ಬಿರುಕು ಬಿಟ್ಟ ಗೋಡೆ, ಸೋರುವ ಚಾವಣಿ: ಇದು ಬಿಜ್ಜವಾರ ಸರ್ಕಾರಿ ಶಾಲೆಯ ಸ್ಥಿತಿ

ವಿಜಯಪುರ(ದೇವನಹಳ್ಳಿ): ಮಳೆ ಬಂದರೆ ಸೋರುವ ಚಾವಣಿ. ಒಡೆದು ಹೋಗಿರುವ ಚಾವಣಿ ಶೀಟ್‌ಗಳ ನಡುವೆ ಶಿಕ್ಷಣ ಪಡೆಯುತ್ತಿರುವ ವಿದ್ಯಾರ್ಥಿಗಳು. 

ಇದು ಬಿಜ್ಜವಾರ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಸ್ಥಿತಿ. ಹಿಂದೆ ನೂರಾರು ಮಂದಿ ವಿದ್ಯಾರ್ಥಿಗಳು ಓದುತ್ತಿದ್ದ ಈ ಶಾಲೆಯಲ್ಲಿ ಪ್ರಸಕ್ತ ಸಾಲಿನಲ್ಲಿ 59 ಮಂದಿ ವಿದ್ಯಾರ್ಥಿಗಳಿದ್ದಾರೆ.

ದಿನೇ ದಿನೇ ಶಾಲೆಗೆ ದಾಖಲಾಗುವ ವಿದ್ಯಾರ್ಥಿಗಳ ಸಂಖ್ಯೆ ಕುಸಿತವಾಗುತ್ತಿದೆ. 3 ಮಂದಿ ಶಿಕ್ಷಕರಿದ್ದಾರೆ. ಇಲ್ಲಿರುವ 7 ಕೊಠಡಿಗಳ ಪೈಕಿ 4 ನಾಲ್ಕು ಕೊಠಡಿಗಳಲ್ಲಿ ಮಕ್ಕಳು ಕಲಿಯುತ್ತಿದ್ದಾರೆ. ಕಲಿಯುತ್ತಿರುವ ಕೊಠಡಿಗಳ ಪೈಕಿ 2 ಕೊಠಡಿಗಳು ಸೋರುತ್ತಿವೆ. ಉಳಿದ ಕೊಠಡಿಗಳು ಬಳಕೆಗೆ ಯೋಗ್ಯವಾಗಿಲ್ಲ. 1974ರಲ್ಲಿ ನಿರ್ಮಾಣವಾಗಿರುವ ಈ ಶಾಲೆ ಕಟ್ಟಡ ಶಿಥಿಲಾವಸ್ಥೆ ತಲುಪಿದೆ. ಹಳೆ ಕಟ್ಟಡವನ್ನು ತೆರವುಗೊಳಿಸಿ, ನೂತನ ಕಟ್ಟಡ ನಿರ್ಮಾಣ ಮಾಡಿಕೊಡುವಂತೆ ಎಷ್ಟೇ ಮನವಿ ಸಲ್ಲಿಸಿದರೂ ಏನೂ ಪ್ರಯೋಜನವಾಗಿಲ್ಲ ಎಂದು ಶಾಲಾಭಿವೃದ್ಧಿ ಸಮಿತಿ ಸದಸ್ಯರು ದೂರುತ್ತಾರೆ.

ಸಿಮೆಂಟ್ ಶೀಟ್ ಚಾವಣಿ ಹೊಂದಿರುವ ಕೊಠಡಿಗಳಲ್ಲಿ ಬೆಳಿಗ್ಗೆಯಿಂದ ಸಂಜೆವರೆಗೂ ವಿದ್ಯುತ್ ದೀಪಗಳ ಸಹಾಯದಿಂದಲೇ ಮಕ್ಕಳು ಕಲಿಯಬೇಕಾಗಿದೆ. ವಿದ್ಯುತ್ ಹೋದರೆ ಕೊಠಡಿಗಳಲ್ಲಿ ಕತ್ತಲು ಆವರಿಸಿಕೊಳ್ಳುತ್ತದೆ. ಶಾಲೆ ಆವರಣದಲ್ಲಿರುವ ಅಡುಗೆ ಕೋಣೆಯು ಶಿಥಿಲವಾಗಿದೆ.  ಪಕ್ಕದಲ್ಲಿರುವ ಇನ್ನೆರಡು ಕೊಠಡಿಗಳ ಒಳಗೆ ಮರದ ಬೇರುಗಳು ಬೆಳೆದುಕೊಂಡಿದೆ. ಮಳೆ ಬಂದರೆ ನೀರೆಲ್ಲ ಶಾಲಾ ಕೊಠಡಿಗಳ ಮುಂಭಾಗದಲ್ಲಿ ನಿಲ್ಲುತ್ತದೆ. ನೀರು ಹೊರಗೆ ಹೋಗುವುದಕ್ಕೂ ಜಾಗವಿಲ್ಲ.

