ಜೆಜೆಎಂ ಕಾಮಗಾರಿ: ₹234 ಕೋಟಿ ವೆಚ್ಚದ ಯೋಜನೆಯಲ್ಲಿ ಖರ್ಚಾಗಿದ್ದು ₹47 ಕೋಟಿಯಷ್ಟೇ!

ಹೊಸಕೋಟೆ: ಪ್ರತಿ ಮನೆಗೆ ನಲ್ಲಿ ನೀರು ಸಂಪರ್ಕ ಕಲ್ಪಿಸಿ ಶುದ್ಧ ಕುಡಿಯುವ ನೀರು ಒದಗಿಸುವ ಮಹತ್ವಾಕಾಂಕ್ಷಿ ಯೋಜನೆಯಾದ ಜಲ ಜೀವನ ಮಿಷನ್‌ (ಜೆಜೆಎಂ) ಕಾಮಗಾರಿಯು ಶೇ 60ರಷ್ಟು ಬಾಕಿ ಉಳಿದಿದೆ.

ಎಂಟು ಗ್ರಾಮಗಳಲ್ಲಿ ಮಾತ್ರ ಜೆಜೆಎಂ ಪೂರ್ಣ: ತಾಲ್ಲೂಕಿನಾದ್ಯಂತ ಒಟ್ಟು 254 ಗ್ರಾಮಗಳಿದ್ದು, ಅವುಗಳಲ್ಲಿ ಈವರೆಗೂ 185 ಗ್ರಾಮಗಳಲ್ಲಿ ಮಾತ್ರ ಯೋಜನೆ ಅನುಷ್ಠಾನ ನಡೆದಿವೆ. ಅದರಲ್ಲಿ ಎಂಟು ಗ್ರಾಮಗಳಲ್ಲಿ ಮಾತ್ರ ಯೋಜನೆ ಸಂಪೂರ್ಣವಾಗಿ ಪೂರ್ಣಗೊಂಡಿದೆ. ಉಳಿದಂತೆ 177 ಗ್ರಾಮಗಳಲ್ಲಿ ಕಾಮಗಾರಿ ನಡೆಯುತ್ತಿದೆ. 69 ಗ್ರಾಮಗಳಲ್ಲಿ ಯೋಜನೆಯ ಯಾವುದೇ ಕೆಲಸ ಪ್ರಾರಂಭವಾಗಿಲ್ಲ. 97 ಗ್ರಾಮಗಳಲ್ಲಿ ಶೇ 50ರಷ್ಟು, 56 ಗ್ರಾಮಗಳಲ್ಲಿ ಶೇ 80 ರಷ್ಟು ಕಾಮಗಾರಿ ಪೂರ್ಣಗೊಂಡಿದೆ. 24 ಗ್ರಾಮಗಳಲ್ಲಿ ಕಾಮಗಾರಿ ಮುಕ್ತಾಯದ ಹಂತವನ್ನು ತಲುಪಿದೆ.

254 ಗ್ರಾಮಗಳ ಜೆಜೆಎಂ ಯೋಜನೆಗಾಗಿ ಒಟ್ಟು ₹234 ಕೋಟಿ ಅನುದಾನ ಬಿಡುಗಡೆಯಾಗಿದ್ದು, ಕೇವಲ ₹47 ಕೋಟಿ ಮಾತ್ರ ಖರ್ಚಾಗಿದೆ.  

ಜೆಜೆಎಂ ಕಾಮಗಾರಿ ಪೂರ್ಣಗೊಂಡಿರುವ ಗ್ರಾಮಗಳು: ದೊಡ್ಡನಲ್ಲೂರ ಹಳ್ಳಿ, ಯಶವಂತಪುರ, ಓರೋಹಳ್ಳಿ, ಒಳಗೆರೆಪುರ, ದೊಡ್ಡನಲ್ಲಾಲ, ಅಪ್ಪಸಂದ್ರ, ಬಚ್ಚೇಗೌಡ ಕಾಲೊನಿ, ತಿಮ್ಮಪ್ಪನಹಳ್ಳಿ ಎಂಟು ಗ್ರಾಮಗಳಲ್ಲಿ ಕಾಮಗಾರಿ ಪೂರ್ಣಗೊಂಡಿದೆ. 56 ಗ್ರಾಮಗಳಲ್ಲಿ ಶೇ 80ರಷ್ಟು ಕಾಮಗಾರಿ ಪೂರ್ಣಗೊಂಡಿದೆ.

ಪ್ರಗತಿಯಲ್ಲಿರುವ ಇತರೆ ಕಾರ್ಯಗಳು: ಓವರ್ ಹೆಡ್ ಟ್ಯಾಂಕ್‌, ಟ್ಯಾಂಕಿಗಳ ದುರಸ್ತಿ, ಕೊಳವೆ ಬಾವಿಗಳ ಕಾಮಗಾರಿ ನಡೆಯುತ್ತಿದೆ.  ತಾಲ್ಲೂಕಿನಲ್ಲಿ ಒಟ್ಟು 154 ಓವರ್ ಹೆಡ್ ಟ್ಯಾಂಕ್‌ ನಿರ್ಮಾಣ ಮಾಡಲು ಯೋಜನೆ ರೂಪಿಸಿದ್ದು, ಅದರಲ್ಲಿ 29 ಟ್ಯಾಂಕ್‌ಗಳ ನಿರ್ಮಾಣ ಮುಕ್ತಾಯವಾಗಿದ್ದರೆ, 42 ಟ್ಯಾಂಕ್‌ಗಳ ನಿರ್ಮಾಣ ಪ್ರಗತಿಯಲ್ಲಿದೆ. ಉಳಿದಂತೆ 83 ಟ್ಯಾಂಕ್‌ಗಳ ನಿರ್ಮಾಣಕ್ಕೆ ಬೇಕಾದ ಸ್ಥಳವನ್ನು ಸಂಬಂಧಿಸಿದ ಅಧಿಕಾರಿಗಳಿಗೆ ಹಸ್ತಾಂತರಿಸಬೇಕಿದೆ.

ನೀರಿನ ಸಮಸ್ಯೆ ಇರುವ ಗ್ರಾಮಗಳಲ್ಲಿ ಕೊಳವೆ ಬಾವಿ ಕೊರೆಸಲು ಯೋಜನೆ ರೂಪಿಸಿದ್ದು, ಒಟ್ಟು 359 ಕೊಳವೆ ಬಾವಿಗಳನ್ನು ಕೊರೆಯುವ ಪ್ರಸ್ತಾವವಿದೆ. ಅದರಲ್ಲಿ ಈವರೆಗೆ 185 ಕೊಳವೆ ಬಾವಿ ಕೊರೆಸಲಾಗಿದೆ. ಅದರಲ್ಲಿ 156 ಕೊಳವೆ ಬಾವಿಗಳಲ್ಲಿ ನೀರು ಸಿಕ್ಕಿದ್ದು, 27 ಕೊಳವೆ ಬಾವಿಗಳು ವಿಫಲವಾಗಿದೆ.