ನಕಲಿ ಟಿಕೆಟ್: ವಿಮಾನ ನಿಲ್ದಾಣದಲ್ಲಿ ಸಿಕ್ಕಿಬಿದ್ದ ಯುವತಿ!
ಸ್ನೇಹಿತನ ಬಿಳ್ಕೋಡಲು ವಿಮಾನ ನಿಲ್ದಾಣ ಪ್ರವೇಶಿಸಿದ್ದ ಹರ್‌ಪ್ರೀತ್‌
ದೇವನಹಳ್ಳಿ: ಇಲ್ಲಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 1ಕ್ಕೆ ಸ್ನೇಹಿತನನ್ನು ಬಿಳ್ಕೋಡಲು ಭಾನುವಾರ ನಕಲಿ ಟಿಕೆಟ್‌ನೊಂದಿಗೆ ಬಂದಿದ್ದ ಯುವತಿ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದಾಳೆ.
ಜಾರ್ಖಂಡ್‌ ಮೂಲದ ಹರ್‌ಪ್ರೀತ್‌ ಕೌರ್ ಸೈನಿ ತಮ್ಮ ಸ್ನೇಹಿತ ಆಯುಷ್ ಶರ್ಮಾ ಎಂಬುವರನ್ನು ವಿಮಾನ ನಿಲ್ದಾಣಕ್ಕೆ ಬಿಟ್ಟು ಹೋಗಲು ಬಂದಿದ್ದರು.
ಸಿಐಎಸ್ಎಫ್ ಭದ್ರತಾ ಸಿಬ್ಬಂದಿಗೆ ತಾನೇ ಸೃಷ್ಟಿಸಿದ್ದ ನಕಲಿ ಪಾಸ್ ತೋರಿಸಿ ಟರ್ಮಿನಲ್ 1ರ 5ಎ ದ್ವಾರದಿಂದ ಸ್ನೇಹಿತನೊಂದಿಗೆ ಒಳ ಪ್ರವೇಶಿಸಿದ್ದಾಳೆ.
ಭದ್ರತಾ ಸರದಿಯಲ್ಲಿದ್ದಾಗ ಟಿಕೆಟ್ ತೋರಿಸುತೆ ಭದ್ರತಾ ಸಿಬ್ಬಂದಿ ಸೂಚಿಸಿದಾಗ ಲ್ಯಾಪ್‌ಟಾಪ್‌ ಅನ್ನು ಟರ್ಮಿನಲ್ 1ರ ಹೊರಗಡೆ ಮರೆತು ಬಂದಿದ್ದೇನೆ ಎಂದು ಸುಳ್ಳು ಹೇಳಿದ್ದಾಳೆ.
ಆಕೆ ಬಳಿ ಇದ್ದ ದಾಖಲೆ ಪರಿಶೀಲಿಸಿದಾಗ ಅವೆಲ್ಲವೂ ನಕಲಿ ಎಂದು ಗೊತ್ತಾಗಿದೆ. ಯುವತಿಯನ್ನು ವಿಚಾರಣೆಗೆ ಒಳಪಡಿಸಿದಾಗ ತಾನೇ ಕಂಪ್ಯೂಟರ್‌ನಲ್ಲಿ ತಯಾರಿಸಿರುವುದಾಗಿ ಒಪ್ಪಿಕೊಂಡಿದ್ದಾಳೆ. ಯುವತಿಯನ್ನು ವಶಕ್ಕೆ ಪಡೆದ ಸಿಐಎಸ್ಎಫ್ ಸಿಬ್ಬಂದಿ ವಿಮಾನ ನಿಲ್ದಾಣ ಪೊಲೀಸ್ ಠಾಣೆಯಲ್ಲಿ ಐಪಿಸಿ ಕಲಂ 465, 471, 448 ಅಡಿ ವಂಚನೆಯ ಉದ್ದೇಶಕ್ಕೆ ನಕಲಿ ದಾಖಲೆ ಸೃಷ್ಟಿ ಮತ್ತು ಅತಿಕ್ರಮ ಪ್ರವೇಶ ದೂರು ದಾಖಲಿಸಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.