ಕಡಿಮೆ ಪರಿಹಾರ ವಿರೋಧಿಸಿ ಪ್ರತಿಭಟನೆ

ತೋರಣಗಲ್ಲು: ಹೋಬಳಿಯ ವಿಠಲಾಪುರ ಗ್ರಾಮದ ಅಂಬೇಡ್ಕರ್ ಕಾಲೊನಿಯ ನಿವಾಸಿ ಸಣ್ಣಬಾಬು ಅವರ ಮನೆಯು ನಿರಂತರ ಮಳೆಗೆ ಹಂತ ಹಂತವಾಗಿ ಸಂಪೂರ್ಣವಾಗಿ ಕುಸಿದು ಬಿದ್ದಿದ್ದು ಸರ್ಕಾರವು ಕಡಿಮೆ ಪರಿಹಾರ ನೀಡಿರುವುದನ್ನು ವಿರೋಧಿಸಿ ಕುಟುಂಬಸ್ಥರು ಸೋಮವಾರ ಕುಸಿದ ಮನೆಯಲ್ಲೆ ಪ್ರತಿಭಟನೆ ನಡೆಸಿದರು.

‘ನಿರಂತರ ಮಳೆಯಿಂದ ಕುಸಿದ ಮನೆಗೆ ಸರ್ಕಾರ ಮೊದಲ ಕಂತಿನಲ್ಲಿ ₹4,000, ಎರಡನೇ ಕಂತಿನಲ್ಲಿ ₹2,500 ಒಟ್ಟು ₹6,500 ಪರಿಹಾರ ಸಿಕ್ಕಿದೆ. ನಮ್ಮ ಕಾಲೊನಿಯಲ್ಲಿ ಬಿದ್ದಿರುವ ಬೇರೆಯವರ ಮನೆಗೆ ₹1.20 ಲಕ್ಷ ಪರಿಹಾರ ಒಂದೇ ಕಂತಿನಲ್ಲಿ ನೀಡಿದ್ದಾರೆ. ಕಂದಾಯ ಇಲಾಖೆಯ ಅಧಿಕಾರಿಗಳ ಎಡವಟ್ಟಿ ನಿಂದ ನಮಗೆ ಕಡಿಮೆ ಪರಿಹಾರ ಬಂದಿದೆ. ಅಧಿಕಾರಿಗಳನ್ನು ವಿಚಾರಿಸಿದರೇ ಸರಿಯಾಗಿ ಸ್ಪಂದಿಸುತ್ತಿಲ್ಲ’ ಎಂದು ಮನೆಯ ಮಾಲೀಕ ಸಣ್ಣಬಾಬು ದೂರಿದರು.

‘ಗ್ರಾಮದಲ್ಲಿ ನಿರಂತರ ಮಳೆಗೆ ಈ ವರ್ಷ 8 ಮನೆಗಳು ಬಿದ್ದಿದ್ದು ಎಲ್ಲ ಮನೆಗಳ ಮಾಹಿತಿಯನ್ನು ಸರ್ಕಾರಕ್ಕೆ ವರದಿ ಕಳಿಸಲಾಗಿದೆ. ಕಡಿಮೆ ಪರಿಹಾರ ಬಂದಿರುವ ಫಲಾನುಭವಿಗಳು ಸಂಡೂರು ತಾಲ್ಲೂಕಿನ ಕಂದಾಯ ಇಲಾಖೆಯನ್ನು ಅಧಿಕಾರಿಗಳನ್ನು ಸಂಪರ್ಕಿಸಬೇಕು’ ಎಂದು ವಿಠಲಾಪುರ ಗ್ರಾಮ ಪಂಚಾಯಿತಿಯ ಪಿಡಿಒ ಗಂಗಾಧರ ಪ್ರತಿಕ್ರಿಯಿಸಿದರು.