ಚಿಕ್ಕೋಡಿ: ಈದ್‌ ಮೆರವಣಿಗೆಯಲ್ಲಿ ಪ್ಯಾಲಿಸ್ಟೀನ್‌ ಧ್ವಜ ಹಾರಾಟ, ನಾಲ್ವರ ವಶ

ಚಿಕ್ಕೋಡಿ (ಬೆಳಗಾವಿ ಜಿಲ್ಲೆ): ಪಟ್ಟಣದಲ್ಲಿ ಶುಕ್ರವಾರ ಸಂಜೆ ನಡೆದ ಈದ್ ಮಿಲಾದ್ ಮೆರವಣಿಗೆಯಲ್ಲಿ ಪ್ಯಾಲಿಸ್ಟೀನ್ ಧ್ವಜ ಹಾರಿಸಿ ನೃತ್ಯ ಮಾಡಲಾಗಿದೆ. ಧ್ವಜ ವಶಕ್ಕೆ ಪಡೆದ ಪೊಲೀಸರು, ಸ್ವಯಂಪ್ರೇರಿತ ಪ್ರಕರಣ ದಾಖಲಿಸಿಕೊಂಡು, ನಾಲ್ವರನ್ನು ವಶಕ್ಕೆ ಪಡೆದಿದ್ದಾರೆ.

ಪಟ್ಟಣದ ಮುಖ್ಯರಸ್ತೆಯಲ್ಲಿ ಮೆರವಣಿಗೆ ಸಾಗುವಾಗ, ಯುವಕರು ಪ್ಯಾಲಿಸ್ಟೀನ್‌ ಧ್ವಜವನ್ನು ಪೈಪಿಗೆ ಕಟ್ಟಿ ಬೀಸುತ್ತ ಸಾಗಿದರು. ಅದರ ಹಿಂದೆ ಭಾರತದ ಧ್ವಜವೂ ಇತ್ತು. ಯುವಕರು ನೃತ್ಯ ಮಾಡಿದರು. ಇದರ ವಿಡಿಯೊ ತುಣುಕುಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದವು. ತಕ್ಷಣವೇ ಚಿಕ್ಕೋಡಿ ಠಾಣೆ ಪೊಲೀಸರು ಸ್ಥಳಕ್ಕೆ ಬಂದು, ಧ್ವಜ ವಶಕ್ಕೆ ಪಡೆದರು.

ನಂತರ ಮೆರವಣಿಗೆ ಸಾಂಗವಾಗಿ ನಡೆಯಿತು.