ದೇವನಹಳ್ಳಿ | ಜಿಟಿ ಜಿಟಿ ಮಳೆ: ರಾಗಿ ಕಟಾವಿಗೆ ಅಡ್ಡಿ

ವಿಜಯಪುರ(ದೇವನಹಳ್ಳಿ): ಆಗಾಗ್ಗೆ ಬೀಳುತ್ತಿರುವ ಜಿಟಿ ಜಿಟಿ ಮಳೆಯಿಂದ ರಾಗಿ ಕಟಾವಿಗೆ ಅಡ್ಡಿಯಾಗಿದೆ.

ಮುಂಗಾರು ಆರಂಭದಲ್ಲಿ ಬಿತ್ತನೆ ಮಾಡಿರುವ ರಾಗಿ ಬೆಳೆ ಕಟಾವಿಗೆ ಸಿದ್ಧವಾಗಿವೆ. ತೆನೆಗಳು ಕಾಳು ತುಂಬಿಕೊಂಡು ತೆನೆಗಳು ಕೆಂಪಾಗಿವೆ. ತೆನೆ ಕಟಾವಿಗೆ ರೈತರು ಮುಂದಾಗಿದ್ದಾರೆ. ಆದರೆ ಜಿಟಿ ಜಿಟಿ ಮಳೆಯಿಂದ ಕಟಾವು ಮಾಡಿಕೊಳ್ಳುವುದಕ್ಕೆ ಸಾಧ್ಯವಾಗುತ್ತಿಲ್ಲ.

ಹೊಲಗಳಲ್ಲಿ ತೆನೆತುಂಬಿದ ಪೈರುಗಳು ನೆಲಕ್ಕುರುಳಿವೆ. ಮಳೆ ಈಗ ಮುಂದುವರೆದರೆ ತೆನೆಯಲ್ಲಿ ಬಲಿತಿರುವ ಕಾಳು ಮೊಳಕೆ ಬರುವ ಸಾಧ್ಯತೆಗಳಿವೆ. ರಾಗಿ ಕಾಳು ಮೊಳಕೆ ಬಂದರೆ ರೈತರ ಶ್ರಮವೆಲ್ಲಾ ವ್ಯರ್ಥವಾಗಲಿದೆ ಎಂದು ರೈತ ಆಂಜಿನಪ್ಪ ಹೇಳಿದರು.

ಕೆಲ ದಿನಗಳ ಹಿಂದೆ ಬಿತ್ತನೆ ಮಾಡಿರುವ ಬೆಳೆಗಳಿಗೆ ಮಳೆ ಅಗತ್ಯವಿದೆ. ಆದರೆ, ಮೊದಲು ಬಿತ್ತನೆಯಾಗಿರುವ ಬೆಳೆಗೆ ಈಗ ಬೀಳುತ್ತಿರುವ ಮಳೆ ಹಾನಿಯುಂಟು ಮಾಡುತ್ತದೆ. ಮಳೆ ಬಿದ್ದರೆ, ಒಂದು ವರ್ಗದ ರೈತರಿಗೆ ಸಂತಸವಾಗುತ್ತಿದ್ದರೆ, ಬೆಳೆಯಾಗಿರುವ ರೈತರು ಸಂಕಷ್ಟಕ್ಕೆ ಸಿಲುಕುವಂತಾಗಿದೆ ಎಂದು ರೈತ ರಾಮಾಂಜಿನಪ್ಪ ಹೇಳುತ್ತಾರೆ.