ಬಾಲಕರ ಜಗಳ: ಪಾಲಕರಿಂದ ಬಾಲಕನಿಗೆ ಥಳಿತ 

ನಿಪ್ಪಾಣಿ: ಎರಡು ಮಕ್ಕಳ ಜಗಳದಲ್ಲಿ ಪಾಲಕರೊಬ್ಬರು ಮಧ್ಯ ಪ್ರವೇಶಿಸಿ ಬಾಲಕನನ್ನು ಹಿಗ್ಗಾಮುಗ್ಗಾ ಥಳಿಸಿದ ಅಮಾನವೀಯತೆ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಜೂನ್‌ 6ರಂದು ಮಕ್ಕಳಿಬ್ಬರು ಸ್ಥಳೀಯ ತಹಶೀಲ್ದಾರ್ ಪ್ಲಾಟ್‍ನಲ್ಲಿ ಜಗಳವಾಡುತ್ತಿದ್ದರು. ತನ್ನ ಮಗನ ಜೊತೆಗೆ ಜಗಳವಾಡುತ್ತಿದ್ದ 12 ವರ್ಷದ ಬಾಲಕನನ್ನು ಮತ್ತೊಬ್ಬ ಬಾಲಕನ ತಂದೆ ಸ್ಥಳೀಯ ತಹಶೀಲ್ದಾರ ಪ್ಲಾಟ್‍ನ ಇಸ್ಮಾಯಿಲ್ ಗಫರ್ ಮುಲ್ಲಾ(42) ಥಳಿಸಿದ್ದಾರೆ. ಈ ಘಟನೆ ಮಸೀದಿಯಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

ಈ ಘಟನೆಯನ್ನು ನಗರದ ಸಮಾಜ ಮುಖಂಡರು ಒಗ್ಗೂಡಿ ಪರಿಹರಿಸಿದ್ದರು. ಸ್ಥಳೀಯ ಶಹರ್ ಪೊಲೀಸ್ ಠಾಣೆಯ ಪಿಎಸ್‍ಐ ಸ್ವಯಂಪ್ರೇರಿತವಾಗಿ ಜೂನ್‌ 10ರಂದು ದೂರು ದಾಖಲಿಸಿದ್ದರು. ನಂತರ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೊ ಹರಿದಾಡುತ್ತಿದ್ದಂತೆ ಥಳಿಸಿಕೊಂಡ ಬಾಲಕನ ಪಾಲಕರು ಠಾಣೆಯಲ್ಲಿ ದೂರು ದಾಖಲಿಸಿದ್ದರು.