ಸಿರುಗುಪ್ಪ: ಜಿಟಿ, ಜಿಟಿ ಮಳೆ ಜತೆ ಮೋಡ ಕವಿದ ವಾತಾವರಣ

ಸಿರುಗುಪ್ಪ: ತಾಲ್ಲೂಕಿನಾದ್ಯಾಂತ ಬುಧವಾರ ಬೆಳಗಿನ ಜಾವದಿಂದ ತುಂತುರು ಮಳೆಯಾಯಿತು. ಮೋಡ ಕವಿದ ವಾತಾವರಣ ವಿದ್ದು ಜಿಟಿ, ಜಿಟಿ ಸುರಿದ ಮಳೆಯಿಂದ ಜನಜೀವನ ಅಸ್ತವ್ಯಸ್ತವಾಯಿತು.

ಬೆಳಗಿನಿಂದ ಮಧ್ಯಾಹ್ನದವರೆಗೆ ಮೋಡಕವಿದ ವಾತಾವರಣದಲ್ಲಿ ತುಂತು ಮಳೆ ಇದ್ದು, ಮಧ್ಯಾಹ್ನದ ನಂತರ ಬಿರುಸಿನ ಮಳೆಯಾಯಿತು. ತಾಲ್ಲೂಕು ಬುಧವಾರ ಇಡೀ ದಿನ ಮಲೆನಾಡು ಪ್ರದೇಶದಂತೆ ಕಂಗೊಳಿಸಿತು, ಜಿಟಿ ಜಿಟಿ ಮಳೆಯಿಂದಾಗಿ ಕರಾವಳಿಯ ವಾತಾವರಣ ಕಂಡುಬಂದಿತು.ಶೀತ ಹವೆ ಜನರನ್ನು ಕಾಡಿತು.

ಮುಂಜಾನೆ 5:30ಕ್ಕೆ ಆರಂಭವಾದ ಜಿಟಿ ಜಿಟಿ ಮಳೆಯು ರಾತ್ರಿಯವರೆಗೂ ಮುಂದುವರಿತು. ಸ್ವಲ್ಪ ಹೊತ್ತು ಜೋರಾಗಿ ಬರುವುದು ಮತ್ತು ನಿಲ್ಲುವದರಿಂದ ಕೆಲಸಕ್ಕೆ ಹೋಗುವ ರೈತರು, ಕೃಷಿ ಕಾರ್ಮಿಕರು, ಕೂಲಿ ಕಾರ್ಮಿಕರು, ಉದ್ಯೋಗಿಗಳಿಗೆ, ವ್ಯಾಪಾರಿಗಳಿಗೆ, ಸರ್ಕಾರಿ ನೌಕರರಿಗೆ ತೊಂದರೆಯಾಯಿತು. ದ್ವಿಚಕ್ರ ವಾಹನಗಳಲ್ಲಿ, ಕಾಲು ನಡಿಗೆಯಲ್ಲಿ ಸಾಗುತ್ತಿದ್ದವರು ಅನಿವಾರ್ಯವಾಗಿ ಆಟೋಗಳನ್ನು ಅವಲಂಬಿಸಬೇಕಾಯಿತು. ನಿರಂತರ ಮಳೆಯಿಂದಾಗಿ ಜನಸಾಮಾನ್ಯರ ಓಡಾಟಕ್ಕೂ ತೋಂದರೆಯಾಯಿತು.