ಮಕ್ಕಳನ್ನು ಪ್ರಚಾರಕ್ಕೆ ಬಳಸಿದ ಕುಡುಚಿ ಶಾಸಕ ಪಿ.ರಾಜೀವ್‌: ವಿಡಿಯೊ ಹರಿದಾಟ

ಮುಗಳಖೋಡ (ಬೆಳಗಾವಿ ಜಿಲ್ಲೆ): ಕುಡಚಿ ಶಾಸಕ ಪಿ.ರಾಜೀವ್‌ ಪಟ್ಟಣದಲ್ಲಿ ಸೋಮವಾರ ನಡೆಸಿದ ಚುನಾವಣಾ ಪ್ರಚಾರದಲ್ಲಿ ಮಕ್ಕಳನ್ನು ಬಳಸಿಕೊಂಡ ವಿಡಿಯೊ ತುಣುಕು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಪಟ್ಟಣದ 6ನೇ ವಾರ್ಡ್‌ನ ಕರಿಸಿದ್ಧೇಶ್ವರ ದೇವಸ್ಥಾನ ಆವರಣದಲ್ಲಿ ಪಿ.ರಾಜೀವ್‌ ಸಭೆ ನಡೆಸಿದ್ದರು. ಇದರಲ್ಲಿ ಪಾಲಕರ ಜತೆಗೆ ಹಲವು ಮಕ್ಕಳೂ ಪಾಲ್ಗೊಂಡಿದ್ದರು. ಕೆಲವು ಬಾಲಕರಿಗೆ ಬಿಜೆಪಿ ಚಿಹ್ನೆಯ ಟಿಷರ್ಟ್‌ ಹಾಕಲಾಗಿತ್ತು. ಮತ್ತೆ ಕೆಲವು ಮಕ್ಕಳ ಕೊರಳಲ್ಲಿ ಬಿಜೆಪಿಯ ಶಾಲು ಹೊದಿಸಲಾಗಿತ್ತು. ಸಭೆಯಲ್ಲಿ ಕುಳಿತಿದ್ದ ಬಾಲಕಿಯನ್ನು ಮಾತನಾಡಿಸಿದ ಶಾಸಕ, ‘ಪಿ.ರಾಜೀವ್ ಅವರಿಗೇ ವೋಟ್‌ ಹಾಕುವಂತೆ ಹೇಳಬೇಕು ಪುಟ್ಟಿ’ ಎಂದು ಪದೇಪದೇ ಹೇಳಿದ್ದು ಕೂಡ ವಿಡಿಯೊದಲ್ಲಿದೆ.