ಬೆಳಗಾವಿ: ವಿದ್ಯುತ್‌ಚಾಲಿತ ತ್ರಿಚಕ್ರ ವಾಹನಗಳ ವಿತರಣೆ

ಬೆಳಗಾವಿ: ‘ಮಹಿಳೆಯರನ್ನು ಆರ್ಥಿಕವಾಗಿ ಸ್ವಾವಲಂಬಿಯಾಗಿಸುವ ನಿಟ್ಟಿನಲ್ಲಿ ಈಗ ಇಬ್ಬರು ಮಹಿಳೆಯರಿಗೆ  ವಿದ್ಯುತ್‌ಚಾಲಿತ ತ್ರಿಚಕ್ರ ವಾಹನ ವಿತರಿಸುತ್ತಿದ್ದೇವೆ. ಮುಂದಿನ ದಿನಗಳಲ್ಲಿ 25 ಮಹಿಳೆಯರಿಗೆ ವಿತರಿಸುವ ಗುರಿ ಇದೆ’ ಎಂದು ಶಾಸಕ ಅಭಯ ಪಾಟೀಲ ಹೇಳಿದರು.

ಇಲ್ಲಿ ಭಾನುವಾರ ವಿದ್ಯುತ್‌ಚಾಲಿತ ತ್ರಿಚಕ್ರ ವಾಹನಗಳನ್ನು ವಿತರಿಸಿ ಅವರು  ಮಾತನಾಡಿದರು.

‘ಉತ್ತರ ಕರ್ನಾಟಕದಲ್ಲಿ ಮೊದಲ ಬಾರಿ ಇಂಥ ವಾಹನ ಪರಿಚಯಿಸಿದ್ದೇವೆ. ಎರಡೂ ವಾಹನಗಳ ಖರೀದಿಗೆ ತಗುಲಿದ ₹3.10 ಲಕ್ಷ ಮೊತ್ತವನ್ನು ನಾವೇ ಭರಿಸಿದ್ದೇವೆ. ಅವುಗಳನ್ನು ಚಲಾಯಿಸುವವರು ಆರು ವರ್ಷಗಳವರೆಗೆ ಪ್ರತಿದಿನ ₹100 ಭರಿಸಬೇಕು. ಶೂನ್ಯ ಬಡ್ಡಿದರದಲ್ಲಿ ಸಾಲ ಸೌಕರ್ಯ ಕಲ್ಪಿಸಲಾಗಿದೆ’ ಎಂದರು.

‘ಒಮ್ಮೆ 5 ತಾಸು ಚಾರ್ಜಿಂಗ್‌ ಮಾಡಿದರೆ, ಈ ವಾಹನ 100 ಕಿ.ಮೀ. ಸಂಚರಿಸಲಿದೆ. ಆರಂಭದಲ್ಲಿ ದಕ್ಷಿಣ ಕ್ಷೇತ್ರದಲ್ಲಷ್ಟೇ ಸಂಚರಿಸಲಿರುವ ಇವುಗಳಲ್ಲಿ ಪ್ರಯಾಣಿಕರು ಕಡಿಮೆ ಶುಲ್ಕ ನೀಡಿ ಸಂಚರಿಸಬಹುದು. ಈ ವಾಹನಗಳ ಬಳಕೆಯಿಂದ ಪರಿಸರ ಮಾಲಿನ್ಯವೂ ತಗ್ಗಲಿದೆ. ಮಹಿಳೆಯರಿಗೆ ವಾಹನ ಚಾಲನೆ ಕುರಿತು ತರಬೇತಿಯನ್ನೂ ಕೊಡುತ್ತೇವೆ’ ಎಂದು ತಿಳಿಸಿದರು.