ಇಲ್ಲಿನ ವಿದ್ಯಾರ್ಥಿಗಳು ಆಟವಾಡುವುದಕ್ಕೆ ಸೂಕ್ತವಾದ ಆಟದ ಮೈದಾನವಿಲ್ಲ. ಶಾಲೆ ಮುಂಭಾಗದಲ್ಲಿ ಕಾಂಕ್ರೀಟ್ ಹಾಕಿರುವ ಖಾಲಿ ಜಾಗದಲ್ಲೇ ಆಟವಾಡಿಕೊಳ್ಳಬೇಕು. ಇದರಿಂದ ಕ್ರೀಡಾಭ್ಯಾಸ ಮಾಡಲು ಸಾಧ್ಯವಾಗುತ್ತಿಲ್ಲ. ಕ್ರೀಡೆ ಕಲಿಯುವುದಕ್ಕೂ ಸಾಧ್ಯವಾಗದೆ ವಂಚಿತರಾಗುತ್ತಿದ್ದಾರೆ. ಮಳೆ ಇಲ್ಲವಾದರೆ ಶಾಲೆ ಮುಂಭಾಗದ ಬಯಲಿನಲ್ಲಿ ಕುಳಿತುಕೊಂಡು ಮಕ್ಕಳು ಪಾಠ ಕೇಳುತ್ತಾರೆ. ಸರ್ಕಾರದಿಂದ ಸಿ.ಎಸ್.ಆರ್.ಅನುದಾನದಲ್ಲಿ ಹೊಸ ಕಟ್ಟಡವನ್ನು ನಿರ್ಮಾಣ ಮಾಡಿಕೊಟ್ಟು, ಮಕ್ಕಳ ಶೈಕ್ಷಣಿಕ ಬೆಳವಣಿಗೆಗೆ ಸಹಾಯ ನೀಡಬೇಕೆಂದು ಪೋಷಕರು ಒತ್ತಾಯಿಸಿದ್ದಾರೆ.

ಗುಣಮಟ್ಟ ಕಟ್ಟಡ ನಿರ್ಮಾಣಕ್ಕೆ ಮನವಿ

ಶಾಲೆಗೆ ಬರುವುದಕ್ಕೆ ಇಷ್ಟ. ಆದರೆ ಶಾಲೆಯಲ್ಲಿ ಕುಳಿತುಕೊಂಡು ನಿರ್ಭಿತಿಯಿಂದ ಪಾಠ ಕೇಳುವುದಕ್ಕೆ ಭಯವಾಗುತ್ತದೆ. ಬೆಳಕು ಇರುವುದಿಲ್ಲ. ಮಳೆ ಬಂದರೆ ಸೋರುತ್ತದೆ. ಎಲ್ಲಿ ಸೋರುವುದಿಲ್ಲವೋ ಅಲ್ಲಿ ಕುಳಿತುಕೊಳ್ಳುತ್ತೇವೆ. ನಮಗೆ ಉತ್ತಮವಾದ ಕಟ್ಟಡ ನಿರ್ಮಾಣ ಮಾಡಿಕೊಡಿ.

ಮಿಲನ 7ನೇ ತರಗತಿ ವಿದ್ಯಾರ್ಥಿನಿ

ಒಂದೇ ಕೊಠಡಿಯಲ್ಲಿ ಪಾಠ

ನಾವು ಬೇರೆ ಶಾಲೆಗಳ ವಿದ್ಯಾರ್ಥಿಗಳಂತೆ ಕ್ರೀಡೆಗಳು ಕಲಿಯುವುದಕ್ಕೆ ಆಸೆಯಾಗುತ್ತದೆ. ಆದರೆ ಆಟವಾಡುವುದಕ್ಕೆ ಜಾಗವೇ ಇಲ್ಲ. ಒಂದೇ ಕೊಠಡಿಯಲ್ಲಿ ಎರಡು ತರಗತಿಗಳನ್ನು ಕೂರಿಸಿ ಪಾಠ ಮಾಡುತ್ತಾರೆ. ಇದರಿಂದ ಕಲಿಯುವುದಕ್ಕೆ ಗೊಂದಲವಾಗುತ್ತದೆ.

ಚಿಂತನ್ 7ನೇ ತರಗತಿ ವಿದ್ಯಾರ್ಥಿ