ಬಳ್ಳಾರಿ | ವಿದ್ಯುತ್ ದರ ಏರಿಕೆ ಅವೈಜ್ಞಾನಿಕ: ಕರ್ನಾಟಕ ರಕ್ಷಣಾ ವೇದಿಕೆ

ಕುಡುತಿನಿ (ತೋರಣಗಲ್ಲು): ರಾಜ್ಯ ಸರ್ಕಾರದ ವಿದ್ಯುತ್ ದರ ಏರಿಕೆಯು ಅವೈಜ್ಞಾನಿಕವಾಗಿದ್ದು, ಎಲ್ಲ ವರ್ಗದ ಜನರ ಅನುಕೂಲಕ್ಕಾಗಿ ಬೆಲೆ ಏರಿಕೆಯ ಆದೇಶವನ್ನು ಸರ್ಕಾರವು ತ್ವರಿತವಾಗಿ ಹಿಂಪಡೆಯುವಂತೆ ಕುಡುತಿನಿಯ ಕರವೇ ಮುಖಂಡರು ಒತ್ತಾಯಿಸಿದ್ದಾರೆ.

ಕರ್ನಾಟಕ ರಕ್ಷಣಾ ವೇದಿಕೆಯ ಕಾವಲು ಪಡೆಯ ಮುಖಂಡರು ಜೆಸ್ಕಾಂ ಕಚೇರಿಯ ಆವರಣದಲ್ಲಿ ಮಂಗಳವಾರ ಕೆಲಕಾಲ ಪ್ರತಿಭಟನೆ ನಡೆಸಿ, ಸರ್ಕಾರದ ವಿರುದ್ಧ ಘೋಷಣೆ ಕೂಗುತ್ತಾ, ಕಚೇರಿ ಸಿಬ್ಬಂದಿ ಆನಂದ ಅವರಿಗೆ ಮನವಿ ಸಲ್ಲಿಸಿದರು.

ಕರ್ನಾಟಕ ರಕ್ಷಣಾ ವೇದಿಕೆಯ ಕಾವಲು ಪಡೆಯ ಅಧ್ಯಕ್ಷ ತಿಮ್ಮಪ್ಪ ಮಾತನಾಡಿ, ‘ರಾಜ್ಯ ಸರ್ಕಾರವು ವಿದ್ಯುತ್ ಬೆಲೆಯನ್ನು ಏಕಾಏಕಿಯಾಗಿ ಹೆಚ್ಚಿಸಿದ್ದರಿಂದ ಸಾಮಾನ್ಯ ಜನರು, ವಿವಿಧ ಕ್ಷೇತ್ರಗಳ ವರ್ತಕರು ಹೆಚ್ಚುವರಿ ವಿದ್ಯತ್ ಬೆಲೆಯಿಂದ ಹೆಚ್ಚಿನ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಎಲ್ಲ ವರ್ಗದ ಜನರ ಆರ್ಥಿಕ ಸುಗಮ ಜೀವನಕ್ಕಾಗಿ ರಾಜ್ಯ ಸರ್ಕಾರವು ತ್ವರಿತವಾಗಿ ಈ ಅವೈಜ್ಞಾನಿಕ ವಿದ್ಯುತ್ ಬೆಲೆಯ ಆದೇಶವನ್ನು ಹಿಂಪಡೆಯಬೇಕು’ ಎಂದು ಒತ್ತಾಯಿಸಿದರು.

ಮುಖಂಡರಾದ ಬಾವಿ ಶಿವಕುಮಾರ್, ಎ.ರಾಜಾ, ದೇವೇಂದ್ರಪ್ಪ, ರಮೇಶ್, ತಾಯಪ್ಪ, ಶಂಕರ, ಮಾಲಿಂಗ ಇದ್ದರು.