ಕಂಪ್ಲಿ: ಕಾಲುವೆಯಲ್ಲಿ ಹೂಳು ತಪ್ಪದ ರೈತರ ಗೋಳು

ಕಂಪ್ಲಿ: ತಾಲ್ಲೂಕಿನ ಉಪ್ಪಾರಹಳ್ಳಿ, ಮೆಟ್ರಿ, ದೇವಲಾಪುರ, ಜವುಕು ಮತ್ತು ದೇವಸಮುದ್ರ ಗ್ರಾಮ ವ್ಯಾಪ್ತಿಯ ಸುಮಾರು 6100ಎಕರೆ ಭೂಮಿಗೆ ನೀರು ಒದಗಿಸುವ ತುಂಗಭದ್ರಾ ಎಚ್.ಎಲ್.ಸಿ ನಂ.2 ವಿತರಣಾ ನಾಲೆ ದಶಕದಿಂದ ದುರಸ್ತಿ ಕಾಣದೆ ರೈತರು ಸಂಕಷ್ಟ ಅನುಭವಿಸುತ್ತಿದ್ದಾರೆ.

ಎಚ್.ಎಲ್.ಸಿ ಮುಖ್ಯ ಕಾಲುವೆಯಿಂದ ನಂ.2 ವಿತರಣಾ ನಾಲೆಗೆ 40ಕ್ಯುಸೆಕ್ ನೀರು ನಿಗದಿಯಾಗಿದೆ. ಅದರಲ್ಲಿ ಉಪ ಕಾಲುವೆಗಳಾದ 1ಆರ್ ಕಾಲುವೆಗೆ 8.7ಕ್ಯುಸೆಕ್, 4ಎಲ್ ಕಾಲುವೆಗೆ 4.97ಕ್ಯುಸೆಕ್, 2ಎಲ್ 1.21ಕ್ಯುಸೆಕ್, 3ಆರ್ 1.33ಕ್ಯುಸೆಕ್, 5ಆರ್ 5.33ಕ್ಯುಸೆಕ್, 6ಎಲ್ 4.92ಕ್ಯುಸೆಕ್, 7ಆರ್ 8.34ಕ್ಯುಸೆಕ್ ಮತ್ತು 8ಟಿಇ ಕಾಲುವೆಗೆ 4.31ಕ್ಯುಸೆಕ್ ನೀರು ಪೂರೈಕೆಯಾಗುತ್ತದೆ.

ಆರಂಭದಲ್ಲಿ ಈ ಕಾಲುವೆಗಳ ವ್ಯಾಪ್ತಿಯಲ್ಲಿ ಮಿತ ನೀರಾವರಿ ಬೆಳೆಗಳನ್ನು ಬೆಳೆಯಲು ಮಾತ್ರ ಅವಕಾಶವಿತ್ತು. ಆದರೆ, ರೈತರು ಕ್ರಮೇಣ ವಾಣಿಜ್ಯ ಬೆಳೆಯಾದ ಭತ್ತದ ಕಡೆ ಹೆಚ್ಚು ಆಸಕ್ತಿ ವಹಿಸಿದ್ದರಿಂದ ಏಕಾಏಕಿ ನೀರಿನ ಕೊರತೆ ಪ್ರಮುಖವಾಗಿ ಕಾಣಿಸಿಕೊಂಡಿದೆ.

ಕಾಲುವೆ ನೀರಿನ ಸಮಸ್ಯೆ ಎದುರಾಗಿದ್ದರಿಂದ ಕೆಲ ರೈತರು ಬೋರ್ ವೆಲ್ ಹಾಕಿಸಿಕೊಂಡಿದ್ದು, ಸಮತೋಲನ ಕಾಪಾಡಿಕೊಳ್ಳುತ್ತಿದ್ದಾರೆ. ಆದರೆ, ಶೇ 80ರಷ್ಟು ರೈತರು ಇನ್ನು ಕಾಲುವೆ ನೀರನ್ನೇ ಆವಲಂಬಿಸಿದ್ದಾರೆ.

2014ರಲ್ಲಿ ಕಾಲುವೆ ದುರಸ್ತಿ ಭಾಗ್ಯ ಕಂಡಿದ್ದು ಬಿಟ್ಟರೆ ಇಲ್ಲಿಯವರೆಗೆ ಕನಿಷ್ಠ ನಿರ್ವಹಣೆಯೂ ಇಲ್ಲ. ಈ ಕಾರಣದಿಂದ ಕಾಲುವೆಗಳು ಮೂಲ ಸ್ವರೂಪಗಳನ್ನೇ ಕಳೆದುಕೊಂಡಿವೆ.

ಕಾಲುವೆ ಭಾಗದಲ್ಲಿ ಒಂದೆರೆಡು ತೂಬುಗಳು (ನೀರುಗಂಡಿ) ಸರಿ ಇರುವುದು ಬಿಟ್ಟರೆ ಇನ್ನುಳಿದ ಕಾಲುವೆ ತೂಬುಗಳು ಹಾಳಾಗಿವೆ. ಕಾಲುವೆಯ ಪಾಶ್ರ್ವಗೋಡೆಗಳು ಅಲ್ಲಲ್ಲಿ ಶಿಥಿಲವಾಗಿ ನೀರು ಸೋರಿಕೆಯಾಗುತ್ತಿದೆ. ಇನ್ನು ಗಿಡಗಂಟೆಗಳು, ಕಾಲುವೆ ಮಧ್ಯ ಭಾಗದಲ್ಲಿ ಕಲ್ಲು ಗುಂಡುಗಳು, ಯಥೇಚ್ಛ ತ್ಯಾಜ್ಯ ತುಂಬಿರುವುದು ಕಂಡುಬರುತ್ತದೆ.

ಈ ಎಲ್ಲ ಕಾರಣಗಳಿಂದ ಕಾಲುವೆ ಕೊನೆ ಅಂಚಿಗೆ ಸಕಾಲಕ್ಕೆ ನೀರು ತಲುಪದೆ ಕೃಷಿ ಚಟುವಟಿಕೆಗೆ ಪ್ರತಿ ವರ್ಷ ಹಿನ್ನಡೆಯಾಗಿ ಇಳುವರಿ ಕುಸಿಯುತ್ತಿದೆ ಎಂದು ರೈತರು ಬೇಸರದಿಂದ ತಿಳಿಸುತ್ತಾರೆ.