ ರಾಜಕೀಯ ಜೀವನದಲ್ಲಿ ಸಿಬಿಐ ಅಧಿಕಾರಿಗಳನ್ನೇ ನೋಡಿದ್ದೇನೆ ನೀನ್ಯಾವ ಲೆಕ್ಕ ಎಂದು ಕರೆ ಮಾಡಿ ಹೇಳಿದ್ದೇನೆ’ ಎಂದರು. 

‘ಕಾಂಗ್ರೆಸ್ ಕಾರ್ಯಕರ್ತನ ರೀತಿ ಅವನು ಕೆಲಸ ಮಾಡುತ್ತಿದ್ದಾನೆ. ಪೊಲೀಸರು ಅಧಿಕಾರ ದುರುಪಯೋಗ ಮಾಡಿಕೊಂಡಿದ್ದೇ ಆದಲ್ಲಿ ನಾನು ಏನು ಎಂದು ಇನ್ನೊಮ್ಮೆ ತೋರಿಸಬೇಕಾಗುತ್ತದೆ’ ಎಂದು ಎಚ್ಚರಿಸಿದರು.